تورتكۇل دۇنيە كوز تىككەن ءدۇبىرلى دودانىڭ باستالعانىنا دا بىرنەشە كۇن ءوتتى. توپتىق كەزەڭنىڭ ءبىرىنشى تۋرى اياقتالىپ, ۇزدىكتەرى كوشباسشى ورىندارعا جايعاستى. سولاردىڭ ءبىرى – بەلگيا ۇلتتىق قۇراماسى العاشقى ويىنىن ءساتتى وتكىزگەنى بەلگىلى. ال ءارى قاراي جاعداي قالاي ءوربۋى مۇمكىن؟! ەدەن ازار باستاعان قۇرامانىڭ قاۋقارى قانداي؟ ءبىز وسى تۋرالى ءسوز قوزعايتىن بولامىز.
بەلگيا دوپ دوداسىنا 13-رەت قاتىسىپ وتىر. بۇل قۇراما و باستا ءدۇيىم جۇرتقا «قىزىل سويقاندار» دەگەن لاقاپ اتپەن تانىلعان ەكەن. ءيا, بۇل اتاۋ جۇرت بىلەتىن «مانچەستەر يۋنايتەدكە» ەمەس, ءدال وسى بەلگيا ۇجىمىنا تيەسىلى بولاتىن. رەسمي دەرەكتەرگە جۇگىنسەك ونى 1906 جىلى بەلگيانىڭ فرانتسيا مەن نيدەرلاندىنى جەڭىپ, سەنساتسيا جاساعانىنان كەيىن جۋرناليست پەر ۆالكەر ويلاپ تاۋىپتى. ونىڭ ۇستىنە كوماندانىڭ جەيدەسى قىزىل ءتۇستى بولعانى دا بۇل اتاۋعا مۇرىندىق بولعان كورىنەدى.
بەلگيا بيىلعى الەم چەمپيوناتىنىڭ فاۆوريتتەرىنىڭ ءبىرى ەكەنى داۋسىز. قۇراما ويىنشىلارىنا كوز جۇگىرتسەك ارقايسىسى قارت قۇرلىقتىڭ مەن دەگەن كلۋبتارىندا ونەر كورسەتەدى. ەدەن ازار, رومەلۋ لۋكاكۋ, كەۆين دە بريۋينە, ميشي باتشۋاي, ۆەنسان كومپاني, تيبو كۋرتۋا... ايتا بەرسەك كەتە بەرەدى. بەلگيانىڭ «التىن بۋىنى» ءپىسىپ جەتىلگەن شاق.
2014 جىلعى دوپ دوداسىندا تاجىريبەسىنىڭ ازدىعىنان ارگەنتينا قۇراماسىنا ەسە جىبەرگەنى بەلگىلى. سول تۇستاعى ويىنشىلارعا ءمان بەرسەك, ەدەن ازار 23 جاستا, رومەلۋ لۋكاكۋ 21-دەن ەندى اسقان, كۋرتۋا 22-دە, باتشۋاي ءتىپتى الەم چەمپيوناتىنا شاقىرتۋ الماعان. ال بۇل جولعى «قىزىل سويقانداردىڭ» ءجونى مۇلدەم بولەك. كەمەلدەنگەن شاعىنا جەتكەن, ارقايسىسى «سەن تۇر, مەن اتايىن» دەگەن جىگىتتەر. نەگىزگى قۇرامداعىلاردىڭ ءبىرى جاراقات الىپ قالسا, ورنىن جوقتاتپايتىن ويىنشىلار جەتەرلىك. بىلىكتى ويىنشىلارىنىڭ كوپتىگى سونداي, ءتىپتى رادجا ناينگگولان سەكىلدى ورتالىق جارتىلاي قورعانىستا ويقاستايتىن ماڭىزدى ويىنشىسىن الەم بىرىنشىلىگىنە الماي كەتتى. وسىعان قاراپ-اق روبەرتو مارتينەس شاكىرتتەرىنىڭ الەۋەتىن اڭعارۋعا بولاتىنداي.
«التىن بۋىننىڭ» سىنالار سىن ساعاتى كەلىپ جەتتى. «قىزىل سويقاندار» چەمپيوندىق اتاققا باستى ۇمىتكەرلەردىڭ ءبىرى ەكەنىن جوققا شىعارۋ مۇمكىن ەمەس, بىراق ولارعا ارگەنتينا, برازيليا, گەرمانيا ۇجىمدارى سەكىلدى ۇلكەن قىسىم كورسەتىلمەيدى. قىسىمنىڭ ازدىعىن ۇتىمدى پايدالانىپ, الىسقا شابۋعا مۇمكىندىك بار. بىراق وسىعان دەيىنگى الەم, ەۋروپا بىرىنشىلىكتەرىندەگىدەي شيرەك فينالعا جەتىپ توقمەيىلسۋگە بولمايدى. ۇزدىكتەردەن قۇرالعان قۇراماعا جانكۇيەر تاراپى كەم دەگەندە ۇزدىك ۇشتىككە ەنۋدى مىندەتتەيتىنى انىق.
«التىن بۋىن» دەمەكشى, ءبىر كەزدەرى انگليا قۇراماسى دا نەبىر تالانتتارعا تولى ەدى. بىراق دەۆيد بەكحەم, مايكل وۋەن, فرەنك لەمپارد, ستيۆەن دجەرارد سەكىلدى مارقاسقالارعا تولى ۇجىم ەشبىر دودادا جارىتىپ ناتيجە كورسەتە المادى. 2002 جىلدان بەرگى الەم, ەۋروپا چەمپيوناتتارىندا شيرەك فينالدان اسىپ ارىگە بارا العان ەمەس. بەلگيا دا ازىرگە ءدال وسى اعىلشىنداردىڭ ءساتسىز جولىمەن كەلەدى. 2014 جىلعى الەم چەمپيو- ناتىندا دا, 2016 جىلعى قۇرلىق دوداسىندا دا شيرەك فينالدا ءسۇرىندى.
بەلگيا توپتىق كەزەڭنىڭ العاشقى كەزدەسۋىن 18 ماۋسىم كۇنى پاناما قۇراماسىنا قارسى وتكىزىپ, 3:0 ەسەبىمەن جەڭىسكە جەتتى. ماتچتا دريس مەرتەنس 47-مينۋتتا ەسەپ اشسا, «مانچەستەر يۋنايتەد» شابۋىلشىسى رومەلۋ لۋكاكۋ 69, 75-مينۋتتاردا باسىمدىقتى ارتتىردى. ەندى توپتىق كەزەڭدەگى كەلەسى ماتچىن وسى ايدىڭ 23 كۇنى تۋنيسكە قارسى وتكىزەدى. ال سوڭعى بولىپ 29 ماۋسىم كۇنى اعىلشىندارعا قارسى كەزدەسۋ كۇتىپ تۇر.
ايان ءابدۋالي, «ەگەمەن قازاقستان»