كەشە استانادا «مەملەكەت پەن بيزنەستىڭ سەرىكتەستىگى – ەكونوميكانى جاڭعىرتۋ نەگىزى» اتتى فورۋم بولىپ ءوتتى. فورۋمدى قازاقستان سالىق تولەۋشىلەرى اسسوتسياتسياسى باسقارۋ كەڭەسىنىڭ ءتورايىمى جانات ەرتىلەسوۆا جۇرگىزدى.
فورۋمدا ۇلتتىق ەكونوميكا ءمينيسترى تيمۋر سۇلەيمەنوۆ ءسوز سويلەپ, اتالعان زاڭداعى وزگەرىستەر مەن تولىقتىرۋلاردى ورتاعا سالدى. «بيىلعى 24 مامىردا مەملەكەت باسشىسى كاسىپكەرلىك قىزمەتتىڭ رەتتەلۋىن جەتىلدىرۋ ءۇشىن ءتيىستى زاڭعا قول قويعان بولاتىن. بۇل ماڭىزدى قۇجاتتاعى تۇزەتۋلەر مەن تولىقتىرۋلاردى ەنگىزۋ وڭاي بولعان جوق. كاسىپكەرلەردىڭ پىكىرى مەن ۇسىنىستارىن ءبىلۋ ءۇشىن جارتى جىل بىرلەسىپ جۇمىس ىستەدىك. سودان كەيىن جارتى جىل پارلامەنتتە وسى وزگەرىستەردى مۇقيات قاراۋعا كەتتى. بيزنەستى قايتا رەتتەۋ جانە ونىڭ شىعىندارىن ازايتۋ, اكىمشىلىك كەدەرگىلەرىن جويۋ جانە كاسىپكەرلىكتىڭ دامۋىن ىنتالاندىرۋ بويىنشا جۇرگىزىلىپ جاتقان ساياسات ەسكەرىلە وتىرىپ, زاڭ مەملەكەتتىك باقىلاۋ-قاداعالاۋ قىزمەتىن رەفورمالاۋ, اقپاراتتىق قۇرالداردى رەتتەۋ, تابيعي مونوپوليالار سۋبەكتىلەرى جانە كۆازيمەملەكەتتىك سەكتور كورسەتەتىن مىندەتتى قىزمەتتەردى رەفورمالاۋ, رەتتەۋشىلىك اسەرگە تالداۋدى جەتىلدىرۋ, بيزنەس شىعىندارىن تۇبەگەيلى تومەندەتۋ, باسەكەلەستىككە كەدەرگى كەلتىرەتىن نورمالاردى انىقتاۋ جانە الىپ تاستاۋ, قازاقستاننىڭ «Doing Business» رەيتينگىسىندە پوزيتسيالارىن جاقسارتۋ سەكىلدى باعىتتار بويىنشا ازىرلەندى. ماسەلەن, مەملەكەتتىڭ باقىلاۋ-قاداعالاۋ قىزمەتىن رەفورمالاۋ ماسەلەسىنە كەلسەك, ەندى تەكسەرۋشى كاسىپكەردى بىردەن جازالاۋعا جۇگىنبەي, وعان كەمشىلىكتەرىن تۇزەتۋگە ۋاقىت بەرەدى. مۇنى پروفيلاكتيكالىق باقىلاۋ دەپ ايتۋعا بولادى», دەدى مينيستر.
فورۋمدا كاسىپكەرلەر تاراپىنان مينيسترگە كوپتەگەن سۇراقتار قويىلدى. ماسەلەن, ء«سىز جاڭا كاسىپكەرلەر سالعان نىساندى مونوپوليستىك كوممۋنالدىق قىزمەتتەرگە تاپسىرۋدىڭ بەلگىلى ءبىر مەرزىمى بەلگىلەنەدى دەدىڭىز. سوندا ول قانداي مەرزىم؟» دەپ سۇرادى. «ەڭ ارى كەتكەندە جارتى جىل دەپ وتىرمىز» دەپ جاۋاپ بەردى مينيستر. وسىعان قوسىمشا جانات ەرتىلەسوۆا ەندى وسى ماسەلە بويىنشا ارناۋلى سايت جۇمىس ىستەيتىندىگىن, كاسىپكەر نىساندى كوممۋنالدىق قىزمەتتەرگە قوسۋ جونىندە وسى سايت ارقىلى ءوتىنىش بەرە الاتىندىعىن, بۇل جاعداي كوممۋنالدىق قىزمەت كورسەتۋشى مونو- پوليستەردىڭ جاڭا نىساندى قابىلداپ الۋ جونىندەگى ارەكەتتەرىن اشىق قاداعالاۋعا الىپ كەلەتىندىگىن جەتكىزدى.
فورۋمدا «اتامەكەن» ۇكپ باسقارما توراعاسىنىڭ ورىنباسارى رۋسلان ءجۇرسىنوۆ ءسوز الىپ, اتالعان زاڭ جوباسىن ازىرلەۋگە كاسىپكەرلەردىڭ بەلسەنە قاتىسقاندىعىن, بۇل بەلسەندىلىكتىڭ ءوزىن اقتاعاندىعىن, كاسىپكەرلەر ايتقان ۇسىنىستىڭ 96 پايىزى قابىلدانعاندىعىن ايتىپ ءوتتى.
سۇڭعات ءالىپباي, «ەگەمەن قازاقستان»