بۇكىلالەمدىك بوكس سەرياسىندا سىنعا تۇسەتىن ەلىمىزدىڭ «استانا ارلاندارى» كومانداسى جوبانىڭ جارتىلاي فينالىندا بريتانيالىق «بريتيش لاينحارتس» كومانداسىمەن جەكپە-جەك وتكىزىپ, فينالعا جولداما الدى.
سىرت الاڭدا وتكەن العاشقى كەزدەسۋدە «ارلاندار» 3:2 ەسەبىمەن باسىم تۇسكەن ەدى. اتىراۋدا وتكەن قارىمتا جەكپە-جەكتە 4:1 جەڭىسكە جەتتى. «استانا ارلاندارى» ساپىنان سەرىك تەمىرجانوۆ (60 كگ), اسلانبەك شىمبەرگەنوۆ (69 كگ), بەك نۇرماعامبەت (81 كگ) جانە اسا اۋىر سالماقتاعى قامشىبەك قوڭقاباەۆ جەڭىسكە جەتتى. تەك 52 كيلودا جۇدىرىقتاسقان ساكەن بيبوسىنوۆ قارسىلاسى ۋيلل كوۋليدان جەڭىلىپ قالدى.
ەكى كەزدەسۋ قورىتىندىسى بويىنشا جەرلەستەرىمىز 7:3 ەسەبىمەن جەڭىسكە جەتىپ, ءتورتىنشى رەت جوبانىڭ فينالىنا جولداما الدى. ەندى «استانا ارلاندارى» فينالدا فرانتسيانىڭ «فرانس فايتينگ رۋستەرس» كومانداسىن جەڭگەن كۋبالىق «كۋبا دومادورەس» كلۋبىمەن كەزدەسەدى. ەكى ۇجىم وسىمەن ءۇشىن رەت فينالدا جولىققالى وتىر. بۇعان دەيىنگى ەكى كەزدەسۋدە وتانداستارىمىزدىڭ جەڭىسىمەن اياقتالعان-دى.