بىلتىرعى كوكتەمدە اقتوبەدە ايتا قالارلىقتاي تاسقىن قاۋپى كۇتىلمەگەن ەدى. وكىنىشكە قاراي وسىنداي جاعداي ورىن الدى. بۇل وقىس وقيعادان جەرگىلىكتى اتقارۋشى ورگاندار مەن توتەنشە قۇرىلىمدار ءتيىستى ساباق العانى انىق. سوندىقتان دا بيىلعى جىلى وڭىردە تاسقىن سۋدى زارداپسىز وتكىزۋدىڭ بارلىق شارالارى بەلگىلەندى. ءبىر جاعادان باس, ءبىر جەڭنەن قول شىعارا ءبىلۋدىڭ ءتيىمدى تەتىكتەرى ىزدەستىرىلدى. ياعني تاس-ءتۇيىن دايىندىق بار. الايدا قاۋىپ-قاتەردىڭ قايدان شىعا كەلەرىن الدىن الا ايتۋ وڭايعا تۇسە قويمايدى.
الدىن الا جاسالعان ەسەپتەرگە قاراعاندا, ايماقتاعى سۋ قويمالارىنىڭ سىيىمدىلىعى قار سۋىن قابىلداۋعا قاۋقارلى. ايتسە دە ناۋرىز ايىندا ءوڭىر اۋماعىنا بۇكىل قىس كەزىندە تۇسپەگەن مول قار جاۋعانىن ەسكەرسەك, بۇل دەرەككە سەنىپ قالۋعا بولمايتىنىن, سوندىقتان قاجەتتى جاعدايدا شۇعىل تاكتيكالىق گيدروينجەنەرلىك شەشىم قابىلداۋعا تۋرا كەلەتىنىن ەرىكسىز سەزىنەسىز. سونىڭ ىشىندە ايماقتاعى اقتوبە سۋ قويماسىنىڭ ەرنەۋىنەن سۋ لىقىلداپ, سىرتقا توگىلىپ كەتپەسىنە ءدال قازىرگى كۇندەرى ەشكىم كەپىلدىك بەرە المايدى.
اقتوبە وبلىستىق توتەنشە جاعدايدار دەپارتامەنتىنىڭ باسشىسى باۋىرجان سىزدىقوۆ وسىنداي جاعدايدىڭ ورىن الۋى مۇمكىن ەكەنىن جوققا شىعارمايدى. بۇل تىعىرىقتان شىعۋدىڭ جولى سۋدىڭ كوتەرىلۋى جونىندەگى مالىمەتتەردى ۇدايى جاڭعىرتىپ تۇرۋ. سۋ تاسقىنى سياقتى توتەنشە جاعدايلار كەزىندە بۇگىنگى مالىمەت ەرتەڭگە ولشەم بولا المايدى.
بيىل اقتوبە ايماعىندا ءدال وسىنداي قۇبىلىس بايقالادى. ناۋرىزدىڭ 26-نا دەيىن مۇندا اۋا رايى 5-10 گرادۋس سالقىندىقتى كورسەتىپ, قار سول كۇيى جاتتى. ال سوڭعى ەكى-ءۇش كۇندە قار كۇرت ەري باستادى. بۇل جاعداي تاسقىن سۋ قاۋپىن تۋعىزباي قويمايدى. ءارى اۋا رايىنىڭ تەز جىلىنىپ, تەز قۇبىلۋى بۇعان دەيىن جاسالعان بىرقاتار ەسەپتەر مەن تالداۋلاردىڭ تاس-تالقانىن شىعارۋى دا ابدەن مۇمكىن. ونىڭ ۇستىنە ماماندار بيىلعى قىستا پايدا بولعان توڭ قاباتى وتكەن جىلمەن سالىستىرعاندا الدەقايدا قالىڭ ەكەنىن مالىمدەدى. بۇل جاعداي وڭىردە تاسقىن سۋ بولۋى ىقتيمالدىعىنىڭ باستى فاكتورى رەتىندە قاراستىرىلۋدا.
تەمىر قۇسايىن, «ەگەمەن قازاقستان»
اقتوبە