قوستاناي وبلىسىنىڭ اكىمى ارحيمەد مۇحامبەتوۆ تاران جانە جىتىقارا اۋداندارىنداعى بوگەت جانە سۋ قويمالارىنداعى جاعدايدى تەكسەردى.
تاران اۋدانىندا اكىم ايات وزەنىنىڭ جاعاسىندا سالىنىپ جاتقان بوگەتتى بارىپ كوردى. بوگەتتى سالۋعا وبلىس بيۋدجەتىنەن 116,4 ملن تەڭگە قاراجات بولىنگەن. قۇرىلىس جۇمىستارى بيىل قازان ايىنا قاراي ءبىتۋى ءتيىس. ارحيمەد مۇحامبەتوۆ نىساندى مەرزىمىندە ساپالى ەتىپ تاپسىرۋ تالابىن قويدى.
جىتىقارا اۋدانىندا ءۇش سۋ قويماسى بيىل كۇردەلى جوندەلەدى. جوعارى شورتاندى جانە تومەنگى شورتاندى سۋ قويمالارىن جوندەۋگە 154,4 ميلليون تەڭگە بولىنگەن. ەكى سۋ قويماسى دا 1962 جىلى پايدالانۋعا بەرىلگەن, دەپ جازادى قازاقپارات.
ءوڭىر باسشىسىنىڭ ايتۋىنشا, مامىردا جوندەۋ جۇمىستارى باستالادى. قالامەن جاپسارلاس ورنالاسقان سۋ قويماسىن جوندەۋ اسا ۇلكەن جاۋاپكەرشىلىكتى تالاپ ەتەدى.
نىساننىڭ مەردىگەر ۇيىمى جۇمىستاردى مەرزىمىندە ءارى ساپالى اياقتايتىنىن جەتكىزدى. مەرزىم - 2018 جىلدىڭ تامىزى.
ايتا كەتەيىك, گيدروتەحنيكالىق نىسانداردى جوندەۋگە وبلىس بيۋدجەتىنەن جالپى 317,7 ملن تەڭگە بولىنگەن.