استانا قالاسىنىڭ 20 جىلدىق مەرەيتويىنا وراي «نۇر وتان» پارتياسى ماڭعىستاۋ وبلىستىق فيليالى «ارداگەرلەردى ارداقتايىق» پارتيالىق جوباسى اياسىندا ماڭعىستاۋ وبلىسىنىڭ ۇلى وتان سوعىسى ارداگەرلەرى جانە تىل ارداگەرلەرىن قۇرمەتتەپ «جەڭىس ەسىمدەرى» اكتسياسىنا بەلسەندى تۇردە اتسالىستى.
وبلىستىڭ 7 اۋماعىنان ارداگەرلەردىڭ باسىنان وتكەن قىزىقتى وقيعالارى جانە ومىرلىك جولى الەۋمەتتىك جەلىلەرگە #جەڭىسەسىمدەرى #ارداگەرلەردىارداقتايىق اتتى حەشتەگتەرمەن جاريالاندى.
اقتاۋ قالالىق «نۇر وتان» پارتياسى فيليالىنىڭ قىزمەتكەرلەرى ۇلى وتان سوعىسى ارداگەرى بوقاەۆ بيسەن راحمەت ۇلىنىڭ ۇيىنە بارىپ, ول باستان وتكەرگەن قيىن-قىستاۋ كەزەڭدەر جونىندە اڭگىمە ءوربىتتى. ارداگەردىڭ ايتۋىنشا ۇلى وتان سوعىسىنىڭ باستالعانىنا جىل تولعاندا جاس جىگىت اسكەر قاتارىنا شاقىرىلىپ, قازاقستان-قىتاي شەكاراسىن كۇزەتەتىن جاركەنت شەكارا وتريادىنا تۇسكەن.
«وسى اسكەري بولىمدە 1944 جىلدىڭ ساۋىرىنە دەيىن قىزمەت ەتىپ, دۋشانبە قالاسىندا جاساقتالعان 22-ءشى شەكارا وتريادىنىڭ ساپىنا الىندىم. مۇندا كىشى سەرجانت قول پۋلەمەتشىسى بولىپ, نەمىس-فاشيست باسقىنشىلارىنان ازات ەتۋگە كۇش جۇمساعان توپپەن بىرگە بولدىم. سول جىلى دنەستردەگى «ياسسى-كيشينەۆتى ازات ەتۋ» وپەراتسياسىنا قاتىسىپ, جان بەرىپ, جان الىسقان شايقاستاردا جۇردىك. شەكاراشىلار بەسسارابيا جەرىندە, دنەستر مەن پرۋت وزەندەرىنىڭ بويىن قورعاۋ ماقساتىندا قالدىرىلدى. بىزگە مۇندا كەڭەس وداعىنىڭ مەملەكەتتىك شەكاراسىن كۇزەتۋ مىندەتى جۇكتەلگەن بولاتىن», دەپ ەسكە الادى ول.
وسىلايشا, قاشان سوعىس اياقتالىپ, ۇلى جەڭىستى شەكارا بويىندا قارسى العان شەكاراشى بيسەن راحمەت ۇلى 1949 جىلى كراسنوۆودسك قالاسىنا ورالادى. ۇلى وتان سوعىسىنىڭ ارداگەرى رەسەي, مولدوۆا, ۋكراينا جەرلەرىن جاۋ قولىنان ازات ەتۋ وپەراتسيالارىنا قاتىسقانى ءۇشىن ماراپاتتالعان. وتباسىندا 2 ۇل, 7 قىز تاربيەلەپ ءوسىردى. ۇزاق جىلدار ساۋدا سالاسىندا قىزمەت اتقارىپ, زەينەتكەرلىككە شىعادى. 1993 جىلى تۋعان وتانىنا ورالىپ, كوڭىلى ورنىنا تۇسكەن بيسەن اتا مەن وعىلحان انا ۇل-قىزدارىنان جيىرماعا جۋىق نەمەرە, شوبەرە ءسۇيىپ وتىر.
سونداي-اق, ەڭبەككە ەرتە ارالاسقان ماڭعىستاۋ اۋدانى تۇرعىنى, تىل ارداگەرى ا. ابىشەۆا, ۇلى وتان سوعىسى ارداگەرلەرى: قاراقيا اۋدانى ارداگەرى قالىباەۆ شارحاتباي, مۇنايلى اۋدانى – ۋتاەۆ ابدۋللا, بەينەۋ اۋدانى – مىلتىق قاراباتىروۆ جانە جاڭاوزەننىڭ تۇرعىنى ەڭسەگەنوۆ كەڭەسباي قاريالار سىنىقتىڭ كوزىندەي ءاردايىم ەستە ۇستاپ قۇرمەتتەپ جۇرۋگە لايىق ەسىمدەر.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى