ء«اربىر وتباسىنا باسپانا الۋدىڭ جاڭا مۇمكىندىكتەرىن بەرۋ». ەل پرەزيدەنتى نۇرسۇلتان نازارباەۆ ءوزىنىڭ ۇندەۋىندە وسىنداي مىندەت قويىپ وتىر.
حالىقتىڭ تۇرعىن ءۇي جاعدايىن جاقسارتۋ ماقساتىندا, تاۋەلسىزدىك جىلدارىندا ەلىمىزدە كوپتەگەن باعدارلامالار قابىلداندى. سونىڭ ىشىندە «قولجەتىمدى باسپانا-2020» باعدارلاماسى اياسىندا مەملەكەتتىك قىزمەتكەرلەر, بيۋدجەت سالاسىنىڭ ماماندارى از قامتىلعان جانە جاس وتباسىلار, ءبىر سوزبەن ايتقاندا, ءتۇرلى كاتەگورياداعى ازاماتتار تۇرعىن ۇيگە جەڭىلدىكتەرمەن قول جەتكىزگەن بولاتىن. قازىرگى كەزدە «نۇرلى جەر» باعدارلاماسى حالىق اراسىندا ۇلكەن تانىمالدىلىققا يە بولدى. سەبەبى «نۇرلى جەر» اياسىندا تۇرعىندارعا پاتەرمەن بىرگە, جەكە تۇرعىن ءۇي الۋ مۇمكىندىگى دە بەرىلىپ وتىر. ۇندەۋدە كەلتىرىلگەن دەرەكتەردە وتكەن جىلى عانا ەلىمىزدە 11,2 ميلليون شارشى مەتر تۇرعىن ءۇيدىڭ پايدالانۋعا بەرىلگەنى ايتىلادى. راسىمەن دە, بۇل – رەكوردتىق كورسەتكىش.
دەسە دە, تۇرعىن ءۇي كەزەگىندە تۇرعان ازاماتتار سانىنىڭ جىل ساناپ كوبەيۋى, ماسەلەنىڭ ءالى دە بولسا شەشىمىن تاپپاي وتىرعانىن كورسەتەدى. بۇل رەتتە ەلباسى نۇرسۇلتان نازارباەۆتىڭ «7 – 20 – 25» باعدارلاماسىن ۇسىنۋى تىڭ باستاما دەر ەدىم. بۇل ەلىمىزدىڭ شىن مانىندەگى الەۋمەتتىك مەملەكەتكە اينالعانىن كورسەتەدى. پرەزيدەنت ءوز ۇسىنىسىندا نەسيە ءوسىمىنىڭ مولشەرلەمەسىن قازىرگىدەي 14-16 ەمەس, جىلىنا 7 پايىزدان اسىرماۋدى جانە باستاپقى جارنا قۇنىنىڭ 20 پايىزدان اسپاۋىن تاپسىرىپ وتىر. بۇل قاراپايىم ازاماتتار ءۇشىن وتە ءتيىمدى قادام. ءبىزدىڭ ازاماتتارىمىزدا اقشا جيناۋ مادەنيەتى قالىپتاسۋدا. دەمەك, باسپاناعا جول جەڭىلىرەك بولادى.
نۇربول قۇرمان, قازاقستاننىڭ «تۇرعىن ءۇي قۇرىلىس جيناق بانكى» اق اتىراۋ وبلىستىق فيليالىنىڭ ديرەكتورى