الداعى جەكسەنبى كۇنى قازاقتىڭ شويىن جۇدىرىق يەسى, ريو وليمپياداسىنىڭ چەمپيونى دانيار ەلەۋسىنوۆ اقش-تىڭ نيۋ-يورك قالاسىنداعى Barclays Center ارەناسىندا ءوزىنىڭ كاسىپقوي بوكستاعى دەبيۋتتىك كەزدەسۋىن وتكىزەدى. وزدەرىڭىز بىلەتىندەي, ەلەۋسىنوۆ ناۋرىز ايىندا كاسىپقوي بوكسقا اۋىسقاندىعىن مالىمدەپ, بريتانيالىق تانىمال پروموۋتەر ەددي حيرنمەن ءۇش جىلدىق كەلىسىمشارتقا قول قويعان ەدى.
د.ەلەۋسىنوۆ اۋەسقوي بوكسشى الۋى ءتيىس بولعان جۇلدە مەن ماراپاتتىڭ بارلىعىن ەنشىلەدى. بىلاي قاراساڭىز, بوكسشى رەتىندە وكىنىشىنە قاراعاندا, قۋانىشى باسىم. ەندەشە ونىڭ سپورتتىق عۇمىرىنىڭ كەلەسى كەزەڭىنە يمەنبەي اياق باسۋىنا ەش كەدەرگى جوق-تىن. بوكس الەمىنە جاڭالىق بولىپ كەلىپ, الشاڭداي باسقان الاش بالاسىنىڭ ارىنىن مەنمىن دەگەن پروموۋتەرلىك ورتالىقتاردىڭ كورمەي قالۋى تاعى مۇمكىن ەمەس. بىراق دانيار ەشكىمگە ەلەۋسىز جاتقان, اتى مەن اتاعى, داڭقى مەن دابىراسى جوق اۋستراليالىق كومپانيامەن كەلىسىمشارتقا وتىرعاندا ءىشىمىز ءبىر قىلپ ەتە قالعانىن نەسىنە جاسىرايىق؟! سول كۇمان بەكەر ەمەس ەكەن, شيكى كەلىسىمنەن اقىرى شي شىعىپ تىندى. ەندى, مىنە, ەكىنشى رەت كاسىپقوي بوكستىڭ ءدامىن تاتۋعا, ءتورت بەلدىكتىڭ بارلىعىن يەلەنۋگە بەل بۋىپ وتىر.
ەلەۋسىنوۆتىڭ كاسىپقوي بوكستاعى تۇڭعىش جەكپە-جەگى 29 ءساۋىر كۇنى گەننادي گولوۆكيننىڭ ەكس-قارسىلاسى دەنيەل دجەيكوبستىڭ قاتىسۋىمەن بولاتىن بوكس كەشىندە وتەدى. قارسىلاسى امەريكالىق بوكسشى – نوا كيدد. بۇگىنگە دەيىن ءتورت كەزدەسۋ وتكىزىپ, ۇشەۋىندە جەڭىسكە جەتسە, بىرەۋىندە تەڭ تۇسكەن. 23 جاستاعى كيدد كاسىپقوي بوكستىڭ الىپپەسىن وسىدان ەكى جىل بۇرىن باستاعان. ەلەۋسىنوۆكە قاراعاندا تاجىريبەسى مول. ول سوڭعى ايقاسىن وتكەن جىلدىڭ جەلتوقسان ايىندا وتكىزىپ, قارسىلاسىن تەحنيكالىق نوكاۋتپەن جەڭگەن. الدىن الا مالىمەت بويىنشا ەلەۋسىنوۆ-كيدد ايقاسى 6 راۋندقا جوسپارلانعان. كاسىپقوي بوكستا رەيتينگتە تەز كوتەرىلۋ ءۇشىن راۋند سانى ماڭىزدىراق. ەلەۋسىنوۆتىڭ دەبيۋتى ءۇشىن 6 راۋندتىق جەكپە-جەك جاقسى كورسەتكىش. دەگەنمەن 1,5 جىلدان اسا بوكس پراكتيكاسى جوق جانە كاسىپقوي بوكستىڭ قىرى مەن سىرىن مەڭگەرە قويماعان دانيار ءۇشىن 6 راۋندتىق ايقاس قيىندىق تۋعىزۋى مۇمكىن. ادەتتە, كاسىپقوي بوكسقا ەندى قادام باسقان بوكسشىلار قارىمى مەن فيزيكالىق مۇمكىندىگىن تەكسەرىپ الۋ ءۇشىن 4 راۋندتىق جەكپە-جەكتەن باستايتىن.
