ءشامشى شىعارماشىلىعى بۇگىندە ۇلتتىق رۋحاني مۇرامىزدىڭ اجىراماس بولىگىنە اينالعان. قالامىنان سىرلى دا سازدى اۋەندەر قاعازعا تۇسكەن كومپوزيتور شىعارماشىلىعى ءالى دە زەرتتەۋدى قاجەت ەتەتىن وزگەشە ءبىر الەم. جاقىندا «رۋحاني جاڭعىرۋ» باعدارلاماسى اياسىندا «Arna-b» باسپاسىنان جارىق كورگەن ء«شامشى قالداياقوۆ» فوتوالبوم-كىتابى كومپوزيتور شىعارماشىلىعىن, ءومىرىن جاڭا ءبىر قىرىنان تانىتقانداي.
ۇلتتىق كىتاپحانادا وتكەن كىتاپتىڭ تۇساۋكەسەرىنە جينالعان قاۋىم ءشامشى ومىرىنەن سىر شەرتتى. جوبانىڭ اۆتورى كومپوزيتور شىعارماشىلىعىن زەرتتەۋشى, كومپوزيتور ق.قۇرمانالى فوتوالبومنىڭ تاريحىنان بىرقاتار دەرەكتەردى ورتاعا سالدى. ال قوعام قايراتكەرى ا.تشانوۆ ەسىمى كومپوزيتوردىڭ ونەرىنە جاناشىر, قامقور جاندار قاتارىنان اتالادى. كەزىندە ش.قالداياقوۆ اتىنداعى «مەنىڭ قازاقستانىم» فەستيۆالىنىڭ وتۋىنە مۇرىندىق بولعان قوعام قايراتكەرى سول ءبىر جىلداردىڭ ەستەلىگىن پاراقتاپ, ءشامشى مۇراسىنىڭ ۇرپاققا ميراس بولىپ قالاتىندىعىن اتاپ ءوتتى.
«اۋىل كەشىندە الىستان ماندولينمەن ۇندەسىپ قۇلاققا ءۇزىلىپ جەتەتىن سول ءبىر اۋەنگە ىنتىق بولماعان جان كەمدە-كەم. مەنى شامشىگە جاقىنداستىرعان «جەڭەشە-اي» ءانى بولاتىن» دەپ ەسكە الدى ۇعا اكادەميگى, ءو.ايتباي ۇلى. – بۇگىندە ەل اراسىنا كەڭىنەن تاراعان ءشامشىنىڭ سىرشىل دا كوركەم اۋەزدى اندەرى ءبىزدىڭ سول ءبىر جاستىق كەزدەرىمىزدىڭ كۋاسىندەي. شامشىمەن قاتار جۇردىك, شىعارماشىلىعى دا كوز الدىمىزدا ءوتتى. ونىڭ ومىرشەڭ اندەرى ءالى دە جاساي بەرەدى».
اۋقىمدى جيناق جەتى بولىمگە جىكتەلىپتى. «مەنىڭ قازاقستانىم» دەپ اتالاتىن العاشقى ءبولىم كومپوزيتوردىڭ وتانعا دەگەن سۇيىسپەنشىلىگى, تۋعان ولكە تۋرالى اندەرىنە ارنالعان. ال ەكىنشى ءبولىم – ء«ومىر-وزەن». بولىمدە كومپوزيتور ءومىرىنىڭ ءار كەزەڭدەرىن قامتىعان فوتوشەجىرە بار. «سول ءبىر كەز ەسىمدە...» دەپ اتالاتىن بولىمدە كومپوزيتور تۋرالى ەستەلىكتەر جيناقتالسا, ءارى قاراي جالعاسىن تاپقان ء«شامشىنىڭ ءانى»,«سارعايعان سۋرەتتەر سىرى», «امانات», ء«شامشى-مۇرا» بولىمدەرىندە وقىرمانىن بەي-جاي قالدىرمايتىن اسەرلى ساتتەر توپتاستىرىلعان.
ەلۆيرا سەرىكقىزى, «ەگەمەن قازاقستان»
الماتى