مەملەكەت باسشىسىنىڭ بيىلعى ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىندا ون ءتۇرلى ماڭىزدى مىندەت العا قويدى.
ول قازاقستاننىڭ يندۋسترياسىن ەڭ جاڭا تەحنولوگيالاردى ەنگىزۋدىڭ كوشباسشىسىنا اينالدىرۋ, وندىرىستىك ۇدەرىستەردى تسيفرلاندىرۋ ارقىلى ونەركاسىپتەگى ەڭبەك ونىمدىلىگىن ارتتىرۋ, ادامي كاپيتالدىڭ ساپاسىن ارتتىرۋ, رەسۋرستىق الەۋەتتى ءتيىمدى پايدالانۋ, وندىرىسكە اقپاراتتىق تەحنولوگيالىق شەشىمدەردى باتىل ەنگىزۋ, اگروونەركاسىپ كەشەنىن جاڭا تەحنولوگيالىق دەڭگەيگە كوتەرۋ, قارجى سالاسىن جەتىلدىرۋ, كولىك پەن لوگيستيكالىق ينفراقۇرىلىمدى ودان ءارى دامىتۋ مىندەتتەرىن قامتيدى.
جولداۋدىڭ جەتىنشى مىندەتىندە ادام كاپيتالىنىڭ جاڭا ساپاسى تۋرالى ماسەلەگە كوڭىل بولىنگەن. «بارلىق جاستاعى ازاماتتاردى قامتيتىن ءبىلىم بەرۋ ىسىندە ءوزىمىزدىڭ وزىق جۇيەمىزدى قۇرۋدى جەدەلدەتۋ قاجەت» دەگەن مەملەكەت باسشىسى ودان ءارى بۇل مىندەتتى شەشۋدىڭ جولدارىن ناقتىلاي تۇسەدى. جوو-لارداعى پەداگوگيكالىق كافەدرالار مەن فاكۋلتەتتەردى ودان ءارى دامىتۋ قاجەتتىگى تۋىنداپ وتىر. ءبىلىم بەرۋدىڭ بارلىق دەڭگەيىندە ماتەماتيكا جانە جاراتىلىستانۋ عىلىمدارىن وقىتۋ ساپاسىن ارتتىرۋ دا كەزەك كۇتتىرمەيتىنى اقيقات.
سونىمەن قاتار جولداۋدا جوعارى ءبىلىم بەرۋ جۇيەسىنە قاتىستى كوپتەگەن جاڭا مىندەتتەر ايقىندالىپ وتىر. مۇندا, اسىرەسە اقپاراتتىق تەحنولوگيالار بويىنشا ءبىلىم بەرۋدى بارىنشا دامىتۋ, جوعارى وقۋ ورىندارىنا ءبىلىم بەرۋ باعدارلامالارىن جاساۋعا كوبىرەك قۇقىق بەرىپ, ولاردىڭ اكادەميالىق ەركىندىگىن زاڭنامالىق تۇرعىدان بەكىتۋ قاجەتتىگى ايتىلدى. وسى ارادا وقىتۋشىلاردىڭ قايتا دايارلىقتان وتۋىنە كۇش سالىپ, جوعارى وقۋ ورىندارىنا شەتەلدىك مەنەدجەرلەردى تارتىپ, الەمدىك ۋنيۆەرسيتەتتەردىڭ كامپۋستارىن اشۋ قاجەت دەدى. وسى ورايدا قازيتۋ عىلىمي ءبىلىم كەشەنى, ياعني قازاقستان يننوۆاتسيالىق جانە تەلەكوممۋنيكاتسيالىق جۇيەلەر ۋنيۆەرسيتەتىنىڭ جۇمىسىنا توقتالا كەتكەندى ءجون كوردىم.
