شۋاق شاشقان شۋ شاھارى

«ەگەمەن قازاقستاننىڭ» ارنايى جوباسى: جاسامپازدىق جەمىستەرى جيىرما جىلدىڭ ىشىندە اتقارىلعان يگى ىستەردىڭ ارقاسىندا ءاربىر ءوڭىرىمىز وزگەرىپ, ءومىرىمىز جاقسارىپ كەلەدى. «ەگەمەن قازاقستان» گازەتى وسىنداي وركەندى وزگەرىستەردى بەينەلەيتىن ماتەريالداردى تۇراقتى جاريالاپ تۇرادى. تومەندە جامبىل وبلىسى شۋ اۋدانىنداعى شۋ قالاسىنان فوتورەپورتاج بەرىلىپ وتىر.

شۋاق شاشقان شۋ شاھارى

شۋ اۋدانىندا وتكەن 9 ايدا 10,5 ميلليارد تەڭگەنىڭ اۋىلشارۋاشىلىق ونىمدەرى ءوندىرىلدى. بۇل وتكەن جىلدىڭ ءتيىستى ۋاقىتىمەن سالىس­تىر­عاندا 365,8 ميلليون تەڭگەنىڭ ونىمدەرى ار­تىق شىعارىلعانىن كورسەتەدى. مۇندا اۋىل­شا­رۋا­شىلىق تا­ۋارلارىن وندىرۋشىلەرگە قولداۋ كور­سەتىپ, قارجىلاي كومەك بەرۋ جۇيەسى دە جاقسى جولعا قويىلعان. سوندىقتان اگرو­ونەر­كاسىپ كەشەنى سالاسىندا الداعى جىلدارى كوپ­تە­گەن جاڭا جوبالاردى باتىل ىسكە اسىرۋ كوز­دەلۋدە. ءوڭىردىڭ وركەن جايىپ, اۋىل مەن اۋدان اجا­رىنىڭ اشىلا تۇسۋىنە بۇگىندە شۋ قالا­سىن­داعى جىل وتكەن سايىن دامىپ كەلە جاتقان ونەركاسىپ سالاسىنىڭ تابىستارى دا كوپ ۇلەس قوسۋدا. مىسالى, بيىلعى 9 ايدا وتكەن جىل­دىڭ ءتيىستى كەزەڭىمەن سالىس­تىرعاندا, قالا ونەركاسىبى 1 ميلليارد 204 مىڭ تەڭگەنىڭ ونەر­كاسىپ ونىمدەرىن ارتىق شىعارىپتى. بۇل تا­بىستا, اسىرەسە, «قامقور لوكوموتيۆ» جشس-ءنىڭ فيليالى – شۋ تەپلوۆوز جوندەۋ زاۋى­تى­نىڭ ۇلەسى وتە مول. زاۋىت جۇمىسشىلارى تەمىر جول كولىگىن جوندەۋ جانە وعان قاجەتتى بولشەكتەر جاساۋدا تاماشا جەتىستىكتەرگە قول جەتكىزىپ جۇرگەنى بەلگىلى. ەندى, مىنە, ولار سالا باعىتىن كەڭەيتە وتىرىپ اۋىل شارۋا­شى­لىعىنا قاجەتتى «ەنيسەي-قامقور-1200نم» ماركالى كومباينىن قۇراستىرىپ شىعارا باستادى. ديحاندار قاۋىمى دىلگەر بولىپ وتىرعان مۇنداي يننوۆاتسيالىق جوبا­نىڭ باتىل قولعا الىنۋى وڭىردەگى ءوندىرىس كوكجيەگىن بۇرىنعىدان دا كەڭەيتە ءتۇستى. يندۋستريالىق-يننوۆاتسيالىق دامۋ باع­دار­لا­ماسىنىڭ ينۆەستيتسيالىق جوبالارى بو­يىنشا «ەر-تاي» جشس پوليمەتالل كەندەرى قورىن بارلاۋ ماقساتىندا قازبا جۇمىس­تارىن قولعا الىپ وتىر. بۇل سەرىكتەستىك جىل باسىنان بەرى ءونىم كولەمىن 5345,3 ميلليون تەڭگەگە جەتكىزدى. سونداي-اق, «بىرلىك ەنەرگو» جشس جىلىنا 10,0 مىڭ توننا