ادام بالاسىنىڭ ايرىقشا مۇمكىندىگىنە انىقتاما بەرۋگە كەيدە عالىمداردىڭ وزدەرى جاۋاپ تاپپاي قالىپ جاتادى. تسيركتەگى ءبىر ارتىستەر ۇزىندىعى جارتى مەترگە جەتەتىن تىك قىلىشتى ساۋمالاپ وتىرىپ, قۇنداعىنا دەيىن جۇتىپ قويادى. بۇدان وزگە دە ادام ميىنا سىيمايتىن تريۋك ىستەيتىندەر كوپ. ال قىزىلوردا قالاسىنىڭ تۇرعىنى, ەردىڭ جاسى ەلۋدەن مول اسقان نارتاي تۇرسىنوۆتىڭ تسيرككە ەش قاتىسى جوق. نارتايدىڭ كەۋدەسىندە الىپ ءبىر ماگنيت ورنالاسقان سياقتى, تەمىر تاقاساڭ جابىسا قالادى.
سالماعى 95 كيلو تارتاتىن جىگىت اعاسى بۇگىندە توسىمەن 110 كيلوداي تەمىردى جابىستىرىپ كوتەرگەندە ەش اۋىرلىعىن سەزىنبەيدى. بۇل قاسيەتىن جيىرما جىل بۇرىن بايقاعان ەكەن. العاشقىدا قىرىق كيلوعا دەيىن كوتەرىپ جۇرگەن, بۇگىندە ءجۇز كيلودان اسىردى. نارتايدىڭ كەۋدەسىنە تەك تەمىر-تەرسەك قانا جابىسا بەرمەيدى. شىنى ىدىستار مەن پلاستماسسا بۇيىمدار دا تارتىلادى.
نارتاي ءوز قاسيەتىن بويىنداعى بيوتوگىنىڭ ەرەكشە مولدىعىمەن تۇسىندىرەدى. بىراق كەزىندە كەڭەس وداعىن شۋلاتقان بيوتوگى كوپ كاشپيروۆسكي, چۋماك سياقتى ەمشى بولۋعا ىقىلاسى جوق.
قولدىڭ دەمەۋىنسىز ءوز سالماعىنان اساتىن تەمىر-تەرسەكتى توسىمەن كوتەرىپ جۇرگەن ازامات ءوز مۇمكىندىگىن اللا بەرگەن قاسيەت دەپ ۇعادى.
باقتيار تايجان, «ەگەمەن قازاقستان»
قىزىلوردا وبلىسى