ەلباسى كىتاپحاناسى مۋزەيىنىڭ عيماراتىندا سۋرەتشى مۇراتبەك جولامانوۆتىڭ (1966–2000) «رۋحپەن سىرلاسۋ» كورمەسى اشىلدى. كورمە ەلباسىنىڭ «رۋحاني جاڭعىرۋ» باعدارلاماسىنىڭ اياسىندا ۇيىمداستىرىلدى.
ەلباسى كىتاپحاناسى ديرەكتورىنىڭ ورىنباسارى ءامىرحان راحىمجانوۆ ءوزىنىڭ العى سوزىندە:
– سۋرەتشىنىڭ كورمەگە قويىلعان 30-دان استام جۇمىسى تەرەڭ مازمۇنىمەن جانە جارقىندىعىمەن ەرەكشەلەنەدى. بىرەگەي تۋىندىلاردىڭ مازمۇنى ەلباسىنىڭ «رۋحاني جاڭعىرۋ» باعدارلاماسىنىڭ نەگىزگى باعىت-باعدارىمەن ۇندەس. اۆتوردىڭ قاي شىعارماسىن الىپ قاراساق تا, تاريحي تاقىرىپتار مەن اقىنداردىڭ كوڭىل كۇمبىرىنە بويلاي قالام تارتقان عاجايىپ تۋىندىلاردا ءبىزدىڭ ۇلتتىق بىرەگەيلىگىمىز, تۋعان ەلگە دەگەن شىنايى پاتريوتتىق سەزىمدەرىمىز ايشىقتالا تۇسكەن. مۇراتبەك جولامانوۆ جارىق جۇلدىزداي وتاندىق بەينەلەۋ ونەرىنىڭ شىڭىنا ءىزىن قالدىردى. بۇل عاسىرلار توعىسىنداعى قازاقستاننىڭ كوركەم ونەرىنىڭ ەرەكشە ءبىر قۇبىلىسى ەكەنى داۋسىز. حح عاسىردىڭ 90-جىلدارىنىڭ سوڭىندا قىلقالام شەبەرى ءداۋىر بەينەسىنە اينالعان وبرازداردى دۇنيەگە اكەلدى, – دەدى.
سۋرەتشىنىڭ جۇبايى گۇلجامىش جولامانوۆا ونىڭ ەرەكشە تالانتىنا توقتالدى:
– مۇراتبەكتىڭ تۋىندىلارىنىڭ نەگىزگى تاقىرىپتارى – قازاق حالقىنىڭ تاريحى. ونىڭ ارمانى – تۋعان ەلىنىڭ, حالقىنىڭ سان قىرلى ءارى عاجايىپ تاريحىن كارتينا ارقىلى جەتكىزۋ ەدى. اتا-بابادان قالعان مول رۋحاني قازىنانى كەلەر ۇرپاققا قاستەرلەپ قالدىرۋدى ويلادى. ول ەجەلگى تاريحىمىزدى تەرەڭنەن زەردەلەپ, سودان سوڭ عانا كارتينا سالۋ جۇمىسىنا كىرىسەتىن. مۇقاڭ ءوز ەلىنىڭ ناعىز پاتريوتى. قازىر ءبىز رۋحاني جاڭعىرۋ تۋرالى كوپ ايتىپ ءجۇرمىز. ونىڭ كارتينالارى تاريحتىڭ تەرەڭىنە بويلاپ, رۋحقا تاعزىم ەتۋدىڭ جارقىن مىسالى. مۇراتبەكتىڭ كوركەمدىك شەبەرلىگى – ءوز الدىنا بولەك اڭگىمە. ارامىزدان كەتكەنىنە 18 جىل بولسا دا, ونىڭ شىعارماشىلىعى بۇگىنگى جاستارعا قىزىقتى ءارى ونەر سۇيەر قاۋىم اراسىندا وزەكتىلىگىن جويعان جوق. كارتينا جازۋ مانەرى مەن تەحنيكاسى ءوز زامانىنان وزىق بولدى. ول ەشقاشان تاپسىرىسپەن جۇمىس جاسامايتىن, تەك شارىقتاعان شابىتى عانا كەرەمەت تۋىندىلاردى دۇنيەگە اكەلۋگە سەبەپشى بولدى.