جەكپە-جەك الدىندا د.ەلەۋسىنوۆ قارسىلاسى تۋرالى ازداپ زەرتتەگەنىن, سوعان قاراي جوسپار قۇرىپ قويعانىن جەتكىزدى. «شىنىمدى ايتسام, قارسىلاسىم تۋرالى تولىق بىلمەيمىن. ويتكەنى ول تۋرالى ينتەرنەتتە اقپاراتتار وتە از. ونىڭ بۇعان دەيىنگى جەكپە-جەكتەرىنىڭ تەك ۆيدەو ءۇزىندىسىن قاراپ شىقتىم. بايقاعانىمداي, ول وڭ قولىمەن كوپ سوققى جاسايدى ەكەن جانە ءستيلى دە تۇسىنىكسىز. دەسە دە, قارسىلاسىم جوعارى دەڭگەيدەگى بوكسشى دەپ ايتا المايمىن. سەبەبى كاسىپقوي بوكستاعى العاشقى ايقاسقا جوعارى دەڭگەيدەگى قارسىلاستى تاڭدامايدى عوي. بىراق سوندا دا ساق بولعان ءجون. جەكپە-جەك تاعدىرىن ءبىر سوققى شەشىپ كەتۋى دە ابدەن مۇمكىن. وسىعان بايلانىستى اكەم ەكەۋمىز جەكپە-جەككە بىرنەشە جوسپار قۇرىپ قويدىق. بۇيىرسا, جەڭىسكە جەتۋ ءۇشىن بار كۇشىمدى, تاجىريبەمدى قولداناتىن بولامىن», دەيدى ەلەۋسىنوۆ.
سونداي-اق امەريكالىق نوا كيدد تە وتانداسىمىز تۋرالى ءوز پىكىرىن ايتىپ ءوتتى. «مەن بۇعان دەيىن ەلەۋسىنوۆتى تانىعان جوقپىن. قارسىلاسىم اتانعان سوڭ ول تۋرالى مالىمەت ىزدەي باستادىم. مەنىڭشە, ول وتە مىقتى بوكسشى. رينگتە ءوزىن ەركىن سەزىنىپ, اياقتا وتە جىلدام قيمىلداپ, كۇتپەگەن جەردەن سوققى جۇمسايتىنى بار ەكەن. ونىڭ بىرنەشە جەكپە-جەگىن كورگەن سوڭ وسىنداي وي ءتۇيدىم. سونىمەن قاتار ول وتە اشىق جۇرەتىن بوكسشى ەكەنىن دە بايقادىم. ونىڭ بۇل كەمشىلىگى ماعان قول كەلۋى مۇمكىن. سوندىقتان ونى جەڭۋگە بولادى-اۋ دەگەن بىرنەشە جوسپار ءتۇزىپ, وعان توسىنسىي دايىنداپ قويدىم», دەيدى كيدد.
