ورال قالاسىنىڭ ىرگەسىندەگى ورتاعاسىرلىق جايىق شاھارىنىڭ اۋماعىندا, جەلتاۋ بيىگىندە قۇسبەگىلەر اراسىندا «قانسونار-2018» رەسپۋبليكالىق ءتۋرنيرى ءوتتى.
مۇنداي شارا باتىس قازاقستان وبلىسىندا تۇڭعىش رەت ۇيىمداستىرىلىپ وتىر. شاراعا قازاقستاننىڭ ءار وڭىرىنەن – اتىراۋ, ماڭعىستاۋ, اقمولا, الماتى, جامبىل, قاراعاندى, قىزىلوردا وبلىستارىنان, استانا مەن الماتى قالاسىنان جيىرماشاقتى قۇسبەگى قاتىسۋدا. ءبىر قىزىعى, ىرگەدە ءوتىپ جاتقان دۋماننان قالعىسى كەلمەي, رەسەيدىڭ كورشىلەس سامارا, تولياتتي, ۋليانوۆ قالالارىنان قارشىعا مەن يتەلگى باپتاپ جۇرگەن قۇسبەگىلەر دە جولعا شىققان ەكەن. قىزىل كىتاپقا ەنگەن قۇستارىن شەكارادان وتكىزبەي, تەك وزدەرى كەلۋگە ءماجبۇر بولعان شەتەلدىك قوناقتار ورالداعى قۇسبەگىلەر سايىسىنىڭ ۇيىمداستىرىلۋىنا, ەل-جۇرتتىڭ ىقىلاسىنا ەرەكشە قىزىعۋشىلىقپەن قاراپ ءجۇردى.
– وسىنداي تۋرنير بىلتىر ماڭعىستاۋ مەن اتىراۋ وبلىسىندا ءوتتى. بيىلعى شارا باتىس قازاقستان وبلىسى باسشىلىعىنىڭ قولداۋىمەن ءوتىپ وتىر. مۇنى قۇسبەگىلىك ءداستۇردىڭ ەلىمىزدىڭ باتىس وڭىرىندە قايتا جاندانۋى دەپ ايتۋعا بولادى. ورالداعى ۇلتتىق سپورت مەكتەبى جانىنان قۇسبەگىلىك ءبولىمى اشىلادى دەپ سەنەمىز, – دەدى ۇلتتىق سپورت تۇرلەرى قاۋىمداستىعىنىڭ ءى ۆيتسە-پرەزيدەنتى ەرلەن وسپانوۆ.
جالپى, بۇل شارانى نەگىزگى ۇيىمداستىرۋشى – باتىس قازاقستان وبلىستىق سپورت باسقارماسى بولعانىمەن, وڭىردەگى تۋريزم جانە سىرتقى بايلانىستار باسقارماسى, «اتامەكەن» ۇلتتىق كاسىپكەرلەر پالاتاسىنىڭ وڭىرلىك فيليالى, قوعامدىق ۇيىمدار مەن جەكەلەگەن بەلسەندى ازاماتتار قۇسبەگىلەر سايىسىنىڭ جالپىحالىقتىق مەرەكەگە اينالۋىنا كوپ ۇلەس قوستى. جان-جاقتى جارناما مەن ناسيحاتتىڭ ناتيجەسىندە بۇل شارانى كورۋ ءۇشىن رەسەي فەدەراتسياسىنىڭ استراحان, ساراتوۆ, سامارا, ورىنبور وڭىرلەرىنەن, قازاقستاننىڭ وزگە وبلىستارىنان ارنايى تۋريستەر كەلگەن.
سايىستىڭ العاشقى كۇنى قۇسبەگىلەر ىرىكتەۋ كەزەڭىنەن ءوتتى. ەرتەڭىنە اقتىق باسەكە-فينالدا قىراندار شىرعا سالۋ, اڭعا ءتۇسۋ سەكىلدى سىننان ءوتتى. ايتا كەتەيىك, «قانسونار-2018» رەسپۋبليكالىق قۇسبەگىلەر ءتۋرنيرىنىڭ 200 مىڭ تەڭگەلىك باس جۇلدەسىن ورالدىق كاسىپكەر-مەتسەنات, «سايات» ەتنو-تۋريستىك ورتالىعىنىڭ قۇرىلتايشىسى مۇرات جاكىباەۆ تىككەن.
تۋرنير قورىتىندىسىندا ءىىى ورىن كوكشەتاۋدان كەلگەن بەرگەنباي تاستامبەك پەن استانالىق سەرىكبەك كۇنتۋعانعا بۇيىرسا, ءىى ورىندى جامبىلدىق باقداۋلەت باباجان جەڭىپ الدى. ال «نارىن» اتتى قىرانىمەن بارلىق باسەكەدە وزگە ارىپتەستەرىنەن باسىم تۇسكەن اتىراۋلىق ارمان قوشقاروۆقا ءتۋرنيردىڭ باس جۇلدەسى بۇيىردى.
قازبەك قۇتتىمۇرات ۇلى, «ەگەمەن قازاقستان»
باتىس قازاقستان وبلىسى