كەشە ۇبت ءبىرىنشى كۇنىنىڭ قورىتىندىسى شىعارىلدى. «ۇلتتىق تەستىلەۋ ورتالىعى» رمقك ديرەكتورى رامازان الىمقۇلوۆتىڭ ايتۋىنشا, 20 ماۋسىم كۇنى ەلىمىز بويىنشا 13 897 تۇلەك ۇلتتىق بىرىڭعاي تەستىلەۋگە قاتىسقان. العاشقى كۇننىڭ قورىتىندىسىنا سايكەس, 11 795 تۇلەك شەكتى ماننەن, ياعني 50 بالدان ارتىق جيناعان.
«بۇل – جالپى قاتىسۋشىلاردىڭ 84,8 پايىزى. ال 50 بالدى الماعانداردىڭ سانى – 2 102. بۇل جالپى تاپسىرۋشىلاردىڭ 15,2 پايىزى. شەكتى بالدى جيناي الماعان تۇلەكتەر تامىز ايىندا قايتا تاپسىرادى. ەگەر تامىز ايىنداعى سىناقتان دا سۇرىنەتىن بولسا, وندا وقۋ ءبىتىرۋشى تۇلەكتىڭ قىركۇيەك ايىندا اقىلى تۇردە ءبىر سەمەسترگە وقۋعا تاپسىرۋىنا بولادى. ءبىر سەمەستردەن كەيىن قاڭتار ايىندا ءۇشىنشى رەت تاپسىرۋعا مۇمكىنشىلىگى بار. جانە دە ايتا كەتەتىن تاعى ءبىر جايت, قاجەتتى بالدى جيناي الماعان تۇلەكتەرمەن, ولاردىڭ اتا-انالارىمەن ءبىزدىڭ پسيحولوگ ماماندار جۇمىس ىستەپ, كەرەكتى كەڭەستەرىن بەرۋدە», دەدى ول.
اتالعان جاڭاشىلدىقتىڭ ناتيجەسىندە 2017 جىلى ەلىمىز بويىنشا 30 مىڭداي ادام جوعارى وقۋ ورنىنا تۇسۋگە مۇمكىندىك العان.
«ۇبت-نىڭ العاشقى كۇنىندە 33 تەستىلەۋ پۋنكتى جۇمىس ىستەدى. جالپى, تەست تاپسىرۋعا 14 250 تۇلەك ءوتىنىش بەردى. ولاردىڭ ناقتى تاپسىرىپ شىققانى – 13 897. بۇل – ءوتىنىش بەرگەن تۇلەكتەر سانىنىڭ 97,5 پايىزى. ءبىر تۇلەكتىڭ ناتيجەسى ەسەپكە الىنبادى. وقيعا ەلىمىزدىڭ وڭتۇستىك وڭىرىندە تىركەلدى. ول تەست تاپسىرۋ ەرەجەلەرىن بۇزعان», دەدى ر.الىمقۇلوۆ.
بەس ءپان بويىنشا رەسپۋبليكاداعى ورتاشا بالل 80,9 پايىزدى كورسەتكەن. «بۇل وتكەن جىلعى ۇبت-نىڭ ءبىرىنشى كۇنىنىڭ قورىتىندىسىمەن سالىستىرعاندا 4 بالعا ارتىق. ەسكە سالا كەتەيىك, بىلتىر ءبىرىنشى كۇننىڭ قورىتىندىسى بويىنشا رەسپۋبليكاداعى ورتاشا بالل 77,5-ءتى قۇراعان ەدى. تەستىلەۋدىڭ العاشقى كۇنى تىركەلگەن ەڭ جوعارى بالل – 138. ازىرشە 140 ۇپايدىڭ ءبارىن جيناعان وقۋشى تىركەلمەدى. الداعى كۇندەرى ەڭ جوعارى بالدى جينايتىن شاكىرتتەرىمىز شىعادى دەپ سەنەمىز», دەدى ر.الىمقۇلوۆ.
سونىمەن قاتار قازاقستان بويىنشا 46 تۇلەك تەستى اعىلشىن تىلىندە تاپسىرۋعا ءوتىنىش بەرگەنىمەن, ولاردىڭ بىرەۋى عانا ءوز تاڭداۋىن وزگەرتپەگەن. اعىلشىن تىلىندە تاپسىرعان تۇلەك – الماتى قالاسىنىڭ وكىلى ەكەنىن ايتا كەتسەك دەيمىز.
«كولل-ورتالىققا 105 قوڭىراۋ كەلىپ ءتۇستى. ولاردىڭ كوبى – ۇبت-نى وتكىزۋ ەرەجەسىنە قاتىستى شالىنعان قوڭىراۋلار. بيىلعى جاڭاشىلدىقتىڭ ءبىرى – تەستىلەۋ بارىسىن ونلاين-رەجىمدە باقىلاۋ. وسى ورايدا, اۋديتوريالاردىڭ 85 پايىزى بەينەباقىلاۋ كامەرالارىمەن جابدىقتالعانىن اتاپ وتكەن ءجون. العاشقى كۇننىڭ قورىتىندىسى بويىنشا اپەللياتسيالىق ورگانعا ءوتىنىش بەرگەندەر بولعان جوق», دەدى ۇلتتىق تەستىلەۋ ورتالىعىنىڭ ديرەكتورى. ونىڭ سوزىنشە, اپەللياتسيالىق ورگانعا ءوتىنىش بەرگىسى كەلگەن تۇلەك تەست تاپسىرعان كۇننىڭ ەرتەڭىندە تۇسكى 13:00-گە دەيىن ۇلگەرۋى كەرەك.
راۋان قايدار, «ەگەمەن قازاقستان»