الماتى قالاسىندا «كونستيتۋتسيا جانە قوعامدىق ەركىندىك: قۇقىقتىق ۇلگىنىڭ قالىپتاسۋى (قازاقستان جانە فرانتسيا تاجىريبەسىنەن)» تاقىرىبىمەن حالىقارالىق كونفەرەنتسيا ءوتتى. وعان كونستيتۋتسيالىق كەڭەستىڭ توراعاسى ق.ءمامي قاتىستى.
ءىس-شارانى اباي اتىنداعى قازاق ۇلتتىق پەداگوگيكالىق ۋنيۆەرسيتەتى, سوربوننا-قازاقستان ينستيتۋتى جانە فرانتسيانىڭ قازاقستانداعى ەلشىلىگى ۇيىمداستىردى. ونىڭ جۇمىسىنا فرانتسيا ەلشىسى ف.مارتينە, وسى ەلدەن كەلگەن ساراپشىلار, جوعارعى سوت, جوعارى سوت كەڭەسى, قۇقىق قورعاۋ ورگاندارىنىڭ باسشىلارى, سونداي-اق بەلگىلى زاڭگەر-عالىمدار قاتىستى.
ءوزىنىڭ قۇتتىقتاۋ سوزىندە ق.ءمامي: «دەموكراتيالىق جانە قۇقىقتىق مەملەكەتتە كونستيتۋتسيا جەكە بوستاندىق پەن قوعامدىق قاجەتتىلىك اراسىنداعى قارىم-قاتىناس ولشەمىن ايقىندايدى. ول ءبىر جاعىنان ادامنىڭ بوستاندىعىن بەكىتەدى, ال ەكىنشى جاعىنان ەرەكشە قورعالاتىن كونستيتۋتسيالىق قۇندىلىقتاردى قورعاۋدىڭ تەتىكتەرىن بىلدىرەدى. وسى ماسەلەدە ولاردى تيىسىنشە قورعاۋدى قامتاماسىز ەتۋگە, سونداي-اق قۇقىق ۇستەمدىگىنىڭ جالپى قابىلدانعان قاعيداتتارىنا قول سۇقپاۋعا مۇمكىندىك بەرەتىن ءتۇرلى الەۋمەتتىك ماڭىزى بار مۇددەلەردىڭ وڭتايلى تەڭگەرىمىن تابۋ قاجەت. قۇقىقتار مەن بوستاندىقتاردى قۇقىقتىق رەتتەۋ دارەجەسى قۇقىق قولدانۋدىڭ ساپاسى رەتىندە ەلىمىزدىڭ دامۋ دەڭگەيىن, حالىقتىڭ ءال-اۋقاتىن كورسەتەدى, تۇپتەپ كەلگەندە مەملەكەتتىڭ الەمدىك رەيتينگىن ايقىندايدى. ادامي كاپيتال كەز كەلگەن مەملەكەتتىڭ دامۋىنىڭ دىڭگەگى مەن قوزعالىس فاكتورى بولىپ تابىلادى. وتكەن جىلى قازاقستان رەسپۋبليكاسىنىڭ پرەزيدەنتى ءوزارا بايلانىستى ەكى جالپىۇلتتىق جوبا – «رۋحاني جاڭعىرۋ» باعدارلاماسىنا جانە كونستيتۋتسيالىق رەفورماعا باستاماشىلىق جاسادى. سوڭعىسى بۇكىل قۇقىق قورعاۋ جۇيەسىن ودان ءارى جاڭعىرتۋ ءۇشىن قۇقىقتىق نەگىز قۇردى. ادامنىڭ قۇقىقتارى مەن بوستاندىقتارى سالاسىندا كونستيتۋتسيالىق زاڭدىلىقتى قامتاماسىز ەتۋدە ءبىزدىڭ ەلىمىزدەگى ماڭىزدى ءرول كونستيتۋتسيالىق كەڭەسكە تيەسىلى», دەدى.
سونداي-اق كونستيتۋتسيالىق كەڭەس توراعاسى قوعامنىڭ كەمەلدەنۋ دارەجەسى بەرىلگەن قۇقىقتار مەن بوستاندىقتاردىڭ كولەمىمەن ەمەس, ولاردى ادامنىڭ, قوعامنىڭ جانە مەملەكەتتىڭ يگىلىگىنە قولدانا بىلۋىمەن ايقىندالادى دەپ اتاپ ءوتتى. ەركىن قوعام – ادامزات وركەنيەتىنىڭ باستى جەتىستىكتەرىنىڭ ءبىرى.
«وسى جىلدار ىشىندە قازاقستان وسى يدەالعا ەلەۋلى تۇردە باعىت الدى جانە سول العان قارقىنىن جالعاستىرىپ كەلەدى», دەپ تۇيىندەدى ق.ءمامي.
«ەگەمەن-اقپارات»