وبلىستا سوڭعى ءۇش جىلدا 86 سپورت نىسانى ىسكە قوسىلدى
سپورتشىنىڭ تۋا بىتكەن دارىنى, قاجىرلى ەڭبەگى, ۋاقىتپەن ساناسپاي جاسايتىن جاتتىعاۋلارى ارقاسىندا دىتتەگەن دەڭگەيدەن كورىنەتىنى بەلگىلى. ال, وسىناۋ تۇتاستىقتى قولداپ, قاناتتاندىرىپ جىبەرۋ بيىك جەتىستىكتەرگە جەتەلەۋمەن قاتار, بۇقارالىق سپورتتىڭ دا ءورىسىن كەڭىتىپ, جۇرتشىلىقتى بەلسەندىلىككە باستايتىنى انىق. بۇل تۇرعىداعى جاناشىرلىق ۇلگىسىن استانالىق وبلىستان كوپتەپ تابۋعا بولادى.
وبلىس تۋريزم, دەنەشىنىقتىرۋ جانە سپورتتى دامىتۋعا 2010 جىلى 2 ميلليارد تەڭگە ءبولدى. بۇل – 2009 جىلمەن سالىستىرعاندا 18 پايىزعا ارتىق. ەكى-ءۇش جىلدىڭ جۇزىندە كوكشەتاۋ قالاسىندا ءىرى امبەباپ سپورت سارايى, ساندىقتاۋ اۋدانىندا شاڭعى-روللەر تراسساسى, بۋراباي اۋدانىندا رەسپۋبليكالىق شاڭعى بازاسى پايدالانۋعا بەرىلدى. قازىر قولدا بار ەكى مىڭعا جۋىق سپورت نىساندارىندا جارىستار كورىگى قىزىپ تۇر. جىلعا تولمايتىن ۋاقىتتا 4 سپورت مەكتەبىن كۇردەلى جوندەۋگە 80 ميلليون تەڭگە جۇمسالسا, سپورت مەكەمەلەرىنىڭ ماتەريالدىق-تەحنيكالىق بازاسىن نىعايتۋ ماقساتىندا 29 ميلليون تەڭگە قارجى يگەرىلدى. وڭىردەگى سپورت ۇيىمدارىندا 1500 ءبىرىنشى رازريادتى سپورتشى, 157 سپورت شەبەرلىگىنە كانديدات, 29 سپورت شەبەرى, 5 حالىقارالىق دارەجەدەگى سپورت شەبەرى دايارلانسا, قازاقستان تاريحىنداعى ايرىقشا وقيعا قىسقى ازيا ويىندارىنا قاتىسقان 5 ساڭلاق التى التىن, ەكى كۇمىس, ءۇش قولا مەدالمەن قۋانتتى. بۇل سپورتتىڭ بۇقارالىق سيپاتىنا دا ەرەكشە سەرپىن بەرگەنىن اتاپ ءوتۋ لازىم. قازىرگى تاڭدا دەنەشىنىقتىرۋ جانە سپورتپەن اينالىسۋشىلار سانى 114 مىڭ ادامعا جەتىپ, وبلىس تۇرعىندارىنىڭ 16 پايىزىن قۇرادى. بيىل كوكشەتاۋدىڭ بۇقپا تاۋىنداعى شاڭعى-روللەر جولىن, قوپا كولىندە جەلكەندى قايىق سپورتىن دامىتۋ ماقساتىندا ياحت-كلۋب, اشىق جانە جابىق تەننيس كورتتارىنىڭ قۇرىلىستارى باستالدى. سالانى دامىتۋدا بيزنەس وكىلدەرى الەۋمەتتىك ارىپتەستىك قىزمەتىن ورىستەتكەنىنە ريزاشىلىق ءبىلدىرۋ قاجەت. «ەگەمەن قازاقستان» جۋىرداعى سانىندا «لوگوس ترايد» جشس ديرەكتورى, اۋىل شارۋاشىلىعى عىلىمدارىنىڭ دوكتورى عالىم قۇدايبەرگەنوۆتىڭ استراحان اۋدانىنداعى جالتىر اۋىلىنىڭ تۇرعىندارىنا امبەباپ ستاديوندى تارتۋ ەتكەنىن جازعان ەدى. ال, جاقسى اۋدانىندا قالاداعىدان كەم ەمەس سپورت كەشەنىن اشىپ, بوكستان قازاقستان چەمپيونىن تاربيەلەپ شىعارعان باتىربەك ۋاليەۆتىڭ اتىمتاي جومارتتىعى ەل اۋزىنان تۇسپەيدى. جەكە كاسىپكەر باتەكەڭ بيىل بۋرابايدا سپورت بازاسىنىڭ قۇرىلىسىن اياقتاپ, وندا ەل قۇراما كومانداسىنىڭ بىلعارى قولعاپ شەبەرلەرى جاتتىعۋلار وتكىزۋدە. بيىلعى سپورت فورۋمىنا دەلەگات بولىپ قاتىسقان كاسىپكەر ەربول توقاەۆ كوكشەتاۋ قالاسىندا «قايرات» مامانداندىرىلعان قازاق كۇرەسى سپورت زالىن ءوز قاراجاتىنا سالىپ بەردى. ەلگە قىزمەت ەتۋدىڭ ۇلگى-قىرلارىن تانىتىپ وتىرعان تالعات ءالجانوۆتىڭ, زۋفار سەراجيەۆتىڭ, تالعات تەمىرعاليەۆتىڭ, يگور تسويدىڭ ەڭبەكتەرىنە دە گۇل ءبىتسىن دەگىمىز كەلەدى. ءسوز سوڭىندا, تامىزدا, قازاقستان تاۋەلسىزدىگىنىڭ 20 جىلدىق مەرەيتويى قۇرمەتىنە 64 جاستاعى اناتولي پولياكوۆ پەن تەمىر حامزين كوكشەتاۋ قالاسىنداعى 6 شاقىرىمدىق بۇقپا كولىن العاش رەت ءجۇزىپ وتكەنىن مۇباراك حابار رەتىندە جەتكىزگىمىز كەلەدى.باقبەرگەن امالبەك.
اقمولا وبلىسى.