كاسىپكەر بەكسەيىت سارسەكباەۆ

قاراپايىم ۇلگى رەتىندە ايتايىق, جاڭاقورعان اۋدانى م.نالىباەۆ اۋىلىنىڭ تۇرعىنى بەكسەيىت سارسەكباەۆ ءارى-ءسارى بولىپ جۇرگەن ادامدارعا جاقسى ۇلگى بولا الادى. ول «اتامەكەن» ۇلتتىق كاسىپكەرلىك پالاتاسىنان ەكى ميلليون تەڭگە نەسيە الادى دا, سول قارجىسىنىڭ مۇرتىن بۇزباستان 550 تاۋىق, 100-گە جۋىق كۇركەتاۋىق ساتىپ الادى. وسى ماقسات ءۇشىن ارنايى سالىپ العان قورا-جايىندا باعىپ, باسىن كوبەيتىپ وتىر. بۇگىنگى جاڭا تەحنولوگيالار تاۋىقتىڭ كۇرك بولعاندىعىن كۇتپەي-اق ارناۋلى اپپاراتتارمەن بالاپان باستىرا بەرەدى. كاسىپكەر تابيعي جولمەن كوبەيتۋ جاعىنا دا كوڭىل اۋدارادى. قازىر ول ەكى-ءۇش مىڭ بالاپان باسىن باعىپ-قاعۋ ءۇشىن جىلى قورا سالىپ جاتىر. قاجەتتى نەگىزگى دارۋمەندەر رەسەي نارىعىندا بولعانىمەن, ونىڭ دا ويابى تابىلار دەگەن نيەتتە.

ءوزىنىڭ دە جەرى بار كاسىپكەر جۇگەرى القابىن ۇلعايتپاق. ازىرگە وزگە شارۋالاردان كەرەگىن ايىرىپ وتىر. قۇس شارۋاشىلىعى تاڭەرتەڭ الباردان جايىلىمعا ايداپ شىعاراتىن, سىرتىنان بايقاستاپ كەشكە قورالايتىن مال ەمەس, ءوزىنىڭ باسقا قىزىق-شىجىعى جەتەدى. قاجەتتى ورتاشا جىلۋ ساقتالۋ كەرەك. كۇركەتاۋىققا جاقسى باپ كەرەك. بالاپان كەزىندە وتە ءنارانجۋ بولادى. تۇمسىعى قاتتىلاۋ جەرگە تيسە دە كوزى الارىپ قۇلاپ قالا بەرەدى. ال وسكەن سوڭ ناعىز جانى ءسىرى قۇسىڭىز وسى. ايازدى كۇندەرى جەلگە كەۋدەسىن توسىپ, سۋىق سورعان سايىن سەمىرەدى. ونىڭ ۇستىنە كىشىگىرىم توقتى-تورىمداي بولاتىن كۇركەتاۋىقتان تۇسەتىن پايدا دا جاقسى.

بۇگىندە قازاقستان ۇلان-عايىر جەرى بولا تۇرا ءوزىن اۋىلشارۋاشىلىق ونىمدەرىمەن تولىق قامتىپ وتىر دەپ ماقتانا المايمىز. مۇنى ەلباسىمىز دا ءجيى ايتادى. ۇكىمەتكە وسىعان قاتىستى ناقتى تاپسىرمالار بەرىلىپ وتىر. وكىنىشكە قاراي, سىرتتان تاسىمالداناتىن ونىمدەر وتە كوپ. ەگەر اۋىلدا تۇراتىن, تاۋەكەلدىڭ قايىعىنا قايمىقپاستان مىنەتىن بەكسەيىت سياقتى ازاماتتار كوپ بولسا, بۇل قازاقتىڭ اسىعى الشىسىنان تۇسەر ەدى-اۋ دەپ ويلادىق. جۇمىس جوق دەپ بالا-شاعاعا بەرىلەتىن جاردەماقىعا كوز سۇزەتىن جىگىتتەرگە وي تۇسە مە دەپ. اقشانى قايدان الامىن دەيتىندەي ەمەس, بەكسەيىت سياقتى ورتاشا شارۋالار جولىن كورسەتىپ وتىر.

باقتيار تايجان,

«ەگەمەن قازاقستان»

قىزىلوردا وبلىسى