ەلدىڭ ەرتەڭى – جاستار. ولار مىقتى بولسا, ءبىلىمدى, سانالى بولسا, مەملەكەتتىڭ بولاشاعى جارقىن, كەلەشەگى كەمەل. سول جاستار تاۋەلسىزدىكتىڭ 20 جىلدىعى قورىتىندىلانىپ جاتقاندا نە دەيدى, قانداي پروبلەمالارى بار, نە تىندىردى, بولاشاقتاعى جوسپارلارى قانداي دەگەنگە كەلسەك, وڭتۇستىك قازاقستان مەملەكەتتىك پەداگوگيكا ينستيتۋتىندا تاۋەلسىزدىكتىڭ 20 جىلدىعىنا ارنالعان جاستار فورۋمى بولىپ ءوتتى. وعان قالالىق جاستار ورتالىعى, “جاس وتان” جاستار قاناتى, Cتۋدەنتتەر اليانسى وكىلدەرى, “بايتەرەك” قوعامدىق بىرلەستىگىنىڭ مۇشەلەرى جانە پەداگوگيكا ينستيتۋتىنىڭ ستۋدەنتتەرى قاتىسىپ, وزەكتى ماسەلەلەردى تالقىلادى. ونداعى كوتەرىلگەن ماسەلەلەر تۋرالى ايتار بولساق, تاۋەلسىزدىكتىڭ 20 جىلدىعىندا قازاقستان قانداي بەلەستەردەن ءوتتى, وعان جاستار قانداي ۇلەس قوستى. ەلدىڭ ساياسي-ەكونوميكالىق جاعدايى, ەرتەڭگى بولاشاعى, بۇگىنگى اتقارىلىپ جاتقان جۇمىستار تارازىلاندى. وڭتۇستىك قازاقستان وبلىسىنىڭ 14-29 جاس ارالىعىنداعى تۇرعىندارىن ەسەپكە العاندا, وبلىستىڭ 30 پايىزىن جاستار قۇرايدى ەكەن. ياعني, ۇلكەن كۇش, ۇلكەن مۇمكىندىك. شىمكەنت قالالىق جاستار وداعىنىڭ توراعاسى زاڭعار ۇسىپاحمەتوۆ تە قازاقستاندى وركەندەتۋدە جاستاردىڭ جۇمىلا كۇش قوسۋى ۇلكەن بەلەستەرگە جەتكىزەتىندىگىن ايتتى.
ەكى مىڭىنشى جىلداردىڭ باسىندا ستۋدەنتتەردىڭ ءشاكىرتاقىسى 1700 تەڭگە بولسا, قازىر 15000 تەڭگەگە جەتتى. ۇكىمەت تاعى دا كوتەرۋ نيەتىندە. جۇمىسسىزدىقپەن كۇرەس باعدارلاماسى قابىلداندى. “جول كارتاسى – 2020”, “ديپلوممەن – اۋىلعا” باعدارلامالارى جاستار ءۇشىن جاقسى جۇمىس ىستەدى, ۇلكەن مۇمكىندىكتەرگە جول اشتى.
وقمپي-ءدىڭ جاستار ءىسى جونىندەگى كوميتەتىنىڭ توراعاسى نۇركەن ارالبەكوۆ مەملەكەت تاراپىنان قابىلدانعان كادرلىق رەزەرۆ جۇيەسىنىڭ جاستاردى ىنتالاندىرۋدا ۇلكەن ءرول اتقارعاندىعىن ايتادى. 2009 جىلى وسى ينستيتۋتتا رەزەرۆكە 70 ادام مۇشە بولسا, الدى مەملەكەتتىك مەكەمەلەردە تابىستى جۇمىس ىستەپ جاتىر ەكەن. باسقوسۋدا, سونداي-اق بۇگىنگى كۇنى وزەكتى ماسەلەگە اينالىپ وتىرعان ەلىمىزگە جات ءدىني اعىمداردىڭ اسەرىنەن جاستاردى اراشالاۋ ماسەلەسى دە كوتەرىلدى.
باقتيار تايجان,
شىمكەنت.