اكادەميالىق ۇتقىرلىق اياسىندا رەسەيدىڭ ماسكەۋ وبلىسىنداعى «دۋبنا» تابيعات, قوعام جانە ادام حالىقارالىق ۋنيۆەرسيتەتىنىڭ ماگيستراتۋرا ءبولىمىن بىتىرگەن 8 مامان ۋنيۆەرسيتەتىمىزگە كەلىپ ورنالاستى. قازىرگى ۋاقىتتا وسى وقۋ ورنىندا ءبىزدىڭ جولدامامەن 53 جاس باكالاۆريات جانە ماگيسترلەر جاتاقحانا, ستيپەنديامەن قامتىلعان, اقىسىز ءبىلىم الۋدا.
شيرەك عاسىردان بەرى مىڭداعان مامان دايىنداعان قازاقستان يننوۆاتسيالىق جانە تەلەكوممۋنيكاتسيالىق جۇيەلەر ۋنيۆەرسيتەتى, رەسپۋبليكالىق جوعارى تەحنيكالىق, ەكونوميكا جانە اقپاراتتىق تەحنولوگيالار كوللەدجدەرى ىرگەلى وقۋ ورىندارىنا اينالدى.
وقۋ ورىندارىندا مامانداردى دايىنداۋ ءۇشىن بازالىق جاقسى جاعداي جاسالىنعانىن, جاڭا دەڭگەيدەگى قۇرال-جابدىقتارمەن قامتىلعانىن, IT تەحنولوگياسى مۇمكىندىگى نەگىزىندە قۇرىلعان حاي-تەكتى, روبوتتەحنيكا لابوراتوريالار, جەلدەن ەنەرگيا الۋدىڭ اشىق الاڭىن, كۇن ەنەرگياسىن پايدالانۋ ارقىلى ىسكە اسقان گەليوەلەكتروموبيل جوباسىن, بالامالى ەنەرگيانى وندىرىسكە, تۇرمىسقا پايدالانۋدىڭ لابوراتورياسىن ايتۋعا بولادى. ۋنيۆەرسيتەت وقىتۋشىلارى ستۋدەنتتەرمەن بىرگە كۇن ساۋلەسىنەن قۋات الىپ جۇرەتىن جەڭىل اۆتوكولىك ويلاپ شىعاردى. ەسەپتەۋ تەحنيكاسى جانە باعدارلامالىق قامتاماسىزداندىرۋ, اۆتوماتتاندىرۋ, اقپاراتتىق جۇيەلەر, راديوتەحنيكا, ەلەكترونيكا جانە تەلەكوممۋنيكاتسيا ماماندىقتارى بويىنشا لابوراتوريا بازاسى تولىعىپ, باتىس قازاقستان وبلىستىق تەلەكوممۋنيكاتسيا, بايلانىس مەكەمەلەرىندە پراكتيكا وتكىزۋ جۇيەلى قولعا الىندى.
وسى بەرىلگەن جۇيەلى ءبىلىم, ناقتى پراكتيكالىق جۇمىستار ناتيجەسىندا وتكەن جىلى ەلدوس يمان-مالىكوۆ «اتامەكەن» ۇلتتىق كاسىپكەرلەر پالاتاسى ۇيىمداستىرعان ايماقتىق «يدەيالار جارمەڭكەسى» اتتى جوباعا قاتىسىپ, 3 000 000 تەڭگە گرانت ۇتىپ الدى. تاياۋدا الماتى قالاسىندا ستۋدەنتىمىز نۇرزادا ساقتاعانوۆ قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى ستيپەندياسىنىڭ يەگەرى اتاندى. «بيزنەستىڭ جول كارتاسى-2020» باعدارلاماسى اياسىندا «اتامەكەن» ۇلتتىق كاسىپكەرلەر پالاتاسى جانە ۇلتتىق ەكونوميكا مينيسترلىگى ۇيىمداستىرعان «بيزنەس كەڭەسشى» جوباسى بويىنشا وقىتۋ كۋرسىنا 10 ستۋدەنت جانە «جاس كاسىپكەر مەكتەبى» جوباسى بويىنشا وقىتۋ كۋرسىنا قاتىسقان 21 ستۋدەنت سەرتيفيكاتقا يە بولدى.
