بۇگىنگى تاڭدا وتاندىق مەديتسينا دامىپ, الەمنىڭ دامىعان ەلدەرىمەن باسەكەلەسە الاتىنداي دارەجەگە جەتتى. ارينە مەديتسينا عىلىمىنىڭ قارىشتاپ دامۋى ازاماتتاردىڭ دەنساۋلىعىن نىعايتۋعا ۇلكەن سەپتىگىن تيگىزەتىنى انىق.
قازىرگى كەزدە قاۋىپتى قاتەرلى دەرتتەردىڭ الدىن الۋ, ونى بولدىرماۋ شارالارى ەلىمىزدە جوعارى دارەجەدە قولعا الىندى. سونىمەن قاتار, اعزا اۋىستىرۋ جۇمىستارى دا ءوز كەزەگىندە بيىك دەڭگەيدە اتقارىلىپ كەلەدى.
ترانسپلانتاتسيا – بۇگىندە حيرۋرگيانىڭ ايتۋلى جەتىستىگى رەتىندە بەلگىلى. ەلىمىز بويىنشا وسى ۋاقىتقا دەيىن تاراز قالاسىندا تۇرعىندارعا كارديوحيرۋرگيالىق كومەكتەر كورسەتىلىپ كەلدى. بۇل جۇمىستاردىڭ ءبارى دە ءساتتى بولعان بولاتىن. وسى ورايدا تاراز قالاسىنداعى پروفەسسور سەيىتحان جوشىباەۆ باسقاراتىن «كارديوحيرۋرگيا جانە ترانسپلانتولوگيا عىلىمي-كلينيكالىق ورتالىعىنىڭ» اتقارىپ وتىرعان جۇمىسى از ەمەس. اتالعان كلينيكا ماماندارىنىڭ ون جىلدىق تىنىمسىز ىزدەنىستەرىنىڭ ناتيجەسىندە وڭىردە جۋىردا بۇيرەك الماستىرۋ وتاسى ءساتتى جاسالدى.
بۇل – تاراز قالاسىندا تۇڭعىش رەت جاسالعان بۇيرەك الماستىرۋ وتاسى. وتا جامبىلدىق ازامات ەرلانعا جاسالدى. ەرلاننىڭ اعاسى رۋسلان ىنىسىنە ءبىر بۇيرەگىن بەرىپ, باۋىرمالدىقتىڭ, ازاماتتىقتىڭ ناعىز ۇلگىسىن تانىتتى. ەرلان ءبىر ءۇيدىڭ كەنجە ۇلى ەكەن. وكىنىشكە قاراي, ول 2007 جىلدان بەرى بۇيرەك اۋرۋىنىڭ زاردابىن تارتىپ كەلەدى. ناۋقاستىڭ اناسى ميرا كەرىتباەۆانىڭ ايتۋىنشا, ءتىپتى سوڭعى ۋاقىتتا ەرلاننىڭ ەكى بۇيرەگى بىردەي جۇمىس ىستەمەي قالىپتى. قىس بويى ايىنا بىرنەشە رەت اۋرۋحاناعا جاتىپ, گەمودياليز ارقىلى ەم دە قابىلداعان ەكەن. بۇعان قوسا قان قىسىمى كوتەرىلىپ كەتە بەرەتىندى شىعارادى. ءسويتىپ جۇرگەندە, دارىگەرلەر تاراز قالاسىنداعى «كارديوحيرۋرگيا جانە ترانسپلانتولوگيا عىلىمي-كلينيكالىق ورتالىعىنا» قارالۋعا كەڭەس بەرەدى. ال اتالعان كلينيكانىڭ ماماندارى ەرلانعا بۇيرەك الماستىرۋ وتاسىن جاساۋ قاجەتتىگىن, الايدا وعان دونور كەرەك ەكەنىن ەسكەرتەدى. وسى كەزدە ەكىباستۇز قالاسىندا جۇمىس ىستەيتىن اعاسى رۋسلان ۇيىنە كەلىپ, باۋىرىنىڭ جاعدايىن كورگەن سوڭ ءبىر بۇيرەگىن ىنىسىنە بەرۋگە شەشىم قابىلدايدى. ناتيجەسىندە ەرلانعا وتا ءساتتى جاسالدى.
وپەراتسيانى قازاقستان رەسپۋبليكاسىنىڭ اعزالاردى ترانسپلانتتاۋ جونىندەگى ۇلتتىق ۇيلەستىرۋشىسى جاقسىلىق دوسقاليەۆ جاسادى. بۇيرەك الماستىرۋ وتاسىن كورشى قىرعىز رەسپۋبليكاسىنان جانە ەلىمىزدىڭ وزگە دە وڭىرلەرىنەن كەلگەن حيرۋرگتار تىكەلەي ترانسلياتسيا ارقىلى كورۋ مۇمكىندىگىنە يە بولىپ, ءوزارا تاجىريبە الماستى. جاقسىلىق دوسقاليەۆتىڭ ايتۋىنشا, جامبىل ءوڭىرى بويىنشا قازىرگى كەزدە 100 ادام دونور بۇيرەگىن كۇتۋدە ەكەن. شىنىندا دا ناۋقاستىڭ جاعدايىن ءتۇسىنىپ, وعان دونور بولۋ وڭاي ەمەس. ول ءۇشىن جۇرەك پەن جىگەر كەرەك. ال رۋسلاننىڭ بۇل ەرلىگى وزگە ازاماتتارعا دا ۇلگى ارينە.
ءساتتى وتادان كەيىن قازاقستان كارديوحيرۋرگتەرى جالاۋىنىڭ كوتەرىلۋىنە ارنالعان جيىن ءوتىپ, پروفەسسور سەيىتحان جوشىباەۆ ترانسپلانتاتسيانى جاساۋ ءۇشىن كوپتەگەن دايىندىق جۇمىستارىنىڭ جۇرگىزىلگەنىنە توقتالدى. بۇگىنگى تاڭدا اۋەلى كارديوحيرۋرگيالىق ورتالىق بولىپ اشىلعان ەمدەۋ مەكەمەسى از ۋاقىتتىڭ ىشىندە ترانسپلانتولوگيالىق عىلىمي-كلينيكا دەڭگەيىنە كوتەرىلدى. ءوز سوزىندە جاقسىلىق دوسقاليەۆ ترانسپلانتاتسيا وتاسىن جاساۋعا اتالعان مەكەمەنىڭ ماتەريالدىق-تەحنيكالىق بازاسىنىڭ ساي ەكەنىن ايتسا, قىرعىز رەسپۋبليكاسى, تالاس وبلىستىق اۋرۋحاناسى باس دارىگەرىنىڭ ورىنباسارى الماس اسىنباەۆ جوعارى دەڭگەيلى كلينيكادا اعزا الماستىرۋ وتاسىنىڭ ءساتتى جۇزەگە اسقانىن جوعارى جەتىستىك رەتىندە باعالادى. سونىمەن قاتار, جامبىل وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى حاميت مىرزاقاسىموۆ, مەديتسينا عىلىمدارىنىڭ دوكتورى ساعىندىق وردابەكوۆ ترانسپلانتاتسيالىق وتانىڭ ءساتتى جاسالۋى جامبىل ءوڭىرى عانا ەمەس, ەلىمىز ءۇشىن دە ەلەۋلى وقيعا ەكەنىن جەتكىزدى.
حاميت ەسامان,
«ەگەمەن قازاقستان»
جامبىل وبلىسى