استانادا ساراپتاما ۇيىمدارى پالاتاسىنىڭ جالپى جيىنى ءوتتى. وندا پالاتا مۇشەلەرى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كاسىپكەرلىك قىزمەتتى رەتتەۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا ساراپتاما قىزمەتى بويىنشا ەنگىزىلمەك كەيبىر تۇزەتۋلەرگە قاتىستى پىكىرلەرىن ءبىلدىردى.
تارقاتا ايتار بولساق, قازىرگى تاڭدا «100 ناقتى قادام» ۇلت جوسپارىنىڭ 47-قادامىنا سايكەس, قۇرىلىس جوبالارىنا ساراپتاۋ جۇرگىزۋدى باسەكەلەستىك ورتاعا بەرە وتىرىپ, مەملەكەتتىك مونوپوليادان بىرتىندەپ باس تارتۋ قاراستىرىلۋدا. جيىندا ايتىلعانداي, اتالعان ماسەلەگە بايلانىستى بۇگىندە پارلامەنت ءماجىلىسىنىڭ قاراۋىندا جاتقان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كاسىپكەرلىك قىزمەتتى رەتتەۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى اياسىندا ساۋلەت, قالا قۇرىلىسى جانە قۇرىلىس قىزمەتىنە (سققجقق) ساراپتاما جۇرگىزۋ ىسىنە قاتىستى بىرنەشە تۇزەتۋلەر ۇسىنىلعان.
پالاتا مۇشەلەرى بۇل تۇزەتۋلەردىڭ بىرقاتارىن ورىنسىز دەپ سانايدى. ماسەلەن, «پالاتا – ءبىرتۇتاس كوممەرتسيالىق ەمەس ۇيىم» ۇعىمىن الىپ تاستاپ, بىرنەشە پالاتا قۇرۋ, جوبالاردى ساراپتاۋ سالاسىنداعى مەملەكەتتىك مونوپوليا سۋبەكتىسىن, ساراپتاما جۇرگىزۋگە ارنالعان ءبىرتۇتاس پورتال مەن اقپاراتتىق جۇيە جاساۋعا بايلانىستى قىزمەتتەر مەن جۇمىستاردى ۇسىنۋ بويىنشا قوسىمشا قىزمەتتەرمەن قامتاماسىز ەتۋ جانە پالاتا جارعىسىن وكىلەتتى ورگانمەن كەلىسىمدەۋ باعىتىندا ۇسىنىلعان تۇزەتۋلەر پالاتا مۇشەلەرىن الاڭداتۋدا. ناقتىلاي ايتقاندا, اتالعان ۇيىم مۇشەلەرى ساراپتاما قىزمەتى سالاسىنىڭ السىرەۋىنە, كاسىبي دەڭگەيى تومەن پالاتالاردىڭ پايدا بولۋىنا جانە ۇلت جوسپارىنىڭ 47-قادامىن ساپاسىز اتقارۋعا اكەپ سوقتىراتىن, جوعارىدا اتالعان تۇزەتۋلەردى ءجونسىز دەپ ەسەپتەيدى.
سونداي-اق جيىندا ەلىمىزدە باسەكەلەستىك ورتاعا بەرىلگەن ساراپتاما جۇمىستارىنىڭ كولەمى 2018 جىلدىڭ 1 قاڭتارىندا 63 پايىزدى قۇراپ وتىرعانى دا ايتىلدى. ساراپتاما قورىتىندىلارىنا كەشەندى تالداۋ كورسەتكەندەي, 2017 جىلى اككرەديتتەلگەن ساراپتاما ۇيىمدارىنا 11981 جوبا تۇسسە, ونىڭ 7682-ءسى بويىنشا قورىتىندى بەرىلىپ, 2196-سى سول كۇيى قاراۋسىز قايتارىلعان جانە 664 جوباعا بايلانىستى كەلىسىمشارتتار بۇزىلعان.