مۇنىڭ ءوزى وقۋ ورنى ستۋدەنتتەرىنىڭ يننوۆاتسيالىق جاڭالىقتاردى يگەرۋىنە, ءموبيلدى جانە مۋلتيمەديالىق, نانو جانە عارىشتىق تەحنولوگيانى, روبوتوتەحنيكانى, گەندىك ينجەنەريانى تانىپ بىلۋىنە, بولاشاقتىڭ ەنەرگياسىن ىزدەنۋدى ۇيرەنۋىنە باسىم باعىت بەرەتىنىن كورسەتەدى.
قازاقستاندى وزىق 30 ەلدىڭ قاتارىنا قوساتىن ناقتى باعىتتىڭ ءبىرى – اقپاراتتىق تەحنولوگيالار يندۋسترياسى, ياعني «تسيفرلى قازاقستان» باعدارلاماسى. ءبىزدىڭ كەلەشەگىمىز – تسيفرلى ەكونوميكا. تەحنولوگيالىق ءۇردىستىڭ ءار قيىرىنان كەلىپ ءتۇسىپ جاتقان اقپاراتتى دەر كەزىندە سارالاپ, سوعان سايكەس ولقىلىعى مەن تاۋەكەلدەردى جەدەل انىقتاپ, وڭتايلاندىرۋ جولىنا باعىتتايتىن اقپاراتتىق تەحنولوگيالاردىڭ باسىمدىعى كەرەك. وسىعان وراي ءبىزدىڭ ۋنيۆەرسيتەت كەلەشەكتەگى مۇراتىن تسيفرلى ەكونوميكامەن تىعىز بايلانىستىرىپ, جاڭا بيزنەس مودەلدەردى تابىستى ەنگىزە الاتىن, لايىقتى باسەكەگە توتەيتىن وسى سالانىڭ بىلىكتى ماماندارىن دايارلاۋدى باستى ماقساتقا اينالدىرىپ وتىر.
ونىڭ ناقتى مىسالى, ءبىلىم جانە عىلىم مينيسترلىگىنىڭ عىلىمي جانە عىلىمي-تەحنيكالىق جەتىستىكتەردى كوممەرتسيالاۋ ماقساتىندا «تسيفرلى قازاقستان» باعدارلاماسى نەگىزىندە «ۋنيۆەرسيتەتتەگى ۆيرتۋالدى ءبىلىم بەرۋ ورتاسى: وقىتۋشى-پروفەسسور قۇرامىنىڭ اقىلدى جۇمىس ورنى» اتتى عىلىمي جوبا بويىنشا «قازيتۋ» عىلىمي – ءبىلىم كەشەنىنىڭ قۇرامىندا «ترانس» عىلىمي-زەرتتەۋ ينستيتۋتى رەسپۋبليكالىق كونكۋرستىڭ جەڭىمپازى اتاندى. بۇل جوبانى جۇزەگە اسىرۋ بارىسىندا الىنعان ناتيجەلەر, عىلىمي نەگىزدەلگەن وزىق تەحنولوگيالار رەسپۋبليكانىڭ بارلىق ارناۋلى ورتا, جوعارى وقۋ ورىندارىنا تاراتىلادى دەپ كۇتىلۋدە.
قازىرگى جاس ۇرپاققا ءبىلىم مەن تاربيە بەرۋدە – باسەكەگە قابىلەتتى, ادامگەرشىلىگى مول, ءبىلىمدى, قوعامدا ورنى بار, جان-جاقتى دامىعان جەكە تۇلعانى قالىپتاستىرۋدا ەلباسى جولداۋى باستى باعدار بولاتىنى انىق.
اقسەرىك ءايتىموۆ,
قازاقستان يننوۆاتسيالىق جانە تەلەكوممۋنيكاتسيالىق جۇيەلەر ۋنيۆەرسيتەتىنىڭ پرەزيدەنتى,
پروفەسسور,
«قازاقستانداعى 100 جاڭا ەسىم» جوباسىنىڭ جەڭىمپازى