مايقايىڭ كەنتى باياناۋىل اۋدانىنا قارايدى. اينالاسى تولى ءوندىرىس ورىندارى. كەنتتە قازىر 9044 ادام تۇرسا, ونىڭ ىشىندە 3 مىڭعا جۋىعى مونعوليادان كوشىپ كەلگەن اعايىندار. بىلتىر كەنتتە 129 ءسابي دۇنيەگە كەلىپتى. وڭتۇستىكتەن قونىس اۋدارعان 4 وتباسىنا ءۇي بەرىلىپ, جۇمىسقا ورنالاسقان.
مۇنداعى ءوندىرىس ورىندارى كەنتكە قامقور, جۇيە قۇراۋشى كاسىپورىندار سانالادى. كەنتتىڭ جىلۋ قۇبىرى سۋمەن جابدىقتايتىن ەكىباستۇز – مايقايىڭ ارالىعىنداعى سۋ تاراتقىش, كەنت ىشىلىك سۋ تاراتقىش قۇبىرلارى ۋاقىتشا سەنىمگەرلىك باسقارۋعا «مايقايىن التىن» اق-قا بەرىلگەن. كارىز جۇيەلەرىمەن «اۋحال» جشس جۇمىس جۇرگىزