قازىر بولماشى نارسەنى الەۋمەتتىك جەلىلەرگە جازىپ, دابىرايتاتىندار از ەمەس. جانكەلدين اۋدانىنداعى ءتاۋىش اۋىلىندا ءولى تۋعان قوزى تۋرالى تاراعان حاباردى دا سونىڭ قاتارىنا قوسۋعا بولادى.
ءتاۋىش اۋىلىنىڭ تۇرعىنى اقپان دوسانوۆتىڭ قوراسىنداعى ءبىر قويدىڭ شالا تۋعان قوزىسىنىڭ باسى ۇلكەن, استىڭعى جاق سۇيەگى جەتىلمەگەندىكتەن ونى ءبىر قاراعاندا قابانعا ۇقساتادى. بىراق تابيعاتتىڭ مۇنداي «اۋىتقۋى» مالدىڭ ىشىندە ىلۋدە بولسا دا كەزدەسەتىنىن بىلەتىن شارۋا ونى اۋىلداعى مال دارىگەرىنە كورسەتۋدى دە ماقسات تۇتپاي, كومىپ تاستايدى. بىراق نەمەرەلەرى جەتىلمەي, شالا تۋعان قوزىنى تەلەفونىمەن سۋرەتكە ءتۇسىرىپ الادى, ۋاتساپ ارقىلى ءسۇت ءپىسىرىم ۋاقىتتا-اق ءدۇيىم جۇرتقا تاراتىپ ۇلگەرەدى.
ءبىز وسى «قابان» بولىپ تۋعان ءولى قوزىنىڭ انىق-قانىعىن ءبىلۋ ءۇشىن جانكەلدين اۋداندىق «مال دارىگەرى» مەملەكەتتىك-كوممۋنالدىق كاسىپورنىنىڭ ديرەكتورى ابىلبەك سەيتقازيەۆپەن حابارلاسقان ەدىك.
– اۋىل تۇرعىنىنىڭ قوراسىنداعى قوي قاي قابانمەن بۋدانداسىپتى؟ قۇلاق ەستىمەگەن جاعدايدى جۇرت ايتا بەرەتىن بولدى عوي. الەۋمەتتىك جەلىلەردە بايقوڭىردان ۇشقان رەسەي زىمىراندارى تاراتقان رادياتسيا سالدارى دەگەندەر دە تابىلىپ جاتىر. مۇنداي جاعداي بۇرىننان كەزدەسەتىن قۇبىلىس. شارۋا قوراسىنداعى قوشقارىن وزگەرتىپ وتىرۋى كەرەك. قان تۋىستىعى بار مالدا مۇنداي قۇبىلىستار بولىپ تۇرادى. ءوزىمنىڭ كوپ جىلعى جۇمىس تاجىريبەمدە ەكى باستى نەمەسە سەگىز اياقتى قوزىنىڭ تۋعانىن كورگەنمىن. ەركەك مالدى وزگەرتىپ وتىرماعان جەردە وسىنداي تۇقىمنىڭ جەتىلمەۋى, ازعىنداۋى بولا بەرەدى, – دەيدى ابىلبەك سەيتقازيەۆ.
ءتورت ت ۇلىكتىڭ جاعدايىن بەس ساۋساقتاي بىلەتىن قازاق ۋاق مالدىڭ ەركەگىن اۋىستىرىپ وتىرعان. تاعى ءبىر قىزىعى, ىلۋدە ءبىر بولسا دا, ءىرى قارا مەن جىلقىنىڭ ءتولىن ەگىز تۋى كەزدەسىپ تۇرادى ەكەن.
– نەگىزى ءىرى قارا مالدىڭ ەگىز تاپقانىن ىرىمشىل قازاق جاقتىرماعان. سيىر ەگىز بۇزاۋ, بيە ەگىز ق ۇلىن تاپقاندا ءبىر ءتولىن ءولتىرىپ, كومىپ تاستاعان جاعدايلار دا كەزدەسكەن. نەمەسە ەگىزدىڭ بىرەۋىن وزگەگە سىيلاپ جىبەرەدى ەكەن. ال تورعايدا جىلقىنىڭ ەگىز ق ۇلىن تۋى ءجيى كەزدەسىپ ءجۇر. مەنىڭ بايقاۋىمشا, مۇنداي قۇبىلىس جىلدا كەزدەسپەيدى. ال كەيبىر جىلدارى سيىر دا, جىلقى دا ەگىز تابادى. بيىل تورعايدىڭ وزىندە ەكى جىلقىنىڭ باۋىرىندا ەگىز ق ۇلىن شاپقىلاپ ءجۇر, كادىمگى ق ۇلىندار, ەشقانداي اۋىتقۋى جوق , – دەيدى ابىلبەك سەيتقازيەۆ.
اۋىلدىڭ مال دارىگەرلەرى «قابان» قوزىنىڭ سەبەبىن جۇرتتى دۇرلىكتىرمەي ءدوپ باسىپ ايتىپ بەردى. ال جىلقى مەن سيىر ەگىز تۋدى دەپ نەسىنە ۇركەمىز؟ «قوي ەگىز تۋسا, ءشوپتىڭ باسى ايىر شىعادى» دەگەن عوي شارۋا باققان اتالارىمىز. ايتپاقشى, «باردىڭ ەسەبى تابىلادى» دەگەندى ايتقان دا سول اتالارىمىز.
ءنازيرا جارىمبەت, «ەگەمەن قازاقستان»
قوستاناي وبلىسى,
جانكەلدين اۋدانى