وتكەن اپتانىڭ سوڭىندا ورتالىق كوممۋنيكاتسيالار قىزمەتىندە الماتى وبلىسىنىڭ اكىمى اماندىق باتالوۆتىڭ قاتىسۋىمەن «رۋحاني جاڭعىرۋ» باعدارلاماسى اياسىندا وڭىردە اتقارىلىپ جاتقان شارالار تۋرالى ءباسپاسوز ءماسليحاتى ءوتتى.
– ەلباسىمىزدىڭ «رۋحاني جاڭعىرۋ» باعدارلاماسىن جەتىسۋلىقتار جىلى قابىلداپ, تەك وسى ماقساتتا ارنايى جۇمىس توبى قۇرىلىپ, باعىتىمىز ايقىندالدى. وتكەن جەلتوقسان ايىندا رەسپۋبليكادا ءبىرىنشى بولىپ وبلىس ورتالىعىندا «رۋحاني جاڭعىرۋ» ورتالىعىن اشتىق, – دەپ ءماسليحاتتىڭ شىمىلدىعىن سۇيىنشىلەي تۇرگەن اماندىق عابباس ۇلى اڭگىمەسىن تومەندەگىشە جالعادى: «باعدارلاما اياسىندا قاراساي اۋدانىندا تۇڭعىش پرەزيدەنت – ەلباسىنىڭ «اتامەكەن» تاريحي-مادەني ورتالىعى, «باتىر بابالار» مۋزەيى جاڭادان سالىنىپ, ىسكە قوسىلدى. «رۋحاني قازىنا», «تاربيە جانە ءبىلىم», «اتامەكەن», «اقپارات تولقىنى» سياقتى كىشى باعدارلامالار نەگىزىندە 308 جوبا جاسالىپ, ولاردى جۇزەگە اسىرۋعا 37,1 ميلليارد تەڭگە قاراجات جۇمسالادى. ونىڭ ىشىندە 9,4 ميلليارد تەڭگە دەمەۋشىلەر ەسەبىنەن تولىقتى».
جالپى العاندا, وبلىس بويىنشا جوعارىداعى باعدارلاما وتكەن جىلى 8 مىڭ ءىس-شارا وتكىزىلىپ, وعان 1 ميلليون ادام تارتىلعان. ولاردىڭ قاتارىندا ونەر ۇجىمدارىنىڭ قايىرىمدىلىق كونتسەرتتەرى, دوڭگەلەك ۇستەلدەر, كونفەرەنتسيالار, مادەني بايقاۋلار جانە تاعى باسقا شارالار بار.
وسىندا اتقارىلعان جۇمىستاردىڭ بارلىعى حالىققا بۇقارالىق اقپارات قۇرالدارى ارقىلى جەتكەن. ناقتىراق ايتقاندا, «رۋحاني جاڭعىرۋ» باعدارلاماسى تۋرالى وبلىستىق بۇقارالىق اقپارات قۇرالدارىندا 8 773 ماقالا جارىق كورىپتى. تەك وتكەن جىلى وڭىرلىك كوممۋنيكاتسيالار قىزمەتىندە باق وكىلدەرى قاتىسقان 59 بريفينگ وتكەن.
«رۋحاني قازىنا» كىشى باعدارلاماسى اياسىندا وڭىردە 243 مادەنيەت ءۇيى كۇردەلى جوندەۋدەن وتكىزىلىپ, ونىڭ 7-ەۋىنە وتكەن جىلى, 13-ىنە بيىلعى جىلى جوبالاۋ-سمەتالىق قۇجات ازىرلەندى. «تۋعان جەر» جوباسى شەڭبەرىندە وتكەن جىلى جالپى سوماسى 17,7 ميلليارد تەڭگە بولاتىن 193 جوبا جۇزەگە اسىرىلسا, «وتانىم – تاعدىرىم» باعدارلاماسىمەن 397,3 ميلليون تەڭگەلىك 16 جوبا, «ولكەتانۋ» باعدارلاماسىمەن 24,4 ميلليون تەڭگەلىك 8 جوبا, «سانالى ازامات» باعدارلاماسىمەن 456,7 ميلليون تەڭگەلىك 16 جوبا ىسكە استى», دەدى وبلىس اكىمى.
سونىمەن قاتار ولكە تاريحىن تانىستىراتىن «كيەلى ورىنداردىڭ ەلەكتروندى كارتاسى» جاسالىپ, وعان ايماق اۋماعىنداعى 2 343 ەسكەرتكىش كىرسە, بۇلاردىڭ ىشىنەن 58 نىسان ىرىكتەلىپ الىنىپ, 17-سىنە رەسپۋبليكالىق, 41-ىنە ايماقتىق مارتابە بەرىلگەن ەكەن.
وبلىستا ورىندالىپ جاتقان كەلەسى ءبىر يگى شارۋا – وربۇلاق شايقاسىنىڭ 375 جىلدىعىنا ارنالعان «وربۇلاق» مەموريالدى كەشەنى مەن تالعار اۋدانى جاڭالىق اۋىلىنداعى «ساياسي قۋعىن-سۇرگىن جانە اشارشىلىق قۇرباندارى مۋزەيىنىڭ» قۇرىلىس جۇمىستارى باستالىپ, اياقتالۋعا جاقىن. سونداي-اق وبلىس باسشىسى دەمەۋشىلەردىڭ قولداۋىمەن جۇزەگە اسىرىلعان اسا ءىرى الەۋمەتتىك جوبالارعا دا توقتالدى. اتاپ ايتقاندا, ««BN INVEST» قارجىلىق-وندىرىستىك حولدينگى» جشس قاراساي اۋدانىنداعى شامالعان اۋىلىندا 160 ميلليون تەڭگەگە حالىقتىڭ الەۋمەتتىك ءالجۋاز توپتارىنا ارناپ 17 تۇرعىن ءۇي سالىپ بەرسە, اسقار سابيروۆ باسقاراتىن «امال بيو» سەرىكتەستىگى 30 ميلليون تەڭگەگە ەڭبەكشىقازاق اۋدانىنداعى اششىبۇلاق اۋىلىندا قاراۋسىز قالعان ساياباقتى جاڭعىرتىپ, بالالارعا فۋتبول الاڭىن جاساپ بەرگەن.
وڭىردە جاستار ماسەلەسى دە نازاردان تىس قالماپتى. «جىرعا تۇنعان مەكەنىم – جەتىسۋىم» جوباسىمەن 43 جەرگىلىكتى اقىن-جازۋشىنىڭ كىتاپتارى جارىق كورسە, «جەتىسۋ بالالار كىتاپحاناسى» جوباسى بويىنشا التى اۆتوردىڭ بالالارعا ارنالعان ءتۇرلى جانرداعى انتولوگياسى باسىلىپ شىققان. بۇل تۋىندىلاردىڭ جالپى تيراجى 24 مىڭ دانانى قۇراپ وتىر.
سونداي-اق «جەتىسۋدىڭ جاستارعا تارتۋى» جوباسى اياسىندا جاس ولكەتانۋشىلار مەن تۋريستەردىڭ «مەنىڭ وتانىم – قازاقستان» وبلىستىق فورۋمى وتكىزىلىپ, وسى باعىت بويىنشا 2017-2022 جىلدارى 878,4 ميلليون تەڭگە جۇمسالىپ, 40 جوبانى جۇزەگە اسىرۋ جوسپارى دا بار ەكەن.
بەكەن قايرات ۇلى, «ەگەمەن قازاقستان»