دەنساۋلىق ساقتاۋ مينيسترلىگىنىڭ باستاماسىمەن رەسپۋبليكا كولەمىندە ءوتىپ جاتقان «سالاماتتى ادەتتەر مارافونىنا» اتىراۋلىقتاردىڭ دا قىزىعۋشىلىقتارى جوعارى. دەنساۋلىق ساقتاپ, ۇزاق ءومىر سۇرۋگە ۇندەيتىن شارا بەس كەزەڭنەن تۇرادى: ادام اعزاسىنا زيانى بار تۇزدى كۇندەلىكتى تۇتىنۋدى ازايتۋ, تاۋلىگىنە 2 ليتر سۋ ءىشۋ, 10 000 قادام جاياۋ ءجۇرۋ, جەمىس-جيدەكتەر پايدالانۋ, جازاتايىم جاعدايعا تاپ بولعاندا جاسالاتىن ءىس-ارەكەتتەردى ءبىلۋ.
قالالىق №7 ەمحانا مەن اتىراۋ مەديتسينا كوللەدجى, سالاماتتى ءومىر سالتىن قالىپتاستىرۋ ورتالىعى بىرلەسىپ ۇيىمداستىرعان مارافون مەديتسينا قىزمەتكەرلەرىنىڭ فلەشموبىمەن باستالدى. رەترو ساياباقتا جاسالعان «دەنساۋلىق قالاشىعىندا» تۇرعىندار قان قىسىمدارىن, قانداعى قانت پەن حولەستەرين مولشەرىن تەگىن ولشەۋگە مۇمكىندىك الدى.
– مارافون تالاپتارىن ءار تۇرعىن ءوز دەڭگەيىندە جالعاستىرىپ وتىرۋى كەرەك. 8 قىركۇيەكتە ماتەريالدار رەسپۋبليكاعا جولدانادى. بارلىق ەرەجەلەردى بۇلجىتپاي ورىنداعان قاتىسۋشىلارعا ارنايى سىيلىقتار بار, – دەيدى سالاماتتى ءومىر سالتىن قالىپتاستىرۋ ورتالىعىنىڭ باسشىسى الۋا سىراليەۆا.
پايداسىنان زيانى كوپ گازدى سۋسىنداردى, اسا ءتاتتى, تىم اششى تاماقتاردى تۇتىنباي, تازا سۋ ءىشىپ, جەمىس-جيدەك پايدالانۋدىڭ ماڭىزى زور. مارافوننىڭ ماقساتى – سپورتپەن شۇعىلدانىپ, دۇرىس تاماقتانۋدى ءار ادامنىڭ كۇندەلىكتى ادەتىنە اينالدىرىپ, ءومىر ساپاسىن ارتتىرۋ. ال اتىراۋلىقتاردىڭ قانداي ناتيجە كورسەتەتىنى قىركۇيەكتە بەلگىلى بولادى.
باقىتگۇل باباش, «ەگەمەن قازاقستان»
اتىراۋ