«ارسەنال» فۋتبول كومانداسىنىڭ باس باپكەرى ارسەن ۆەنگەر ماۋسىم سوڭىندا قىزمەتىنەن كەتەتىنىن مالىمدەدى.
«كلۋب باسشىلىعىمەن اقىلداسا كەلە وسى ماۋسىمنىڭ سوڭىندا كلۋبتان كەتۋ تۋرالى شەشىم قابىلدادىم. بىرنەشە جىل بويى الەمنىڭ ەڭ ۇزىك كومانداسىن جاتتىقتىرعانىما قۋانىشتىمىن. كلۋبقا بار كۇش-جىگەرىمدى سالدىم جانە ادال جۇمىس ىستەدىم دەپ ايتا الامىن. بارشا جانكۇيەر قاۋىمعا, فۋتبولشىلارعا العىسىمدى ايتامىن», دەيدى ارسەن ۆەنگەر.
فرانتسيالىق مامان 22 جىلدىڭ ىشىندە «ارسەنالمەن» بىرگە 17 كۋبوك جەڭىپ العان. ءۇش رەت انگليا چەمپيونى اتانىپ, جەتى رەت انگليا كۋبوگى مەن انگليا سۋپەركۋبوگىن جەڭىپ العان. ۆەنگەر اعىلشىن پرەمەر-ليگاسىندا جاتتىقتىرۋشى رەتىندە 823 ماتچ وتكىزىپ, اپل تاريحىندا رەكورد ورناتقان. ەكىنشى ورىندا «مانچەستەر يۋنايتەد» كلۋبىنىڭ بۇرىنعى جاتتىقتىرۋشىسى الەكس فەرگيۋسون (810) تۇر.
ال كلۋب باسشىلىعى جاڭا باپكەر جاقىن ارادا تاعايىندالاتىنىن, وعان دەيىن رەسمي تۇردە ەشنارسە حابارلانبايتىنىن جەتكىزدى.
انگليا چەمپيوناتىنىڭ 33-تۋرىنان كەيىن «ارسەنال» التىنشى ورىندا كەلەدى. تۋرنيرلىك كەستەدە بەسىنشى ورىندا كەلە جاتقان «چەلسيدەن» توعىز ۇپاي قالىپ كەلەدى. سونىمەن قاتار ەۋروپا ليگاسىنىڭ جارتىلاي فينالىندا يسپانيانىڭ «اتلەتيكوسىمەن» كەزدەسەدى.
«ارسەنالعا» دەيىن فرانتسيانىڭ «نانسي» (1984-1987), «موناكو» (1987-1994) جانە جاپونيانىڭ «ناگويا گرامپۋس» (1995-1996) كوماندالارىنا جەتەكشىلىك ەتتى.