بەلگىلى عالىم, ۇلتتىق عىلىم اكادەمياسىنىڭ اكادەميگى مىرزاتاي سەرعاليەۆ – قاق-سوقتان اۋلاق, جاستاردىڭ كوڭىلىن جىقپاي, تىلەگىن قابىل الىپ جۇرەتىن قاراپايىم قازاق ەدى.
ول قازىرگى ءسانتۇرلى ساۋالعا جۇك بولىپ, كەيدە جۇيكەنى توزدىرعان ءتىل مادەنيەتىن زەرتتەگەن, زەردەلەگەن عالىم بولاتىن. ءتىل قۇدىرەتىن, ءتىل كوركەمدىگىن سارالاپ, سويلەگەن ساتتە ءھام كوركەم دۇنيەگە قولدانۋ بارىسىندا ءتىلدىڭ حالىقتىق ۇلگىسىن بۇزباۋ – عىلىمي جۇمىسىنىڭ نەگىزگى ارقاۋى بولدى. ءسوز ۇستاعان جىراۋلار مەن جىرشىلاردىڭ, قالام تەربەگەن قالامگەرلەردىڭ مۇراسىن تەرەڭ بارلاپ, انا ءتىلىن قادىر تۇتقان عالىم سوڭىنا مول مۇرا قالدىردى. ونىڭ نەگىزگى باعىتى كوركەم ادەبيەت ءتىلى مەن ستيليستيكا نەگىزدەرىنە سينتاكسيس ماسەلەلەرىنە ارنالدى. ول ءتىل عىلىمىمەن بىرگە جازۋشىلىقتى دا قاتار الىپ ءجۇردى. وي الەمىنەن قانات قاعىپ, ءومىر كوشىمەن جاراسىم تاپقان شىعارمالارى كوپشىلىكتىڭ كوڭىلىنەن شىعىپ, وڭ باعاسىن الدى.
ايتۋلى عالىمنىڭ 80 جىلدىعىنا وراي, «سەرعاليەۆ ساباقتارى-2018» اياسىندا «رۋحاني جاڭعىرۋ جانە ءتىل ءبىلىمى ماسەلەلەرى» اتتى حالىقارالىق عىلىمي-تەوريالىق كونفەرەنتسيا ەلورداداعى ەۋرازيا ۇلتتىق ۋنيۆەرسيتەتىندە ءوتتى. كونفەرەنتسيانى ۋنيۆەرسيتەتتىڭ پرورەكتورى, پروفەسسور ديحان قامزابەك ۇلى اشىپ, عالىمنىڭ ءومىر جولىنا ەڭبەكتەرىنە توقتالسا, پروفەسسور نۇرگەلدى ءۋالي ءسوز مادەنيەتىنە ەرەكشە ءمان بەرگەنىن تىلگە تيەك ەتتى. ال فيلولوگيا عىلىمدارىنىڭ دوكتورى گۇلدارحان سماعۇلوۆا اكادەميك م.سەرعاليەۆتىڭ ازاماتتىق جانە عالىمدىق تۇلعاسىن تۋرالى تولعانىپ پروفەسسور باعدان مومىنوۆا قازاق تىلىندەگى گيبريد سوزدەر بويىنشا عالىمنىڭ زەرتتەۋلەرىنە ءۇڭىلدى. پروفەسسور شەرۋباي قۇرمانباي ۇلى قازىرگى باق تىلىندەگى بۋدان اتاۋلارعا قاتىستى بايلامىن اكادەميك تالداۋلارىمەن ۇشتاستىرا وتىرىپ, ناقتى مىسالدارعا جۇگىندى. سول سەكىلدى پروفەسسور سارقىت ءالىسجان قازاق ستيليستيكاسىنىڭ ساردارى تۋرالى ءتۇيىندى پىكىرىن جەتكىزىپ, ۇستاز الدىنداعى شاكىرتتىك قارىزى مەن پارىزى تۋرالى وي تەربەدى. ال اكادەميكتىڭ جارى زاۋرەش سەرعاليەۆا كونفەرەنتسيانى ۇيىمداستىرعان ازاماتتارعا العىسىن ءبىلدىردى.
القالى باسقوسۋ سەكتسيالاردا جالعاسىپ, اكادەميكتىڭ وقۋ-زەرتحاناسىندا قورىتىندىلاندى.
سۇلەيمەن مامەت,
«ەگەمەن قازاقستان»