«نۇر وتان» پارتياسىنىڭ قايتا جاڭعىرتىلعان Nur Otan Talks جوباسى اياسىندا ەلوردامىزدىڭ بەلگىلى ءبىر بەلەستەردى باعىندىرعان تۇرعىندارى باس قوستى. «استانا: اسقاق ارمان» دەگەن تاقىرىپپەن وتكەن ءىس-شارا باس قالامىزدىڭ 20 جىلدىق مەرەيلى مەرەكەسىنە ارنالدى. وندا قاتىسۋشىلار وزدەرىنىڭ جەتىستىككە قالاي جەتكەنى جايىندا كەڭىنەن ايتىپ بەردى.
ونلاين رەجىمدە ءسوز العان سپيكەرلەر استانانىڭ قالىپتاسۋ كەزەڭىنە, ونىڭ تاريحى مەن دامۋ باعىتتارىنا توقتالىپ, وزدەرىنىڭ جەڭىستەرىن باس قالانىڭ جەمىستى جىلدارىمەن بايلانىستىراتىندارىن جەتكىزدى.
پارتيا ساياسي كەڭەسىنىڭ سوڭعى وتىرىسىندا ەلباسى, پارتيا توراعاسى جاڭا پارتيالىق جوبالار مەن جۇمىس باعىتىن ماقۇلداپ, ناقتى تاپسىرمالار بەرگەن بولاتىن. بۇعان دەيىن دە مەملەكەت باسشىسىنىڭ پارتيا قىزمەتىن جاڭعىرتۋ جونىندە ءتيىستى ماقسات-مىندەتتەردى ايقىنداپ بەرگەنى بەلگىلى. Nur Otan Talks ەركىن پىكىرتالاس الاڭى سونىڭ اياسىندا قولعا الىنىپ, قايتا جاڭعىرتىلعان جوبالاردىڭ ءبىرى.
ءىس-شارانى اشقان «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ پارتيا قىزمەتىندەگى تۇبەگەيلى وزگەرىستەرگە وسىنداي تىڭ باستامالار ايقىن دالەل ەكەنىن ايتتى. ونىڭ ايتۋىنشا, سوڭعى ايلاردا پارتيالىق جاڭعىرۋ اياسىندا ەلباسىنىڭ تاپسىرماسىمەن جاڭا 22 جوبا قولعا الىنىپ, ولاردى جۇزەگە اسىرۋ جۇمىستارى قارقىندى جۇرگىزىلۋدە.
– جالپى, ءبىز بۇگىندە پارتيانىڭ جۇمىسىن قازىرگى زامانعا بەيىمدەپ, زاماناۋي ۇردىستەردى ەسكەرىپ, جۇمىسىمىزدى جاڭا قارقىنمەن, تىڭ سەرپىلىسپەن جۇرگىزۋگە ۇلكەن باسىمدىق بەرىپ وتىرمىز. سونداي-اق پارتيانىڭ اشىقتىعىن قامتاماسىز ەتۋ ءۇشىن اقپاراتتىق كەڭىستىكتىڭ اياسىن كەڭەيتىپ, جاڭا تەحنولوگيالار مەن مۇمكىندىكتەردى مولىنان پايدالانۋدى قولعا الدىق. ودان بولەك, وسى باعىتتا بىرقاتار جاڭا جوبالارىمىز دا بار. ولاردىڭ ءبىرى Nur Otan Trends جوباسى بىلىكتى ساراپشىلار باس قوسىپ, قوعامداعى ەكونوميكالىق, الەۋمەتتىك ماسەلەلەردى تالقىلاپ, ولاردىڭ شەشۋ جولدارىن قاراستىراتىن الاڭعا اينالدى. سونىمەن قاتار Nur Otan Talks اتتى جوبامىزدى دا قايتا جاڭعىرتىپ, ونى جاڭا ەكپىنمەن جۇرگىزۋدى باستاپ وتىرمىز. بۇل جوبانىڭ نەگىزگى ماقساتى – قوعامدا دۇرىس قۇندىلىقتاردى قالىپتاستىرۋعا پارتيا تاراپىنان ۇلەس قوسۋ, – دەدى ماۋلەن اشىمباەۆ.
سونىمەن قاتار م.اشىمباەۆ بارشا قاتىسۋشىلاردى ەلوردامىزدىڭ 20 جىلدىعىمەن قۇتتىقتاپ, ونىڭ بۇكىل قازاقستاندىقتار ءۇشىن ۇلكەن مەرەكە ەكەنىنە نازار اۋداردى. راسىندا استانا – تاۋەلسىزدىك جىلدارىنداعى ەڭ باستى جەڭىسىمىز جانە جەتىستىگىمىز. باس قالامىز تەك اسەم عيماراتتارىمەن عانا ەمەس, سونداي-اق باسەكەگە قابىلەتتى حالقىمەن دە ەرەكشە.
شىن مانىندە, ەلوردامىز تالاي جاننىڭ بيىكتەردى باعىندىرىپ, ارماندارىنا قول جەتكىزۋىندە ۇلكەن ءرول اتقارعانى ءسوزسىز. سوندىقتان مۇندا سونداي جاندار, اتاپ ايتقاندا, تاريحشى, ساياساتتانۋشى, «كيەلى قازاقستان» عىلىمي-زەرتتەۋ ورتالىعىنىڭ جەتەكشىسى بەرىك ابدىعالي ۇلى, قازاقستان رەسپۋبليكاسىنىڭ ەڭبەك سىڭىرگەن قايراتكەرى, «استانا وپەرا» مەملەكەتتىك وپەرا جانە بالەت تەاترىنىڭ جەتەكشى ءسوليسى ءمادينا باسباەۆا, «قاسيەتتى جول» قايىرىمدىلىق قورىنىڭ نەگىزىن قالاۋشىلاردىڭ ءبىرى دينارا زاكيەۆا جانە داڭقتى شاحماتشى, حالىقارالىق گروسسمەيستەر دارمەن سادۋاقاسوۆ جەتىستىك پەن جەڭىس جولىنداعى وزدەرىنىڭ تاريحىن ايتىپ بەردى.
شارا سوڭىندا «اشىق ميكروفون» ايدارى بويىنشا قاتىسۋشىلار سپيكەرلەرگە وزدەرىن تولعاندىرعان سۇراقتارىن قويىپ, ءوز پىكىرلەرىن ءبىلدىردى.
جولدىباي بازار, «ەگەمەن قازاقستان»