يۋنەسكو-نىڭ باس ديرەكتورى ودرە ازۋلە قازاقستاننىڭ الەمدىك دەڭگەيدەگى بەيبىتشىل باستامالارى حالىقارالىق قوعامداستىق تاراپىنان لايىقتى قولداۋ تاۋىپ وتىرعانىن مالىمدەدى. ول بۇل پىكىرىن قازاقستاننىڭ يۋنەسكو جانىنداعى تۇراقتى وكىلى ءارى ەلىمىزدىڭ فرانتسياداعى توتەنشە جانە وكىلەتتى ەلشىسى جان عاليەۆپەن بولعان اڭگىمە بارىسىندا جەتكىزدى.
«مادەنيەتارالىق ۇنقاتىسۋدى ىلگەرىلەتۋ ۇيىمىمىزدىڭ باستى ماقساتتارىنىڭ ءبىرى بولىپ تابىلادى, سوندىقتان يۋنەسكو مادەنيەتتەر جاقىنداسۋىنىڭ حالىقارالىق ونجىلدىعىن جاريالاۋدا قازاقستاننىڭ ۇلەسىن ەرەكشە باعالايدى», دەگەن و.ازۋلە ەلىمىزدىڭ باسشىلىعىنا ۇيىم قىزمەتىندەگى كورسەتكەنى نەگىزگى باعىتتار بويىنشا جوبالارعا قولداۋ كورسەتكەنى ءۇشىن شىنايى ريزاشىلىعىن ءبىلدىردى.
يۋنەسكو باس ديرەكتورى دۇنيەجۇزىلىك مۇرا جانە ماتەريالدىق ەمەس مادەني مۇرا تىزىمدەرىنە, بيوسفەرالىق رەزەرۆاتتار مەن جاھاندىق گەوپاركتەر جەلىلەرىنە, «الەم ەستەلىگى» باعدارلاماسى اياسىنداعى بىرەگەي دەرەككوزدەر جيىنتىعىنا قازاقستاندىق نوميناتسيالاردى ەنگىزۋ بويىنشا جۇيەلى جۇمىستى ەرەكشە اتاپ ءوتتى.
ءوز كەزەگىندە قازاقستان ەلشىسى ج.عاليەۆ اتالعان ۇيىمنىڭ باسشىسى و.ازۋلەنى ءىرى حالىقارالىق ۇيىمنىڭ باسىنداعى جاۋاپتى ميسسياسىنىڭ باستالۋىمەن قۇتتىقتاپ, ەلىمىزدىڭ يۋنەسكو-نىڭ بيىك قاعيداتتارى مەن قۇندىلىقتارىنا قۇرمەتپەن قارايتىنىن اتاپ ءوتتى.
و.ازۋلە سونىمەن بىرگە ەلىمىزدە پرەزيدەنت نۇرسۇلتان نازارباەۆ باستاعان «رۋحاني جاڭعىرۋ» باعدارلاماسى مەن «جاھانداعى زاماناۋي قازاقستاندىق مادەنيەت» جوباسىن جۇزەگە اسىرۋ بارىسىنان, الەمدىك جانە ءداستۇرلى دىندەر كوشباسشىلارىنىڭ VI سەزى باعدارلاماسىنان حاباردار ەتىلدى. تاراپتار الماتىداعى يۋنەسكو كلاستەرلىك بيۋروسىنىڭ بەلسەندى جۇمىسى مەن 2017 جىلعى قاراشادا ۇيىمنىڭ باس كونفەرەنتسياسىنىڭ شەشىمىمەن ماقۇلدانعان يۋنەسكو قامقورشىلىعىنداعى مادەنيەتتەر جاقىنداسۋىنىڭ حالىقارالىق ورتالىعىنىڭ تەز ارادا اشىلۋىنىڭ ماڭىزىن ءسوز ەتتى.
ەستەرىڭىزگە سالا كەتسەك, 1992 جىلدىڭ 22 مامىرىنان باستاپ قازاقستان بىرىككەن ۇلتتار ۇيىمىنىڭ ءبىلىم, عىلىم جانە مادەنيەت جونىندەگى ۇيىمىنىڭ (يۋنەسكو) تولىققاندى مۇشەسى بولىپ تابىلادى. بەدەلدى حالىقارالىق ۇيىممەن ىنتىماقتاستىعىمىزدى قازاقستاننىڭ يۋنەسكو جانە يسەسكو ىستەرى جونىندەگى ۇلتتىق كوميسسياسى ۇيلەستىرەدى. وسى كۇنگە دەيىن دەرەكتى مۇرانىڭ «الەم ەستەلىگى» حالىقارالىق تىزىمىنە – 3, دۇنيەجۇزىلىك مۇرا تىزىمىنە – 5, ماتەريالدىق ەمەس مادەني مۇرا تىزىمىنە – 8, بيوسفەرالىق رەزەرۆاتتار جەلىسىنە – 9, ەستەلىك داتالار كۇنتىزبەسىنە 21 قازاقستان نوميناتسيالارى ەنگىزىلدى. ەلىمىزدە يۋنەسكو-نىڭ 6 كافەدراسى, 31 قاۋىمداستىرىلعان مەكتەبى, 50-دەن استام كلۋبى, ورتاازيالىق وڭىرلىك گلياتسيولوگيالىق ورتالىعى ىستەيدى. پرەزيدەنت ن.نازارباەۆتىڭ باستاماسىمەن بۇۇ باس اسسامبلەياسى ءوز قارارىمەن 2013-2022 جىلدار مەرزىمىن مادەنيەتتەر جاقىنداسۋىنىڭ حالىقارالىق ونجىلدىعى ەتىپ جاريالادى جانە يۋنەسكو-نى ءتيىستى باعدارلامانى جۇزەگە اسىرۋعا جاۋاپتى قۇرىلىم رەتىندە بەلگىلەدى.