قازاقستاندىق «FLY JET.KZ» جانە «Jet Airlines» اق اۆياكومپانيالارى ەۋروپاعا ۇشۋعا رۇقسات بەرۋ راسىمىنەن ءوتتى, دەپ حابارلايدى يدم ازاماتتىق اۆياتسيا كوميتەتى Facebook پاراقشاسىندا.
«FLY JET.KZ» جانە «Jet Airlines» اق اۆياكومپانيالارى ەۋروپاعا ۇشۋعا رۇقسات بەرۋ پروتسەدۋراسىنان ءوتتى. بۇگىنگى تاڭدا جەتى وتاندىق اۋە كومپانيا ەۋروپالىق وداق ەلدەرىنە ۇشۋ مۇمكىندىگىنە يە بولىپ وتىر. بۇدان بۇرىن «Air Astana» اق, «Prime Aviation» اق, «كاز Air Jet» اق, «Comlux-KZ» جشس, «SCAT» اۋە كومپانيالارى ۇشۋ قاۋىپسىزدىگى بويىنشا ەۋروپالىق اگەنتتىكتىڭ (EASA) اۆتوريزاتسيا راسىمىنەن وتكەن بولاتىن. ەسكە سالا كەتەيىك, قازاقستاندىق اۋە كومپانيالاردان ەۋروپاعا ۇشۋ شەكتەۋلەرى تولىعىمەن الىنىپ تاستالعان», دەلىنگەن حابارلامادا.
ەۋروپالىق وداققا رەيستەر ۇشىرۋ ماقساتىندا ءۇشىنشى ەلدەردىڭ پايدالانۋشىلارى ءۇشىن 2014 جىلدىڭ ءساۋىر ايىندا ەۋروپالىق كوميسسيا (تسو) ولارعا مىندەتتى تۇردە رۇقسات بەرۋ تالاپتارىن ەنگىزدى. اتالمىش اۆتوريزاتسيالاۋ پروتسەدۋراسىن ۇشۋ قاۋىپسىزدىگى (EASA) جونىندەگى ەۋروپالىق اگەنتتىك جۇزەگە اسىرادى. رۇقسات بەرۋ راسىمىنە سايكەس, پايدالانۋشى ۇشاتىن كۇنىنە دەيىن EASA-عا ءوتىنىش بەرۋلەرى كەرەك.