اقش-قا اپتا بۇرىن بارعان دانيار ەلەۋسىنوۆ كەشە جەرگىلىكتى باق وكىلدەرىنە العاشقى جاتتىعۋ جيىنىن وتكىزدى. سونداي-اق بۇل جيىنعا وتانداسىمىزدىڭ پروموۋتەرى ەددي حيرن قاتىسىپ, جۋرناليستەرگە دانياردىڭ دارىندى بوكسشى ەكەنىن ايتىپ, ونى WBA (Super), IBO, WBC جانە IBF تۇجىرىمدارى بويىنشا ورتا سالماقتاعى الەم چەمپيونى گەننادي گولوۆكينمەن سالىستىردى. «سىزدەر مىنا جىگىتتىڭ قانشالىقتى دارىندى ەكەنىن بىلمەيسىزدەر. ول كەلەسى گەننادي گولوۆكين ەمەس, ول – دانيار ەلەۋسىنوۆ. بۇل جىگىت – قازاقستاننىڭ «التىن بالاسى». ول ەرەكشە دارىندى, ول ورتا سالماقتاعى الەم چەمپيونى بولادى», دەپ پىكىر ءبىلدىردى پروموۋتەر.
وقىرماندار اراسىندا ەلەۋسىنوۆتى گولوۆكينمەن سالىستىرىپ, اتاق جاعىنان GGG-دەن اسىپ تۇسەدى دەپ سەنىمدى تۇردە ايتىپ جاتقان بۇل قاي پروموۋتەر دەگەن زاڭدى ساۋال تۋىنداۋى مۇمكىن. ەددي حيرن ەسىمى كاسىپقوي بوكستىڭ اينالاسىندا جۇرگەندەرگە, بوكس جانكۇيەرلەرىنە تانىس. الايدا باسقا دا وقىرماندارىمىز ءۇشىن بۇل ەسىمنىڭ سىرىن اشا تۇسسەك دەيمىز. ەدديدىڭ اكەسى بارري حيرن Matchroom Sport پروموۋتەرلىك كومپانياسىن اشىپ, ءبىراز ۋاقىت ءوزى باسقارعان. كەيىنىرەك ول پروموۋتەرلىك كومپانياسىن ۇلىنا بەرەدى. وسىدان سوڭ ەددي بىرنەشە تالانتتى بوكسشىلارمەن كەلىسىمشارتقا وتىرىپ, انگلياداعى بۇكىل بوكس پەن جارناما اۋديتورياسىن وزىنە تارتا باستايدى. بۇل كەزدە انگليادا ايگىلى ريككي حاتتوننىڭ پروموۋتەرى بولعان فرەنك ۋوررەننىڭ ءداۋىرى ءجۇرىپ تۇرعان كەز بولاتىن. وسىدان سوڭ انگليادا ەكى پروموۋتەر اراسىندا باسەكەلەستىك باستالادى.
بۇگىندە ول – ەنتوني دجوشۋادان باستاپ, دەنيەل دجەيكوبس, تايسون فيۋرري, كەلل برۋك سىندى جىگىتتەردى جەتەلەپ جۇرگەن پروموۋتەر. ءتىپتى جەرلەسىمىز جانات جاقيانوۆتىڭ بار بەلبەۋىن تارتىپ العان رايان بارنەتت تە وسى پروموۋتەردىڭ بوكسشىسى. ەندى بۇل قاتارعا وتانداسىمىز دانيار ەلەۋسىنوۆ تە قوسىلدى.
كاسىپقوي بوكسقا اۋىسقان وزگە قازاقستاندىق بوكسشىلارعا قاراعاندا ەلەۋسىنوۆ كاسىپقوي بوكس الەمىندە وتە تانىمال جانە ابىرويلى پروموۋتەرمەن كەلىسىمشارتقا وتىردى. سونداي-اق ول دەبيۋتتىك كەزدەسۋىن اقش-تا وتكىزۋگە مۇمكىندىك الدى. دەمەك, پروموۋتەر تاراپىنان ەلەۋسىنوۆكە بار جاعداي جاسالعان. ەندى بارلىعى تەك بوكسشىنىڭ وزىنە بايلانىستى. ەندەشە سايىسقا تۇسەتىن ساڭلاعىمىزعا ساتتىلىك تىلەيمىز.
ءالي بيتورە, «ەگەمەن قازاقستان»