مەگاپوليستە ۇزىندىعى 30 شاقىرىم جاڭا تروتۋارلاردى جوندەۋ مەن سالۋ جۇمىستارى باستالدى, - دەپ حابارلايدى الماتى اكىمدىگىنىڭ ءباسپاسوز قىزمەتى. قالانىڭ 157 كوشەسىن جوندەۋ بارىسىندا جۇرگىنشى جولدارى دا جاڭارادى.
كوشە-جول جۇيەلەرىن جوندەۋ كەزىندە بۇزىلعان ارىق ناۋالارى اۋىستىرىلىپ, كەرەكسىز كونسترۋكتسيالار الىنىپ, جاسىلداندىرۋ اتقارىلادى. قوزعالىستىڭ وتكىزۋ قابىلەتىن ارتتىرۋ ماقساتىندا جيەكتەگى تۇراق قالتالارى عانا اباتتاندىرىلادى. جاياۋ جۇرگىنشىلەردىڭ قاۋىپسىزدىگىن قامتاماسىز ەتۋ ءۇشىن كوشەدەن كىرۋ بولىگى تارىلادى. بۇلاردان وزگە, مەگاپوليس باسشىسىنىڭ تاپسىرماسى بويىنشا جۇرگىنشى قوزعالىسىن قيىنداتاتىن قۇرىلىستار بار تروتۋارلار انىقتالۋدا.
ايتا كەتەرلىگى, تۇركسىب اۋدانىندا ستاحانوۆ, پاريج كوممۋناسى, شىمكەنت, بۋدەننىي كوشەلەرى بولىگىندە جاڭا تروتۋارلار پايدا بولدى. اۋەزوۆ اۋدانىنداعى №6 مەن №8 ىقشام ەلدى مەكەندەردە جاڭا اۋلاارالىق تروتۋارلار پايدالانۋعا بەرىلدى.
بوستاندىق اۋدانىندا دۋناەۆسكي كوشەسى بويىمەن جاروكوۆ جانە حودجانوۆ كوشەلەرىندە دە تروتۋارلار ىسكە قوسىلدى. وسىعان ۇقساس جۇمىستار قالانىڭ بارلىق اۋداندارىندا جۇرۋدە. سونداي-اق, قالانى جاڭارتۋدىڭ ەكىنشى جىلى بويىنا بيىلعى جازدا بىرقاتار نەگىزگى داڭعىلدار جاڭارادى. ينجەنەرلىك ينفراقۇرىلىمدى مودەرنيزاتسيالاۋ كەزىندە 12 شاقىرىم جىلۋ جەلىسىن اۋىستىرۋ جوسپارلانعان. بۇلاردان وزگە, بۇرىننان جاڭارعان 455 اۋلا الاڭدارىنا قوسىمشا تاعى دا 585 اۋلا جوندەلەدى.