2000 جىلى كۇي اتاسى قۇرمانعازىعا ارنالعان ەسكەرتكىشتىڭ اشىلۋ سالتاناتىندا قازاقستاننىڭ حالىق ءارتىسى قارشىعا احمەدياروۆ ەلباسى نۇرسۇلتان ءابىش ۇلى نازارباەۆقا دومبىرا سىيلاعان ەدى. بۇل تۋرالى وبلىستىق تاريحي-ولكەتانۋ مۋزەيىنىڭ بۇرىنعى باسشىسى ناريمان ۇلكەنباي ۇلى ەستەلىگىندە بىلاي دەپ جازعان: «ەلباسى ن.نازارباەۆ اتىراۋعا كەلگەن ساپارىندا ازاتتىق كوشەسىنىڭ بويىنداعى قۇرمانعازى بابامىزعا ارنالعان ەسكەرتكىشتىڭ اشىلۋ سالتاناتىنا قاتىساتىنى جوسپارلانعان ەدى. وسى سالتاناتتى شارادا ءسوز سويلەيتىن قارشىعا احمەدياروۆ كۇنى بۇرىن شەبەر جاقسىلىق وسپانوۆقا ارنايى تاپسىرىس بەرىپ, دومبىرا جاساتتى. ەلباسى كۇي قاعانىنىڭ قولىنان دومبىرانى ريزاشىلىقپەن الىپ, وبلىستىق تاريحي-ولكەتانۋ مۋزەيىنە تاپسىرعان بولاتىن. سودان بەرى قۇندى جادىگەر ەسەبىندە كورمەدەن ورىن الدى».
دومبىرانىڭ بەتىندە «قۇرمەتتى نۇرسۇلتان ءابىش ۇلى! قۇرمانعازى بابامىزدىڭ ارۋاعى قولداسىن! قارشىعا. 4.VII.2000» دەگەن جازۋ بار. «ۇيەڭكى اعاشتىڭ كوپ جىلدىق كەپتىرىلگەن تۇرىنەن جەتى شاناقتى ەتىپ جاسالىپ, سابىنىڭ بەتىنە مايىسپاي, مىقتى بولۋى ءۇشىن قارا اعاشتان جاپسىرما سالىنعان دومبىراعا قىزىعۋشىلىق تانىتاتىندار كوپ», دەيدى مۋزەيدىڭ ءبولىم باسشىسى سۆەتلانا نۇرپەيىسوۆا. جالپى اتىراۋداعى مۋزەيدە قازاقتىڭ ءبىرتۋار ونەرپازدارىنىڭ قولدانعان دومبىرالارى جينالعان ارنايى زال بار. مەملەكەت باسشىسىنىڭ شىلدەنىڭ ءبىرىنشى جەكسەنبىسىن ۇلتتىق دومبىرا كۇنى ەتىپ بەلگىلەۋ تۋرالى جارلىعىنا سايكەس مۋزەيدەگى «ولكە مادەنيەتى جانە ادەبيەتى» زالىندا بىرقاتار شارالار جوسپارلانىپ وتىر. قازاق كۇيىنىڭ قۇدىرەتىن تانىتقان قارشىعا احمەدياروۆتىڭ اتى دا ۇمىتىلماق ەمەس. وتكەن جىلى تۋعان جەرى ماحامبەت اۋدانى تاڭداي اۋىلىنداعى ورتا مەكتەپكە كۇي قاعانىنىڭ ەسىمى بەرىلدى.
اباي ابىلاي ۇلى
اتىراۋ