قر ينۆەستيتسيالار جانە دامۋ ءمينيسترى جەڭىس قاسىمبەك كەشە جامبىل وبلىسىندا بولعان پويىز اپاتىنا بايلانىستى پىكىر ءبىلدىردى.
«كوميسسيا وقيعا ورنىندا جۇمىس ىستەپ جاتىر. تاڭەرتەڭنەن بەرى ەكسپەريمەنتتىك شارالار جۇرگىزىلدى. ويتكەنى باق-تا ءتۇرلى نۇسقالار جاريالانۋدا. وسىعان وراي بۇگىنگى ەكسپەريمەنت بارىسىندا پويىزداردىڭ جاناما سوقتىعىسۋى راستالمادى. قازىرگى كەزدە بارلىق سەبەپتەر انىقتالۋدا», - دەدى ۆەدومستۆو باسشىسى.
سونىمەن قاتار مينيستر تەمىرجول بويىنداعى قوزعالىس قالپىنا كەلتىرىلگەنىن ەسكە سالىپ ءوتتى. ونىڭ ايتۋىنشا, پويىز اپاتىنىڭ ءمان-جايىنا قاتىستى جانە وزگە سۇراقتارعا بايلانىستى ارنايى ءباسپاسوز ءماسليحاتى وتەدى. «زارداپ شەككەندەر مەن قازا بولعان ادامعا قاتىستى وتەماقى بويىنشا شەشىم قتج-مەن بىرلەسە جاسالادى. جالپى, تەكسەرۋ شارالارى ءتيىستى ۋاقىتتى قاجەت ەتەدى», - دەدى جەڭىس قاسىمبەك.
مۇنىمەن قوسا ول كوميسسيا وكىلدەرى پويىز ءماشينيسىنىڭ ءىس-قيمىلدارىنا دا باعا بەرەتىنىن جەتكىزدى. «كەز كەلگەن كولىك قۇرالى, ياعني تەمىرجول جولاۋشىلار قۇرامى مىندەتتى تۇردە قاجەتتى جوندەۋ جۇمىستارىمەن جانە باسقا دا شارالارمەن قامتىلادى. اتاپ ايتقاندا, بۇل تالاپتار قاتاڭ تۇردە ورىندالادى. ەگەر دە پويىز جولعا شىقسا, وندا وسى كولىك تەحنيكالىق تۇرعىدا دۇرىس بولعانىن بىلدىرەدى», - دەدى ج. قاسىمبەك.
ەسكە سالايىق, كەشە استانادان الماتىعا بارا جاتقان جولاۋشىلار پويىزى اپاتقا ۇشىراپ, ءبىر ادام قازا تاپقان بولاتىن.