ەلباسىنىڭ حالىققا ارناعان جولداۋىندا 2030 جىلعا قاراي قازاقستانداعى بالامالى ەنەرگيا ۇلەسىن 30 پروتسەنتكە جەتكىزۋ كەرەكتىگىن تاپسىرعان بولاتىن. وسىعان بايلانىستى وبلىس اكىمى ج.تۇيمەباەۆ حالىق الدىنداعى ەسەپتىك جيىندا ءوندىرىستى دامىتۋعا قولايلى جاعداي جاساپ, وبلىس تۇرعىندارىن قاجەتتى ينفراقۇرىلىممەن قامتۋ باستى باعىتتاعى جۇمىستاردىڭ ءبىرى ەكەنىن ايتا كەلە, وڭىردە بيىل جاسىل ەكونوميكاعا بايلانىستى 6 جوبا جۇزەگە اساتىنىن جەتكىزدى.
سونىڭ ءبىرى سارىاعاش اۋدانى جىلعا اۋىلدىق وكرۋگىندەگى كۇن ەلەكترستانساسى. سارىاعاشتا قۇنى 14 ملرد تەڭگەنى قۇرايتىن بۇل جوبانى قولعا العان «EcoProTech-Astana» جشس-ءى ساعاتىنا 20 مۆت ەلەكتر قۋاتىن ءوندىرۋدى كوزدەيدى. بۇگىندە قۇرىلىس جۇمىستارىنىڭ جالپى جەر اۋماعى 41 گەكتار اۋماقتى الىپ جاتىر. Cتانتسيانىڭ قۇرىلىس جۇمىستارى وتاندىق ينۆەستوردىڭ قارجىسى ەسەبىنەن جۇرگىزىلۋدە. بۇل وندىرگەن ەلەكتر قۋاتىنىڭ باسىم بولىگىن تەمىرجول سالاسىنا باعىتتايتىن العاشقى ستانسا بولعالى تۇر.
«بۇل جاسىل ەكونوميكانى دامىتۋعا باعىتتالعان ماڭىزدى قادام. كۇردەلى جوبانىڭ قۇرىلىسىن «DAY ENERGY GmbH» كومپانياسى جۇرگىزۋگە كىرىستى. ساپالى ەلەكتر قۋاتىن وندىرۋگە ارنالعان ستانسا نەگىزىنەن نەمىس ەلىنىڭ تاجىريبەلەرىن قولدانادى», - دەدى «EcoProTech-Astana» جشس-ءنىڭ ديرەكتورى نازيرجون تەميروۆ.
بۇدان بولەك, وبلىستا تولەبي اۋدانىندا قۋاتى 2,5 مۆت بولاتىن «كەڭەس» شاعىن سۋ ەلەكتر ستانساسى سالىنادى. سونداي-اق, جەتىساي قالاسىندا 10,7 گا اۋماققا قۋاتى 4,8 مۆت بولاتىن كۇن ەلەكتر ستانساسىنىڭ قۇرىلىسى جۇرگىزىلمەك. ال, بايدىبەك اۋدانىندا قۋاتى 40 مۆت جانە وتىرار اۋدانىندا جالپى قۋاتى 135 مۆت كۇن ەلەكتر ستانسالارى بوي كوتەرەدى.
ايتا كەتەيىك, وبلىستا قازىردىڭ وزىندە جالپى قۋاتى 10,22 مۆت-تى قۇرايتىن 10 جاڭارتىلاتىن ەنەرگيا كوزدەرىنىڭ نىسانى بار. ونىڭ 4-ءى كۇن ەلەكتر ستانساسى, 5-ءى شاعىن سۋ ەلەكتر ستانساسى جانە 1-ءى بيوگاز قوندىرعىسى. وسىنىڭ ەسەبىنەن وبلىستى جاڭارتىلاتىن ەنەرگيا كوزدەرىمەن قامتۋ دەڭگەيى 2017 جىلى 2,7 پايىز بولسا, 2018 جىلى بۇل كورسەتكىشتى 3,1 پايىزعا جەتكىزۋ كوزدەلۋدە.