سەمەي قالاسى اكىمىنىڭ شەشىمىمەن تاڭەرتەڭنەن بەرى مۇزدى جارۋ جۇمىستارى جۇرۋدە. تۇرعىندار بۇل تۋرالى تولىق اقپاراتتاندىرىلدى. تۇيەمويناق ارالىنىڭ تۇرعىندارى بولسا, ولار تۇرىپ جاتقان جەردەگى سۋ دەڭگەيى 304 باعاناسىنا تۇسكەندىكتەن ۇيلەرىنە قۋانا قايتىپ جاتىر ەكەن. ءسويتىپ «تۋريست» قوناقۇيىنەن تۇيەمويناقتاعى ۇيلەرىنە 34 ادام قايتا ورالعان. ولارمەن شقو تج دەپارتامەنتىنىڭ پسيحولوگى جۇمىس جاساعان. ەرتىستەگى ەكى جارىلىستان سوڭ مۇز تومەن سىرعىپ, ونىڭ ۇستىنە بۇگىن جاڭبىر تولاسسىز قۇيىپ, تومەنگى شاعىن اۋدانداردى سۋ باسىپ كەتتى. ازاماتتىق قورعانىس سالاسى, قالا اكىمدىگى ماماندارىنىڭ مالىمەتىنشە, تاڭەرتەڭنەن بەرى 600 جانە 900 كيلوگرامدىق جارىلعىش زاتتار قولدانىلعان.
ەستەرىڭىزگە سالا كەتسەك, ەرتىس باسسەيندىك ينسپەكتسياسىنىڭ باسشىسى قازىمبەك بايماعامبەتوۆ 28-ءىنشى ناۋرىز كۇنى وبلىس اكىمى دانيال احمەتوۆتىڭ قاتىسۋىمەن وتكەن جينالىستا ءشۇلبى سەس-ىنەن اسقان سۋ داعدارىستىق دەڭگەيدە جىبەرىلگەنىن تىكەلەي راستاعان ەدى. وعان دەيىن بۇل فاكتىنى قالا اكىمى ەرماك ءسالىموۆ انىقتاپ, وبلىس نازارىنا ۇسىندى. قالا باسشىسىنىڭ انىقتاعان دەرەكتەرى دۇرىس بولىپ شىقتى. وبلىس اكىمىنىڭ ءباسپاسوز قىزمەتىنىڭ دەرەگىنە سۇيەنسەك, وسكەمەندە وتكەن جيىندا ەرتىس باسسەيندىك ينسپەكتسياسىنىڭ باسشىسى قازىمبەك بايماعامبەتوۆتىڭ ايتقانىنداي, ءشۇلبى سەس-ىندەگى جاۋاپسىزدىق وزدەرىنىڭ كىناسىنەن بولىپ وتىر. ناۋرىزدىڭ 1-ءى كۇنىنەن باستاپ, كولەمى ۇلعايعان سۋ ناۋرىزدىڭ 23-26-سى كۇندەرى تولاسسىز جاۋعان جاڭبىر ەسەبىنەن ۇلعايىپ, جان--جاقتان كەلەتىن اعىستار كوبەيگەن. ءسويتىپ ءشۇلبى سەس-ىندە سۋدىڭ جوعارى جاعىنداعى كورسەتكىشى 239 74-كە جەتىپتى.
-شامادان تىس ءۇش ەسە ارتىق كولەمدە سۋ جىبەرۋ تۋرالى شەشىمدى جەرگىلىكتى اتقارۋشى ورگانمەن كەلىسۋدى ءجون كورمەگەن اتالمىش ينسپەكتسيانىڭ جۇمىسى ناشار,- دەپ باعالادى وبلىس اكىمى دانيال احمەتوۆ. سونىڭ سالدارىنان مىڭداعان ادامنىڭ ومىرىنە قاۋىپ تونگەن.
وسىنداي جاۋاپسىزدىق پەن نەمقۇرايدىلىق كەسىرىنەن ادەتتە داعدارىس دەڭگەيى 450 سم قۇرايتىن سەمەيدەگى ەرتىس وزەنىنىڭ سۋى تۇندە ەڭ جوعارى - 525 سانتيمەترگە جەتىپتى. بۇگىندە سۋ باسۋ فاكتىسى بويىنشا توتەنشە جاعداي جاريالانعان وڭىردە پروكۋراتۋرا تەكسەرۋ جۇمىستارىن جۇرگىزۋدە.
شقو تج دەپارتامەنتىنىڭ باسشىسى نۇرلان مادياروۆ ەرتىستەگى مۇزداردىڭ جاعدايىن كورۋ ءۇشىن تىكۇشاقپەن بىرنەشە رەت تەكسەرۋ جۇمىستارىن اۋەدەن باقىلاپ, جۇرگىزۋدە.
-ءبىزدىڭ رەداكتسياعا لودوچنايا اۋدانىنداعى پورتوۆايا كوشەسىنىڭ تۇرعىندارى حابارلاستى,-دەدى قالالىق «سپەكتر» گازەتىنىڭ باس رەداكتورى دىنمۇحامەد بەيسەمباەۆ,-بارىپ قاراساق, بۇكىل كوشە سۋ استىندا قالىپتى. ءتىپتى تج باسقارماسىنان دا ادامدار ءالى كەلمەگەن ەكەن. ولار نە ىستەرلەرىن بىلمەي وتىر. ءبىز فوتوسۋرەتكە ءتۇسىرىپ كەلدىك.
راۋشان نۇعمانبەكوۆا
Cۋرەتتەر دىنمۇحامەد بەيسەمباەۆتىكى.
سەمەي