ويىل اگرارلىق كوللەدجىنىڭ جاڭا وقۋ كورپۋسى مەن جاتاقحاناسى پايدالانۋعا بەرىلدى. سالتاناتتى ساتتە ءسوز العان اۋدان اكىمى التىنبەك امىرعاليەۆ جينالعانداردى اسەم عيماراتتىڭ اشىلۋىمەن تۇسپا-تۇس كەلىپ وتىرعان ەل تاۋەلسىزدىگىنىڭ 20 جىلدىعىمەن قۇتتىقتادى. سونداي-اق ول «ديپلوممەن – اۋىلعا!» باعدارلاماسىنىڭ اياسىندا ەڭبەك جولىن وسى كوللەدجدە باستاعان جاڭگىر حان اتىنداعى باتىس قازاقستان اگرارلىق ۋنيۆەرسيتەتىنىڭ تۇلەگى ءبيبىنۇر تولەپوۆاعا جاڭا پاتەردىڭ كىلتىن تابىستادى.
وسى ەكى نىساننىڭ قۇرىلىسىن جۇرگىزگەن باس مەردىگەر «ۆامەك» جشس ديرەكتورى كەڭەس الىمباەۆ كوللەدج ديرەكتورى عازيز زايمولدينگە عيماراتتىڭ سيمۆوليكالىق كىلتىن تاپسىردى. ودان ءارى كوپشىلىك عيماراتتىڭ ءىشىن ارالاپ كوردى. 60 ورىندىق جاتاقحانادا ستۋدەنتتەر ءۇشىن بارلىق جاعداي جاسالعان.
ىرگەتاسى 1963 جىلى قالانعان وقۋ ورنى بۇرىن نەگىزىنەن اۋىلشارۋاشىلىعىنىڭ جۇمىسشى ماماندارىن دايارلاۋمەن اينالىسىپ كەلگەن ەدى. ەل تاۋەلسىزدىگىن العان جىلدارى ليتسەيگە اينالعان وقۋ ورنى ۋاقىت اعىمىنا ىلەسىپ, دايارلاعان ماماندارى نارىقتىق ەكونوميكانىڭ كوشىنە ەرىپ, ءبىلىمىن جالعاستىرىپ, وزدەرى تۇلەگەن بۇگىنگى كوللەدجدە ءىزباسارلارىنا ءدارىس بەرىپ ءجۇر. قازىرگى تاڭدا كوللەدج قابىرعاسىندا 273 ستۋدەنت بەس ماماندىق بويىنشا ءبىلىم الۋدا. بيىل ليتسەيدە دەنە تاربيەسى ءپانى مۇعالىمى فاكۋلتەتى اشىلدى.
ساتىبالدى ءساۋىرباي.
اقتوبە وبلىسى.