استانا ءتورىن كۇي تەربەگەن كۇن

وعان ارنايى قازاق ۇلت­تىق ونەر ۋنيۆەرسيتەتىنىڭ, ل.گۋ­ميلەۆ اتىنداعى ەۇۋ-دىڭ, س.سەيفۋللين اتىنداعى اگ­رار­لىق ۋنيۆەرسيتەتتىڭ ستۋ­دە­نتتەرى, وقۋشىلار سارايى مەن №3 مۋزىكالىق مەكتەپتىڭ وقۋ­شىلارى جانە dombyra-flashmob.kz سايتىندا تىركەلۋ ارقىلى كۇي تارتا الاتىن قالا تۇرعىندارى مەن قوناقتارى دا قاتىسا الاتىندىعى ايتىلعان بولاتىن.

سونىمەن مامىراجاي ماي­دىڭ العاشقى كۇنى استانا جۇر­تى «بايتەرەك» مونۋ­مە­نتىنىڭ ال­دىن­دا جينالدى. تايعا مىنگەن با­لادان باستاپ تاياققا سۇيەنگەن قا­رياعا دەيىن جينالدى دەگەندى قازاق «تايلى-تاياعى قالماي» دەي­دى عوي, بۇل دومبىرا-فلەش­موب­قا ءدال سولاي جينالدى. بۇل ءسوزدى كورەرمەندەر عانا ەمەس, قاتىسۋشىلارعا دا قاراتا اي­تۋعا بولادى. كۇيشىلەردىڭ الدى 74 جاستاعى اقساقال بولسا, كىشىسى 10 جاستاعى جەتكىنشەك. ال باستاۋشىسى استانا قالا­سى مادەنيەت جانە سپورت باس­قار­ماسىنىڭ باستىعى بولات ما­جاعۇلوۆ. مۇندايدا قالانىڭ ما­دەنيەت باسقارماسىنىڭ باسشىسى قولىنا دومبىرا الىپ, قال­ا تۇرعىندارىنىڭ قاق ورتاسىندا وتىرعانى كوزگە دە, كوڭىلگە دە جاراسىمدى-اق ەكەن.

دومبىرا-فلەشموبقا دومبىرالى اقىنداردىڭ ارناۋ جىرىمەن باستالدى. «بەس ءجۇز كۇيشى قولىنا دومبىرا السا, بەس ءجۇز جىلقى شاپقانداي دۇبىرلەتىپ» دەپ باستادى سەرىكزات دۇيسەنعازى, «ۇلدارعا قۇرمانعازى اتامىزدىڭ, قىزدارعا دينا اپامنىڭ جولىن بەرسىن» دەپ قوستادى مەيىربەك سۇلتانحان, «تۇلپارلارى تىقىرشىپ توقتاماي تۇر, بولات اعام جايمەنەن باستاي بەرسىن» دەگەن مۇحتار نيازوۆتىڭ جىرىنان كەيىن كۇي اعىنى بوگەۋدى بۇزعان تاسقىنداي اعىتىلىپ كەتە باردى.

مادەنيەت قايراتكەرى نۇرلان بەكەنوۆ ديريجەرلىك جاساعان وركەستر قۇرمانعازىنىڭ «سا­رى­­­ارقا» كۇيىن دۇركىرەتە جو­­نەل­­دى. ءار جاقتان شاشىراي كە­لىپ جايعاسقان ءار ادام ءبىر ساتتە ءبىر كۇيدى توگىلتە جونەلگەندە شىنىمەن دە بويىڭدى بەلگىسىز ءبىر­ ىستىق اعىن كەرنەپ كەتەدى ەكەن. بۇل اسەر – بولەك اسەر! بۇل – قازاقتىڭ ءبىر دەممەن سوققان جۇ­رەگىندەي, ءبىر جۇرەكتەن شىق­قان تىلەگىندەي ەلەس بەرگەن ەرەكشە ءسات!..

