قانشا ايتىلىپ, جازىلىپ كەلە جاتسا دا, وبلىس ورتالىعىندا الا-قۇلا اتاۋلاردان ءالى كوز سۇرىنەدى. جۇرتشىلىق تاراپىنان ايتىلاتىن سىن-پىكىرلەردەن قورىتىندى شىعارىلۋدىڭ ورنىنا كەرىسىنشە ۇدەپ بارا جاتقان سەكىلدى.
تاۋەلسىزدىك العانىمىزعا وتىز جىلعا جۋىق ۋاقىت وتسە دە انا ءتىلىمىزدىڭ بۇگىنگى كەيپى ءالى كۇنگە دەيىن بوساعادان سىعالاپ, تورگە وزا الماي تۇرعان مۇشكىل ءحالىن كوزگە ەلەستەتەدى. وعان مىسالداردى ونداپ, جۇزدەپ كەلتىرۋگە بولادى. جيىرماسىنشى شاعىن اۋداندا ورنالاسقان ءزاۋلىم ساۋدا نىساندارىنىڭ «ازان شاقىرىپ» قويعان اتتارى – «كورونا», «سۋلپاك», «اپورت», «سەمەينىي»... وسىلاي جالعاسىپ كەتە بەرەدى. ءتىپتى پەتروپاۆل قالاسىن شەتەلدىڭ شاھارلارىمەن شاتاستىرىپ الۋ وپ-وڭاي. ارينە ادەمىلىگى, ساندىلىگى جاعىنان ەمەس. ءتىل مۇكىستىگى, ۇلتتىق رەڭك بويىنشا! بىلتىر وسى ماڭايدا «مەگا» ساۋدا, ويىن-ساۋىق ورتالىعى بوي كوتەردى. ماڭدايشالارعا جازىلعان, قاعىلعان اتاۋلار قانداي دەسەڭشى: «دەتسكي مير», «ەلەكترونيكا», «مەچتا», «Cinema park», «City mall», «Magnum Atak», «رادۋجنىي»...بىردە-ءبىر قازاقشا ات ەمگە تابىلمايدى.
جەرگىلىكتى اياقدوپ شەبەرلەرى ونەر كورسەتەتىن فۋتبول كومانداسى «قىزىل-جار سك» دەپ اتالادى. دۇرىسى «قىزىلجار سق» عوي دەپ جانكۇيەرلەر قۇدايدىڭ زارىن ايتىپ, قانشا قاقساسا دا «باياعى جارتاس – ءبىر جارتاستىڭ» كەبىمەن مەلشيگەن قالپى تۇر. قوناقۇي اتاۋى «قىزىل جار»!؟ پەتروپاۆل اراق-شاراپ زاۋىتىنىڭ برەندىنە اينالعان «قىزىل-جار» الكوگولدى ىشىمدىگىن «اقاڭا» ىقىلىق اتا تويىپ العان ء«بىر مىرزا» جازا سالعانداي اسەر قالدىرادى. ءبىر ۇعىمدى اڭعارتاتىن جەر اتاۋىنىڭ قالاي جازىلاتىنىن ءبىلۋ سونشالىقتى قيىن با؟
بۇرىندارى جاڭا قۇرىلىمدارعا اتاۋ بەرىلگەندە قازاق ءتىلى ەرەجەسىنىڭ ساقتالۋى ەجىكتەي تەكسەرىلەتىن. سوڭعى كەزدەرى وسى قاتاڭ جاۋاپكەرشىلىك باسەڭسىگەن بىلەم, ءتىل تۋرالى زاڭ تالاپتارىنا ءجۇردىم-باردىم قاراۋشىلار جاۋىننان كەيىنگى ساڭىراۋقۇلاقتاي كوبەيىپ بارادى. جارعىلىق قۇجاتتاردى تىركەۋدەن وتكىزەتىن ادىلەت باسقارماسى ماماندارىنىڭ ماسەلەنىڭ بايىبىنا تەرەڭدەپ بارماۋىنا قاراعاندا قۇرىلتايشىلاردىڭ ءوتىنىش-تىلەكتەرىن قاناعاتتاندىرۋمەن عانا شەكتەلەتىن سياقتى. مۇنداي كوزقاراسپەن ءتىلىمىزدىڭ كوسەگەسى كوگەرمەسى انىق. بۇل جەردە «كىم قالاي اتاعىسى كەلسە ەركى, قۇقى» دەگەن ءۋاج جۇرمەۋى ءتيىس. ءدال وسىنداي كوزقاراستى ۇستانساق, اتاۋلاردىڭ مۇلدەم شۇبارلانىپ كەتپەسىنە, جازباق تۇگىل ايتۋعا ۇيالاتىن, نامىسقا تيەتىن اتاۋلاردىڭ جارنامالانباسىنا كىم كەپىل؟
ءومىر ەسقالي, «ەگەمەن قازاقستان» سولتۇستىك قازاقستان وبلىسى