قازاق مەملەكەتتىك ۋنيۆەرسيتەتى ۇلكەن ءبىلىم ورداسى عانا ەمەس, جاستارعا زاماناۋي تاربيە بەرىپ, ولاردىڭ بويىنا تاماشا قاسيەتتەردى سىڭىرۋگە تىرىساتىن اسا تاعىلىمدى جوعارى وقۋ ورنى.
جاقىندا سول كەزەڭدە وقۋ بىتىرگەندەرىنە 40 جىل بولعان جۋرناليستيكا فاكۋلتەتىنىڭ ستۋدەنتتەرى كەزدەستى. بۇل كەزدەسۋگە شاقىرىلعان ارىپتەسىمىز, تارازدىق اقىن بايتانعالي تولەنتاەۆ جاستىق شاعىن ەسكە الىپ, بىلاي دەيدى: «مەنىڭ ەسىمدە قالعان ءبىر وقيعا, حالقىمىزدىڭ اياۋلى ۇلى, زيالى قاۋىمنىڭ زەردەلى زەيىن يەسى, م.اۋەزوۆ اتىنداعى اكادەميالىق دراما تەاترىنىڭ عاجايىپ رەجيسسەرى, پروفەسسور اسقار توقپانوۆ اعامەن قىزىقتى كەزدەسۋ وتكەن بولاتىن. تەاتردىڭ تالانتتى تارلانىمەن ۇيىمداستىرىلعان بۇل كەزدەسۋگە فاكۋلتەتتىڭ ستۋدەنتتەرىمەن قاتار وقىتۋشىلارى, جاستار قاتىستى.
اسقار توقپانوۆ ناعىز ونەر ساڭلاعى ەكەن. كەزدەسۋ كەشىندە تەاتر ونەرىنىڭ مانىمەن شىعۋ تاريحىنان باستاپ, ءوزى ەڭبەك ەتىپ جۇرگەن ۇجىمنىڭ ىزدەنىستەرى, قول جەتكەن تابىستارى, ۇلت رۋحىن كوتەرۋدەگى اتقاراتىن قىزمەتى جايلى تەبىرەنە ءسوز سويلەدى. اريستوتەل تەاتر جايلى جان-جاقتى ەڭبەك جازىپتى. ۇلى گەتە «ۇلت بولىپ قالىپتاسۋ ءۇشىن ول حالىقتىڭ تەاترى بولۋى كەرەك», دەپ قالاي ادەمى ايتقان. ۇلى رەجيسسەر ستۋدەنتتەردى تەاترعا كەلىپ تۇرۋعا شاقىردى. اسقار اعانىڭ ناعىز كيەلى ونەر يەسى ەكەنىن بايقاتقان تاعى ءبىر جاي بار ەدى.
ول كىسى قۇستارشا سايراپ, ءتۇرلى قۇستاردىڭ ۇندەرىن ءدال كەلتىرەتىنىن بايقاتتى, دەيدى بايتانعالي. قارلىعاشتىڭ, تورعايدىڭ, قىرعيدىڭ, ءتىپتى كوپ ادام كورە بەرمەيتىن بايعىزدىڭ ۇندەرىن ەستىگەن كەزىمىزدى شىعىس شاھارىنداعى اسەم ءبىر باقتىڭ ىشىندە جۇرگەندەي سەزىنگەن ەدىك.
قىزىعى, وسى كەزدەسۋدە مەن سويلەدىم. كۋراتورىمىز تۇرىمتاي دۇيسەباەۆا اپايىمىز مەنىڭ سويلەۋىمدى ماقۇل كورگەن ەدى, دەيدى اقىن.
– اسقار اعا, ناعىز ونەر يەسى ەكەنسىز, وسىناۋ ونەر جولىندا جاڭا بيىكتەرگە سامعاي بەرىڭىز, – دەپ قۇرمەتتى قوناققا قازاق ۋنيۆەرسيتەتىنە 40 جىل تولۋىنا بايلانىستى جارىق كورگەن ۇلكەن كىتاپتى (1974 جىلى جارىق كورگەن) سىيلادىم. اسقار توقپانوۆ اعا وتە ريزا بولىپ, فاكۋلتەت باسشىلىعىنا ءوز العىسىن جەتكىزدى. ء«بىلىمدى بول, وركەنىڭ ءوسسىن», دەپ ماعان دا جىلى سوزدەرىن ايتتى. سول جولى بولاشاق ءفوتوتىلشى راحىمباي حانالى دوس ءبىزدى سۋرەتكە تۇسىرگەن. ەكى-ءۇش كۇننەن كەيىن ەكى سۋرەتتى شىعارىپ اكەلىپ بەردى. بىرەۋىن اسقار اعامىزعا بەرۋىم كەرەك ەدى... «سول ەكى سۋرەت مەندە ءالى دە ساقتاۋلى, دەيدى بايتانعالي تولەنتاەۆ. – ەندى ەل گازەتى «ەگەمەن قازاقستانعا» ۇسىنامىن».
ساپارباي پارمانقۇل, «ەگەمەن قازاقستان»
الماتى