كورمەنىڭ اشىلۋ راسىمىنە قر پارلامەنتى ءماجىلىسىنىڭ دەپۋتاتتارى, مەملەكەت جانە قوعام قايراتكەرلەرى, قازاقستاننىڭ سۋرەتشىلەر وداعىنىڭ مۇشەلەرى قاتىستى.
قر ەڭبەك سىڭىرگەن قايراتكەرى, قازاقستاننىڭ سۋرەتشىلەر وداعىنىڭ مۇشەسى, حالىقارالىق كاسىبي سۋرەتشىلەر وداعىنىڭ مۇشەسى (بريۋسسەل), نانكين كوركەمسۋرەت ۋنيۆەرسيتەتىنىڭ قۇرمەتتى پروفەسسورى (قحر), «كاۆالەر يسكۋسستۆا» التىن وردەنىنىڭ يەگەرى سەمبىعالي سماعۇلوۆ ءوزىنىڭ شاكىرتى م. جولامانوۆتىڭ تۇلعالىق قاسيەتتەرى تۋرالى ايتىپ بەردى:
– مۇراتبەك جولامانوۆتىڭ قىسقا, بىراق وتە جارىق عۇمىرى شىعارماشىلىق ىزدەنىستەر مەن باستامالارعا تولى بولدى. ول ءوزىن ءتۇرلى جانرلاردا بايقاپ كوردى. ءوز باسىم جاس سۋرەتشىلەردىڭ وسى قاسيەتتەرىن جوعارى باعالايمىن. مۇراتبەكتى جانىبەك پەن كەرەي حاندار, ماحامبەت, سىرىم باتىرلار سىندى ۇلى تاريحي تۇلعالار قىزىقتىراتىن. شىعارماشىلىق سامعاۋىنىڭ ەرتە ۇزىلگەنى وكىنىشتى, الايدا مۇراتبەك ارتىنا مول شىعارماشىلىق مۇرا قالدىردى. ونىڭ ءومىرى بۇگىنگى وسكەلەڭ ۇرپاق ءۇشىن ءوز وتانىنا قالتقىسىز قىزمەت ەتۋدىڭ جارقىن مىسالى بولارى ءسوزسىز.
م.ت. جولامانوۆ باتىس قازاقستان وبلىسىنىڭ جوسالى اۋىلىندا دۇنيەگە كەلگەن. 1990 جىلى و. تاڭسىقباەۆ اتىنداعى كوركەمسۋرەت كوللەدجىنىڭ «كەسكىندەمە» ءبولىمىن, ال 1996 جىلى ت. جۇرگەنوۆ اتىنداعى قازاق ۇلتتىق ونەر اكادەمياسىن بىتىرگەن. سۋرەتشى اكادەميك ك. تەلجانوۆ پەن پروفەسسور م. قالىموۆتان ءبىلىم العان. وقۋ ۇزدىگى رەتىندە مۇراتبەك تاۋفيك ۇلىن ت. جۇرگەنوۆ اتىنداعى قازاق ۇلتتىق ونەر اكادەمياسىندا, «اكادەميالىق كەسكىندەمە» كافەدراسىندا ساباق بەرۋگە قالدىرادى. وسى جىلدار ارالىعىندا سۋرەتشى كوپتەگەن رەسپۋبليكالىق جانە حالىقارالىق كورمەلەرگە دە قاتىستى. قازىرگى كەزدە شەبەردىڭ جۇمىستارى تۇركيا, پولشا, انگليا, كورەيا سىندى ەلدەردىڭ مۋزەيلىك جانە جەكە قورلارىندا ساقتاۋلى.
مۇراتبەك جولامانوۆ كارتينالارىنىڭ سيۋجەتى مەن بەينەلەرى قارقىندى وزگەرىستەگى الەمدە, وزىندىك جاڭعىرۋ ساتىسىن باستان كەشىپ وتىرعان قوعامنىڭ كۇندەلىكتى اعىمىندا وزەكتى بولا تۇسكەن.
كورمەدە قازاقستان حالقىنىڭ ۇلتتىق يگىلىگى بولىپ تابىلاتىن سۋرەتشىنىڭ 30-دان استام جۇمىسى ۇسىنىلدى.
كورمە 2018 جىلدىڭ 27 ناۋرىزىنا دەيىن جالعاسادى.