« ۇلىس وڭ بولسىن! اق مول بولسىن!» استاناداعى تاۋەلسىزدىك سارايىندا قازاقستاننىڭ ىسكەر ايەلدەر قاۋىمداستىعىنىڭ ۇيىمداستىرۋىمەن وتكەن ناۋرىز مەرەكەسى ءدال وسى تىلەكپەن باستالدى.
ءىس-شاراعا قازاقستان رەسپۋبليكاسىنىڭ ەڭبەك سىڭىرگەن ءارتىسى مايرا ىلياسقىزى, ەلىمىزدەگى ءتۇرلى ەلشىلىكتەردىڭ مۇشەلەرى, «نۇر وردا» فولكلورلىق ءانسامبلى قاتىستى.
– ناۋرىز مەرەكەسىن سوڭعى ون جىل بويى ۇزبەي تويلاپ كەلەمىز. بۇل حالقىمىزدىڭ ۇلىق مەرەكەسى. بۇل جيىنعا ەلىمىزدەگى شەتەلدىك ەلشىلەردىڭ وتباسىلارى دا قاتىسىپ وتىر. سوندىقتان نەگىزگى ماقساتىمىز – ۇلىق مەيرامىمىزدى ۇلىقتاپ قانا قويماي, شەتەلدىك قوناقتارعا ءتول مەرەكەمىزدى, سالت-ءداستۇرىمىزدى كەڭىنەن تانىستىرۋ, ناسيحاتتاۋ, – دەدى ىسكەر ايەلدەر قاۋىمداستىعىنىڭ باسشىسى راۋشان سارسەمباەۆا.
بۇل مەيرام جەر مەن كوكتىڭ بۋسانىپ, قىستاي جاۋعان قاردىڭ كوبەسى سوگىلىپ, كۇن كۇن مەن ءتۇن تەڭەلگەن ۋاقىتتا تويلانعان. وتكەنگە كوز جۇگىرتەر بولساق, دانا حالقىمىز ۇلىق مەرەكەنى ءبىر ايعا دەيىن اتاپ وتكەن ەكەن. ۇيىمداستىرۋشىلار وسىنى نەگىزگە الا وتىرىپ, ارقا تورىندەگى كۇن جىلىنعان ءساتتى كۇتكەن بولسا كەرەك.
سالتاناتتى جيىننىڭ نەگىزگى بولىگىندە «نۇر وردا» ءانسامبلى جينالعان قاۋىمعا كۇيدەن شاشۋ شاشتى. سونىمەن قاتار قۇدا ءتۇسۋ, قىزدىڭ جاساۋىن دايىنداۋ, سەكىلدى سالت-داستۇرىمىزدەن كورىنىستەر قويىلدى. ال مايرا ىلياسقىزى ۆالس كورولى ءشامشى قالداياقوۆتىڭ «باقىت قۇشاعىندا», «شاقىرادى كوكتەم» اندەرىن ورىنداپ, كورەرمەندەردى ىستىق ىقىلاسقا بولەدى.
– بۇل جيىندا ناۋرىزدىڭ ەڭ باستى قۇندىلىقتارى ناسيحاتتالادى. سونداي-اق ۇرپاقتار ساباقتاستىعى ساقتالماق, ياعني مۇندا ەڭبەكتەگەن بالادان, ەڭكەيگەن قارتقا دەيىن قاتىسىپ وتىر. ۇلكەنگە قۇرمەت, كىشىگە ىزەتتىلىكتىڭ ۇلگىسىن ايگىلەمەكپىز, – دەدى قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمىنىڭ ورىنباسارى ءلاززات سۇلەيمەن.
بۇل كەشتىڭ ەرەكشەلىگى سول, ۇيىمداستىرۋشىلار كەلگەن قوناقتاردىڭ قۇرمەتىنە ارناپ ءسان كورسەتىلىمىن, ۇتىس ويىندارىن وتكىزدى. ءسان كورسەتىلىمى بارىسىندا ادەمى تىگىلگەن باس كيىم, كويلەك يەلەرى ءتۇرلى سىيلىقتارمەن ماراپاتتالدى. ال ۇتىس ويىندارى كەزىندە اعىلشىن ءتىلىن تەگىن ۇيرەنۋ كۋرستارىنا, بالالار كۇتىمىنە ارنالعان ءتۇرلى سەرتيفيكاتتار, وزگە دە باعالى زاتتار تابىس ەتىلدى.
ايان ءابدۋالي, «ەگەمەن قازاقستان»