باتىس قازاقستان وبلىسى اۋماعىندا 461 مەملەكەتتىك ورگاندا 4427 مەملەكەتتىك قىزمەتشى شتاتى بار. بۇل قىزمەتتەردە 4166 ادام ەڭبەك ەتىپ ءجۇر. ولاردىڭ 17-ءسى «بولاشاق» باعدارلاماسىمەن شەتەلدە وقىسا, تاعى 17-ءسى – قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنان تۇلەپ ۇشقان.
وسى جانە باسقا ماسەلەلەردى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ باتىس قازاقستان وبلىسى بويىنشا دەپارتامەنتىنىڭ باسشىسى, ادەپ جونىندەگى كەڭەس توراعاسى بولات يساقوۆ وڭىرلىك كوممۋنيكاتسيالار قىزمەتىندە وتكەن بريفينگتە جۋرناليستەرگە ايتىپ بەردى. ءباسپاسوز ءماسليحاتىندا دەپارتامەنتتىڭ بيىلعى 3 ايداعى جۇمىسى قورىتىندىلاندى.
جىل باسىنان بەرى وڭىردە اكىمشىلىك مەملەكەتتىك بوس لاۋازىمدارعا 413 كونكۋرس وتكىزىلگەن ەكەن. الايدا سىناققا قاتىسقان 439 ۇمىتكەردىڭ 225-ءى عانا جەڭىمپاز بولعان. وسى ۋاقىتتا زاڭدىلىقتى ءبىلۋ باعىتىنداعى تەستىلەۋگە 502 ادام قاتىسىپ, تەستىلەۋدەن 213 كانديدات ءوتىپتى.
– مەملەكەتتىك قىزمەت تۋرالى زاڭنامانىڭ قولدانىلۋىن جانە قىزمەتتىك ادەپتىڭ ساقتاۋىن تەكسەرۋ كەزىندە 209 زاڭ بۇزۋشىلىق انىقتالدى, – دەيدى بولات يساقوۆ.
وڭىردەگى ادەپ جونىندەگى كەڭەس اي سايىن وتىرىس وتكىزەدى. جىل باسىنان بەرى وتكەن 3 كەڭەستە 17 ماسەلە قارالىپتى. ونىڭ التاۋى – تارتىپتىك ىستەر. ناتيجەسىندە مەملەكەتتىك قىزمەتكە كىر كەلتىرەتىن تارتىپسىزدىك تەرىس قىلىققا جول بەرگەنى ءۇشىن جانە ادەپ كودەكسى تالاپتارىن بۇزعانى ءۇشىن 4 مەملەكەتتىك قىزمەتشىگە تارتىپتىك جازا قولدانۋ ۇسىنىلعان.
ادەپ جونىندەگى كەڭەستىڭ الداعى وتىرىسىندا ۇلتتىق ەكونوميكا مينيسترلىگى تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتى باتىس قازاقستان وبلىسى بويىنشا دەپارتامەنتىنىڭ باسشىسى م.وسپانوۆتىڭ ءىسى قارالاتىن بولدى. جاقىندا YouTube ارناسىندا مۇرات وسپانوۆتى ورال قالاسىنداعى تۇنگى كلۋبتاردىڭ بىرىنەن كوتەرىپ شىعارىپ الىپ بارا جاتقاندىعىن بەينەلەگەن بەينەروليك جارىق كورگەن ەدى.
– كەشە مەن بۇل ماسەلەگە قاتىستى تارتىپتىك ءىس قوزعاۋ تۋرالى بۇيرىققا قول قويدىم. م.وسپانوۆتىڭ وزىنەن وقيعاعا قاتىستى تۇسىنىكتەمە الىندى. ءبىز الداعى ۋاقىتتا دەپارتامەنت باسشىسىنىڭ ءىسىن بقو ادەپ جونىندەگى كەڭەس وتىرىسىندا قارايتىن بولامىز, – دەدى ب.يساقوۆ.
باتىس قازاقستان وبلىسىندا 2018 جىلدىڭ العاشقى ءۇش ايىندا تۇرعىندارعا 1007705 مارتە مەملەكەتتىك قىزمەت كورسەتىلگەن ەكەن. جىل وتكەن سايىن قاعازبەن جۇمىس ازايىپ كەلەدى. بۇل سالاداعى قاعاز اينالىمى بىلتىرعى 24%-دان 18,7%-عا تومەندەگەن. ال ەلەكتروندى فورماتتاعى قىزمەت بارلىق قىزمەتتىڭ 44,3%-ىن قۇراپ وتىر.
ايماقتا جىل باسىنان بەرى تۇرعىنداردىڭ وزىنە-ءوزى قىزمەت كورسەتەتىن 104 پۋنكت جانە ستۋدەنتتەرگە قىزمەت كورسەتۋ ورتالىعى اشىلعان.
2018 جىلدىڭ ءى توقسانىندا وڭىردەگى 8 مەملەكەتتىك ورگاندا سىبايلاس جەمقورلىق جاساۋعا ىقپال ەتەتىن سەبەپتەر مەن جاعدايلاردى انىقتاۋ ءۇشىن سىرتتاي تالداۋ جۇرگىزىلگەن. ناتيجەسىندە سىبايلاس جەمقورلىققا اپارۋى مۇمكىن 35 فاكتور انىقتالعان.
قازبەك قۇتتىمۇرات ۇلى, «ەگەمەن قازاقستان»
باتىس قازاقستان وبلىسى