«تاۋەلسىزدىكتىڭ 20 شىڭى» جۇلدىزدى كۇندەرىنىڭ شىرايلى شاراپاتىنا بولەنگەن كوپ بالالى انالار مادەنيەت سارايىندا ءتالىمدى باسقوسۋ وتكىزدى. قازىر كوكشەتاۋ قالاسىندا 83 «باتىر انا», 409 «التىن القا» يەگەرى تىرشىلىك تامىزىعىن مازداتۋدا. ال بەس بالانى ءتاربيەلەگەندەردى قوسقاندا ولاردىڭ سانى 500-گە جاقىندايدى ەكەن.
«ءبىر قولىمەن بەسىكتى, ءبىر قولىمەن الەمدى تەربەتكەن» انالاردى كوكشەتاۋ قالاسى اكىمىنىڭ ورىنباسارى تاسبولات كاكپەنوۆ قۇتتىقتاپ, مەرەكەلىك سىي-سياپات تاپسىردى. اسىل جاندار قۇرمەتىنە ءان شىرقالىپ, دومبىرا كۇمبىرلەدى. بالاباقشا بالعىندارىنان باستاپ, اتى ايگىلى قايراتكەرلەر, ونەر مايتالماندارىنىڭ ءجۇرەكجاردى لەبىزدەرى ءزاۋلىم زالدى العىس سەزىمىمەن تەربەتىپ تۇرعانداي ەدى.
انالار مەن اجەلەر بۇل جولى «كەلىندەر سايىسى» بايقاۋىن تاماشالادى. وبلىس ورتالىعىنداعى اقتىق سىنعا 9 كەلىن شاقىرىلعان ەكەن. ولار وتباسىلىق قۇندىلىقتار, ۇلتتىق سالت-داستۇرلەرىمىز, كۇندەلىكتى قارىم-قاتىناس قاعيداتتارىنان ونەگە توككەن ارۋلار جۇرتشىلىقتى قول ونەرىمەن دە, ءان ونەرىمەن دە ءتانتى ەتتى. قازىلار القاسىنداعى قايىن ەنەلەر ءبىرىنشى ورىنعا اتباسار قالاسىنان كەلگەن اسەم ءابدىراحمانوۆا, ال جۇلدەلى ورىندارعا كوكشەتاۋلىق ءبيبىاجار يسابەكوۆا مەن بۋرابايلىق باقىتجامال رامازانوۆانى لايىقتى دەپ تاپتى.
بايقاۋعا قاتىسۋشىلار قازاقستان رەسپۋبليكاسى پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات ءجونىندەگى ۇلتتىق كوميسسيانىڭ العىس حاتتارىمەن ماراپاتتالدى.
باقبەرگەن امالبەك,
اقمولا وبلىسى.