پالاتا باسقارماسى اپپاراتىنىڭ قىزمەتكەرلەرى پارلامەنت قابىرعاسىنداعى, «اتامەكەن» ۇلتتىق كاسىپكەرلەر پالاتاسى الاڭىنداعى جۇمىس توپتارىنا بەلسەنە قاتىسىپ, قۇرىلىس ىستەرى جانە تۇرعىن ءۇي-كوممۋنالدىق شارۋاشىلىعى كوميتەتىنىڭ عىلىمي-تەحنيكالىق كەڭەسىنىڭ جۇمىسىنان دا قول ۇزبەگەن. پالاتا قىزمەتىنىڭ باعىتتارىنىڭ بىرىندە, 2017 جىلى جوبالاردى ساراپتاۋدا وزىندىك رەتتەۋ قۇرالىن ەنگىزۋگە كوڭىل بولىنگەن. بۇل ماقساتتا شەتەلدىك تاجىريبە زەردەلەنىپ, ەل زاڭناماسى تالدانعان. ناتيجەسىندە زاڭنامانى جەتىلدىرۋ جونىندە ۇسىنىستار دايىندالعان.
بىلتىر پالاتا «ساتىپ الۋلار تۋرالى» زاڭدى بۇزۋ (83 ارىز), باعالىق ۇسىنىستار (47), بايقاۋلار (34), نورماتيۆتىك-قۇقىقتىق اكتىلەردى بەلدەن باسۋ جايتتارى جونىندە مەملەكەتتىك ورگاندارعا جۇگىنگەن. ناتيجەسىندە بىرنەشە ساراپتاما ۇيىمى مارتەبەسىندەگى جاۋاپكەرشىلىگى شەكتەۋلى سەرىكتەستىكتەر قىزمەتى كۇماندى جەتكىزۋشىلەر تىزىمىنە كىرگىزىلگەن.
وتكەن جىلى قازاقستان ەكولوگيالىق اۋديتورلار پالاتاسىمەن جانە رەسەي قۇرىلىس ساراپشىلارى پالاتاسىمەن ىنتىماقتاستىق جايلى مەموراندۋمعا وتىرعان ساراپتاما ۇيىمدارىنىڭ پالاتاسى حالىقارالىق اۋقىمدا دا بەلسەنە قيمىلداۋدا. پالاتا باسقارماسى تۇراقتى تۇردە وزىنە مۇشە ۇيىمدارداعى ماماندار مەن ساراپشىلاردىڭ بىلىكتىلىگىن كوتەرۋگە قاتىستى سەمينارلار مەن كۋرستار وتكىزىپ كەلەدى. ماسەلەن, 2017 جىلى 5 سەمينار ۇيىمداستىرىلىپ, 10 ادىستەمەلىك قۇرال جاسالعان. بيىل پالاتا ۇجىمى, وزدەرىنە قاتىستى زاڭ باپتارى مەن نورماتيۆتىك-قۇقىقتىڭ اكتىلەردى جەتىلدىرۋگە كۇش سالۋدى جالعاستىرىپ, دەربەس ەلەكتروندىق اقپاراتتىق جۇيەسىن دۇنيەگە اكەلمەك. ءارى قاراي ول www.epsd.kz ءبىرتۇتاس ەلەكتروندىق پورتالىنا بىرىكتىرىلمەك. پالاتانى ءوز الدىنا قىزمەتىن رەتتەي الاتىن بەلدى ۇيىمدارعا اينالدىرىپ, قۇرىلىس جوبالارى ساراپتاماسىن باسەكەلەستىك ورتاعا تابىستاۋ دا ءجىتى نازاردا بولماق.
جيىن قورىتىندىسىندا رەۆيزيالىق كوميسسيانىڭ, ساراپتامالىق جانە تارتىپتىك كەڭەستىڭ, وڭىرلەردەگى وكىلدەردىڭ, رەيتينگتىك كوميسسيانىڭ ەسەبى تىڭدالدى.
ايتا كەتەيىك, اتالعان پالاتا ۇلت جوسپارى مەن «قازاقستان رەسپۋبليكاسىنداعى ساۋلەت, قالا قۇرىلىسى جانە قۇرىلىس قىزمەتى تۋرالى» زاڭدى (سققجقق) جۇزەگە اسىرۋ ماقساتىندا, تىكەلەي «اتامەكەن» ۇكپ قاتىسۋىمەن 2016 جىلدىڭ اقپان ايىندا «ساراپتاما ۇيىمدارىنىڭ پالاتاسى» اتاۋىمەن اككرەديتتەلگەن ساراپتاما ۇيىمدارىنىڭ كاسىبي بىرلەستىگى رەتىندە قۇرىلعان بولاتىن. قازىرگى ۋاقىتتا بۇل پالاتاعا اككرەديتتەلگەن 97 ساراپتاما ۇيىمى مۇشە.
جولدىباي بازار, «ەگەمەن قازاقستان»