جانار-جاعار ماي وڭدەيتىن زاۋىتتى ىسكە قوسپاقشى. «بىرلىك» اۋى­لىندا تاۋلىگىنە 1,5 توننا سۇيىق ماي ءوڭ­دەيتىن تسەح تا جاقىن ارادا پايدالانۋعا بەرىلمەك. وڭىردە جولدار مەن ەلدى مەكەندەردەگى كوشە­لەردى جوندەۋ جۇمىستارىنا 238,8 ميلليون قاراس­تىرىلىپ, ونىڭ 74,7 ميلليون تەڭگەسى وب­لىستىق بيۋدجەتتەن ءبولىندى. قال­عان قارجى شۋلىقتاردىڭ ءوز ۇلەسى. سونىڭ ناتيجەسىندە بۇگىندە كەدىر-بۇدىر جولدار جوندەلىپ, اۋىل مەن اۋدان ورتالىعى جانە قالا اراسىنداعى قارىم-قاتىناس تۇزەلدى. «100 مەكتەپ, 100 اۋرۋحانا» باعدار­لاماسى اياسىندا جىل اياعىنا دەيىن جاڭا ۇلگىدەگى مەديتسينالىق قۇرال-جابدىقتارمەن قام­تا­ما­سىز ەتىلگەن 150 توسەكتىك اۋرۋحانا پايدالانۋعا بەرىلگەلى وتىر. سونىمەن بىرگە, ورتالىق ەمحانادان اۋرۋدىڭ الدىن الۋ جانە الەۋمەتتىك كومەك كورسەتۋ ءبولىمى اشىلىپ, وبلىستا العاشقى بولىپ حالىق تالابىنا ساي قىزمەت كورسەتە باستادى. بۇگىندە شۋ قالاسىنىڭ ىرگەتاسى قالانعا­نىنا 50 جىل تولىپ وتىر. وسى ايتۋلى مە­رەيتويدى شۋلىقتار لايىقتى اتاپ ءوتتى. اتاپ ايتساق, مەرەيلى مەرەكە سالتاناتى كەزىندە شۋ قالاسىنداعى جەڭىس ساياباعىنان كەڭەس وداعىنىڭ باتىرى ساتتار ەستەمەسوۆكە  ۇلكەن ەسكەرتكىش ورنا­تىلدى. ال تە­مىر­جولشىلاردىڭ قۇرمەتىنە قالانىڭ كىرەبەرىسىندەگى تۇعىرتاسقا كونە «وتاربا» قويىلدى. شۋ اۋدانىنان شىققان بەلگىلى كۇيشى, كومپوزيتور ءابىدمومىن جەلدىباەۆتىڭ «ەركە سىل­قىم» كۇيىن ساز ونەرىنە قۇمار جاننىڭ ءبارى بىلەدى دەسەك ارتىق ايتقاندىق بولماس. بىراق جۇرەك جىلىتىپ, جان بالقىتار اتاق­تى كۇيگە باي­لا­نىستى ءسان-سالتاناتى كەلىسكەن ارحيتەك­تۋرا­لىق ەسكەرتكىش جا­ساساق دەگەن وي وسى ۋاقىتقا دەيىن ەشكىمنىڭ باسىنا كەلمەپتى. مىنە, بۇگىندە شۋ قالا­سىنىڭ تورىنەن ورىن العان «ەركە سىل­قىم» ارحيتەكتۋرالىق كومپوزيتسيا وسى ولقى­لىق­تىڭ ورنىن تولتىرىپ تۇر دەسەك تە بولادى. شۋ وڭىرىندەگى جايساڭ جازىعىندا تۋىپ-وسكەن تولە بي بابامىز: «بەرەكە-بايلىق بىرلىگى مىقتى ەلدە بولادى» دەگەن ەكەن. دەمەك, مۇنىڭ ءبارى ەلدەگى بەرەكە-بىرلىك پەن ەكپىندى تىرلىكتىڭ ارقاسى دەپ باعالاعان ءجون. _____________________________________________ دايىنداعان «ەگەمەن قازاقستان» گازەتىنىڭ  جامبىل وبلىسىنداعى مەنشىكتى ءتىلشىسى كوسەمالى ساتتىباي ۇلى.