سەمەيلىك ستۋدەنتتەر جەڭىمپاز اتاندى

ەكى كۇنگە سوزىلعان چەمپيوناتقا ەلىمىزدىڭ 60-تان استام جوعارعى وقۋ ورنىنان 700-دەن استام ستۋدەنت قاتىستى. ولار تسيفرلاندىرۋ, اۋىل شارۋاشىلىعى, قارجى, الەۋمەتتىك سالاعا قاتىستى 100-دەن استام جوبا ۇسىندى.

كاسىپكەرلىك, ستارتاپ, يننوۆاتسيا باعىتىندا وتكەن سايىستا چەمپيون اتانعان كوماندا قالدىق تۇرلەرىن وڭدەۋگە قاتىستى ءۇش ءتۇرلى جوبا ۇسىنعان. ءۇش جوبانىڭ ىشىندەگى وندىرىستىك قالدىقتاردى تۇرعىن ءۇي قۇرىلىسىنا پايدالانۋعا ارنالعان Cane Home جوباسى ۇزدىك دەپ تانىلىپتى. وسىلايشا سەمەيلىك ستۋدەنتتەر ەكىنشى مارتە جەڭىسكە جەتىپ وتىر. ەندى ولار ەلىمىزدىڭ نامىسىن اقش-تىڭ كاليفورنيا شتاتى سان-حوسە قالاسىندا قازان ايىندا وتەتىن وتەتىن Enactus World Cup 2018 الەمدىك كۋبوگىندا قورعايتىن بولادى.

تاعى ءبىر ايتا كەتەرلىگى, وسى كونكۋرستا قازاق گۋمانيتارلىق-زاڭ يننوۆاتسيالىق ۋنيۆەرسيتەتىنىڭ كومانداسى قارجىلاي سىيلىقتى قانجىعالارىنا بايلادى. «قازاقستاندى قالاي ازىقپەن قامتيمىز-3» دەگەن تاقىرىپتاعى ارنايى سايىستا جەڭىمپاز اتانعان كومانداعا 1 ميلليون تەڭگە سىاقى تاپسىرىلدى.

Enactus Kazakhstan National EXPO 2018 ۇلتتىق كۋبوگىندا ەكىنشى ورىندا ەلورداداعى قازاق گۋمانيتارلىق زاڭ ۋنيۆەرسيتەتىنىڭ كومانداسى يەلەنسە, استانا قالاسى مەديتسينا ۋنيۆەرسيتەتى ءۇشىنشى ورىنعا تابان تىرەدى. الماتىدان كەلگەن قازاق ۇلتتىق اگرارلىق ۋنيۆەرسيتەتىنىڭ كومانداسى ءتورتىنشى ورىندى قاناعات تۇتتى.

جىل سايىن الەمنىڭ ءتۇرلى ەرلەرىندە وتەتىن, قورىتىندى كونكۋرسقا 36-دان استام مەملەكەتتەن كەلگەن وقۋ ورىندارىنىڭ كوماندالارى قاتىساتىن Enactus جوباسىنىڭ اقتىق كەزەڭى اقش-تا وتەتىنىن جوعارىدا ايتىپ وتتىك. بۇل جوبانىڭ ماقساتى جاستاردىڭ كۇش-جىگەرىن, ءبىلىمىن, يدەيالارىن پايدالانىپ كاسىپكەرلىكتى دامىتۋ, جاستاردى الەۋمەتتىك-ەكونوميكالىق سالاعا بەلسەندى تۇردە تارتۋ بولىپ تابىلادى.

ارنۇر اسقار,

«ەگەمەن قازاقستان»