سوڭعى كەزدەگى مەنينگيت قاۋپى قازاقستاندىقتاردىڭ ايتارلىقتاي الاڭداۋشىلىعىن تۋعىزدى. وسىعان وراي وتكەن اپتادا دەنساۋلىق ساقتاۋ ءمينيسترىنىڭ ورىنباسارى ءلاززات اقتاەۆا الماتى قالاسىنىڭ مەديتسينالىق نىساندارىن ارالاپ, دۇرلىگۋگە نەگىز جوقتىعىن, بارلىق مەكەمەلەر شتاتتىق رەجىمدە جۇمىس ىستەپ تۇرعاندىعىن, ءدارى-دارمەك قورىنىڭ جەتكىلىكتى ەكەندىگىن, ەڭ باستىسى, اۋرۋدىڭ الدىن الۋ شارالارىنان تىس قالماۋ كەرەكتىگىن جەتكىزگەن بولاتىن. ال قوعامدىق دەنساۋلىق ساقتاۋ كوميتەتىنىڭ توراعاسى جانداربەك بەكشيننىڭ مالىمدەۋىنشە, بيىل ەلىمىزدە مەنينگوكوكك جۇقپاسىنا شالدىققان 62 جاعداي تىركەلگەن ەكەن.
ونىڭ ىشىندە 8 جاعداي ولىممەن اياقتالعان. مارقۇم بولعانداردىڭ ەكەۋى الماتى وبلىسىنىڭ, ەكەۋى وڭتۇستىك قازاقستان وبلىسىنىڭ تۇرعىندارى. ج.بەكشيننىڭ ايتۋىنشا, اۋرۋدىڭ ولىممەن اياقتالۋىنا ناۋقاستاردىڭ مەنينگيت ابدەن مەڭدەگەنشە ەلەمەي, دارىگەرلەرگە قارالماي ءجۇرىپ الۋى سەبەپ بولعان. ماسەلەن, قازاق كولىك جانە كوممۋنيكاتسيا اكادەمياسىنىڭ ستۋدەنتى 3-4 كۇن بويى اۋىرسا دا, دارىگەرگە تەكسەرىلمەي جاتاقحانادا جاتا بەرگەن. ال تەكسەرىلگەن كەزدە كەش بولعان, اۋرۋ اسقىنىپ كەتكەن. قاتەرلى جۇقپانىڭ تارالۋ وقيعاسى نەگىزىنەن الماتى قالاسى مەن شىعىس قازاقستان, وڭتۇستىك قازاقستان جانە الماتى وبلىستارىندا, سونداي-اق استانا قالاسىندا دا بايقالدى. الماتى قالاسىنىڭ وزىندە 29 ادامدا اتالعان اۋرۋ انىقتالدى. ناۋقاستارمەن بايلانىستا بولعان 2200 ادام دارىگەرلەردىڭ قاداعالاۋىنا الىندى. ولاردىڭ ىشىندە 2 تاسىمالداۋشى مەن 3 اۋرۋعا شالدىققان ادام انىقتالدى. ال 2017 جىلى قازاقستاندا مەنينگوكوكك جۇقپاسىنان 11 ادام كوز جۇمعان بولاتىن. بىلتىر بۇل جۇقپاعا شالدىققانداردىڭ دەنى وڭتۇستىك قازاقستان وبلىسىنىڭ تۇرعىندارى ەدى.
باس مەملەكەتتىك سانيتار ج.بەكشين سوڭعى كەزدەگى مەنينگيتتىڭ تارالۋىن اۋرۋدىڭ بەلگىلەرى بىلىنبەي, بىراق جۇقپالى دەرتتى تاراتۋشىلاردىڭ سانى ارتقاندىعىمەن جانە اۋا رايىنىڭ قۇبىلمالىلىعىمەن بايلانىستىرادى. كۇنى كەشە استانا قالاسىندا بالالار ينفەكتسياسى اۋرۋحاناسىندا مەنينگوكوكك جۇقپاسى دياگنوزىمەن ەمدەلىپ جاتقان بالا تۋرالى اقپارات تا جۇرتشىلىق كوكەيىندەگى كۇدىكتى ۇلعايتا تۇسكەندەي. ءۇش جاستاعى بالا ءبىرشاما ۋاقىتىن الماتى قالاسىندا وتكىزىپ, استاناعا 24 مامىردا كەلگەن ەكەن.
قالالىق بالالار ينفەكتسياسى اۋرۋحاناسى باس دارىگەرىنىڭ ەمدەۋ ءىسى جونىندەگى ورىنباسارى ولگا پۋشكارەۆانىڭ ايتۋىنشا, بالانىڭ جاعدايى اۋىر, بىراق تۇراقتى. ءبۇلدىرشىندى امان الىپ قالۋعا اتا-اناسىنىڭ دەر كەزىندە كومەككە جۇگىنۋى مەن دارىگەرلەردىڭ دياگنوزدى تەز انىقتاۋى مۇمكىندىك بەردى. بالا جەكە جاتقىزىلعانىمەن, دارىگەرلەر شتاتتىق رەجىمدە جۇمىستارىن جالعاستىردى. ياعني تۇمشالانىپ, ساقتىق شارالارىن كۇشەيتۋدىڭ قاجەتتىلىگى جوق. ويتكەنى بۇل جۇقپانىڭ قوزدىرعىشى سىرتقى ورتادا تۇراقسىز بولىپ كەلەدى.
استانا قالالىق قوعامدىق دەنساۋلىق ساقتاۋ دەپارتامەنتىنىڭ ەپيدەميالىق قاداعالاۋ ءبولىمىنىڭ باس مامانى اقمارال مەيىرمانوۆا ەلوردادا جىل باسىنان بەرى بالالار اراسىنداعى مەنينگوكوكك جۇقپاسى ءبىرىنشى رەت تىركەلگەنىن ايتادى. ال ەرەسەكتەر اراسىندا 4 جاعداي تىركەلىپ, بارلىعى قۇلانتازا جازىلعان. قالالىق بالالار ينفەكتسياسى اۋرۋحاناسىنىڭ بالالار جۇقپالى اۋرۋلارى كافەدراسىنىڭ دوتسەنتى اننا برينستەر دياگنوزدىڭ اسقىنباي تۇرىپ قويىلۋىنىڭ ارقاسىندا ەشقانداي ماسەلە تۋماعانىن جەتكىزدى. سوندىقتان العاشقىدا تۇماۋ, باس اۋرۋ, السىزدىك سياقتى جەڭىلدەۋ بەلگىلەر بايقالسا-اق دارىگەرگە جۇگىنۋ قاجەت.
دۋمان اناش,
«ەگەمەن قازاقستان»