پاۆلوداردا «پوبەدا» جشس-دە دۋالدى ءبىلىم بەرۋ ورتالىعى اشىلدى

اگروتەحنولوگيا  فاكۋلتەتىنىڭ فيليالى رەتىندە جۇمىس ىستەيتىن «اۋىل شارۋاشىلىق ماماندىقتارىنا ارنالعان دۋالدى ءبىلىم بەرۋ وقۋ ورتالىعى» سەرىكتەستىك ديرەكتورى الەكساندر پولياكوۆ پەن فاكۋلتەت دەكانى, پروفەسسور توقتار بەكسەيىتوۆتىڭ باستاماسىمەن اشىلدى. بۇل كۇنى ورتالىقتا «مال شارۋاشىلىعى ونىمدەرىن ءوندىرۋ تەحنولوگياسى» ماماندىعى بويىنشا ءبىلىم الاتىن ستۋدەنتتەر اۋىلعا كەلىپ, ديپلومدىق جۇمىستارىن قورعادى.

وڭىردەگى «پوبەدا» جشس- وركەنيەت جولىنا  تۇسكەن جاڭاشىل, دامىعان كاسىپورىن. ءبىز دە  سەرىكتەستىكتى ارالاپ كوردىك.  كاسىپورىن جاڭاشىل تەحنولوگيالار مەن زاماناۋي قۇرالدارمەن جۇمىس جاساۋدا. مال ازىعىن ازىرلەۋ ءۇردىسى تولىق اۆتوماتتاندىرىلعان.

- وقۋ ورتالىعىندا جىل بويى 10-15 ستۋدەنتتەن تۇراتىن توپتار ءبىلىم الادى. وقۋ  بارىسىندا جاستارعا تەوريالىق ءبىلىم بەرۋ ۇردىسىنە وقىتۋشىلار قاتىسىپ, تاجىريبەلىك جاعىنان كاسىپورىن ماماندارى ۇيرەتەدى. ستۋدەنتتەر ءۇشىن تۇرمىستىق جاعدايلار جاسالعان, سىنىپتار دايىن, جاتتاقحانا بار,- دەيدى توقتار بەكسەيىتوۆ.

ۋنيۆەرسيتەتتىڭ اگروتەحنولوگيالىق فاكۋلتەتى اۋىل شارۋاشىلىعى عىلىمى مەن ءبىلىم بەرۋدە كاسىبي مامانداردى دايىندايدى. فاكۋلتەت اۋىل شارۋاشىلىعى ونىمدەرىن قايتا وڭدەۋ مەن ءوندىرۋ سالاسىنا ارنالعان بەس ماماندىق ءتۇرىن دايارلايدى.

ورتالىقتىڭ  اشىلۋىنا, ەلىمىزدىڭ اۋىل شارۋاشىلىعى مينيسترلىگىنىڭ «ۇلتتىق اگرارلىق  عىلىمي-ءبىلىم بەرۋ ورتالىعىنىڭ» ءبىلىم بەرۋ دەپارتامەنتىنىڭ ديرەكتورىنىڭ مىندەتىن اتقارۋشى, پروفەسسور باقىت ناسىرحانوۆا  قاتىستى.

- بۇل بۇگىنگى كۇننىڭ تالابى ءبىلىم, عىلىم جانە ءوندىرىستى ۇشتاستىرۋ دەگەن ماقساتتىڭ ناقتى جۇزەگە اسۋى دەگەن ءسوز.  اۋىلداعى «پوبەدا» جشس-تە اشىلعان اگرارلىق وقۋ ورتالىعىنىڭ  اشىلۋى وزگەلەرگە دە قاجەت دەپ ويلايمىن. جاستاردى  اۋىلعا, اۋىل شارۋاشلىق سالاسىن ەڭبەك ەتۋگە شاقىرۋمىز ءۇشىن وسىنداي جاقسى باستامالار,  وركەنيەتتى جوبالار جاساۋىمىز كەرەك,-دەيدى باقىت ناسىرحانوۆا.

فاريدا بىقاي,

«ەگەمەن قازاقستان»

پاۆلودار وبلىسى,

شارباقتى  اۋدانى,

ورلوۆكا اۋىلى

سۋرەتتەردى تۇسىرگەن رۋفينا تورپيششەۆا