تەگىندە, ەلىمىزدە تالاي فلە­ش-موب ءوتىپ ءجۇر عوي, بىراق بۇل فلەش­موبتىڭ ورنى ەرەكشە بول­­دى. ويتكەنى قازاقتىڭ تۇلا بوي­­ىندا دومبىرانىڭ ءۇنى بار! دوم­بىرانىڭ ءۇنى قا­نىن­­داعى قىل پەر­نەنى باسىپ وتكەندە جان-جۇ­رەگى تەبىرەنبەيتىن قازاق كەم­دە-كەم. ءسويتىپ ارعىماقتاي الاعىزىپ العان دومبىراشىلار ءبىر كۇيمەن توقتاي المادى. كە­زەك-كەزەگىمەن «بالبىراۋىن», «ەر­كە سىلقىم» كۇيلەرىن توگىل­تىپ-توگىلتىپ كەلىپ, ءارى قاراي اۋىز­دى­عىن شايناپ الىپ قاشقان ات­تىڭ باسىن «اداي» كۇيىنە جى­بە­رە سالدى!..

دومبىرانىڭ پەرنەسىمەن شا­ناعىندا ويناقتاعان ون ساۋ­ساق شىنىمەن دە ۇلى دالا توس­ىندە دۇبىرلەگەن مىڭ سان تۇل­پار­دىڭ تۇياعىنداي دۇركىرەپ تارت­تى دەگەيسىڭ! تارتتى! «اداي­دى» تارتپاي كۇيشىلەردىڭ دە, تىڭداۋشى جۇرتتىڭ دا ارىنى باسىلار ەمەس. ايقايلاپ, شۋ­لاپ اشىق اسپان استىندا تە­ڭسەلىپ تۇر!

بۇرىن دا مەرەكە كۇندەرى 10-15 كۇيشىنىڭ باسىن قوسىپ «دومبىرا-دۋمان» وتكىزىپ جۇرتقا قازاقى ءھام مەرەكەلىك كوڭىل كۇي سىيلاپ جۇرگەن «بايتاق» قوعامدىق قوزعالىسىنىڭ توراعاسى جاڭارعان قارابالا: «استانا قالاسى مادەنيەت جانە سپورت باسقارماسىنىڭ قولداۋىمەن «بايتاق» قوعامدىق قوزعالىسىنىڭ ۇيىمداستىرۋىمەن وتكىزىپ جاتقان بۇل شارانى « ۇلى دالا ءۇنى» دەپ اتادىق. ماقساتىمىز – مادەني مۇرامىز بەن ۇلتتىق رۋحاني قۇندىلىقتارىمىزدى كەڭ كولەمدە ناسيحاتتاۋ. الداعى ۋاقىتتا مۇنداي فلەشموبتى بۇدان دا اۋقىمدى ەتىپ وتكىزۋ جوسپاردا بار. وزگەلەردىڭ دە قىزىعۋشىلىعىن تۋدىرىپ جاتقان سەكىلدى. الماتىدا, باسقا قالالاردا  وتكىزۋگە قابارلاسىپ جاتقاندار بار», - دەيدى.

ۇلتتىق رۋحاني قۇندى­لىق­تا­رىمىزدى كەڭ كولەمدە ناسي­حات­تاۋ دەگەن وسىنداي-اق بولار. كەرەمەت كۇي, كەرەمەت كۇن! ما­مىر دەسە دەگەندەي, كوڭىلدى جۇرت­قا كۇننىڭ كوزى دە ەرەكشە ەلجىرەپ, شۋاعىن توكتى! قىر ارقاسىن قىس قاجاعان اس­تا­نا­لىقتار ارقاسىن كۇنگە, كەۋ­دە­سىن كۇيگە توسەپ عاجايىپ ءبىر اسەرگە بولەندى.

ۇلاربەك نۇرعالىم ۇلى,

«ەگەمەن قازاقستان»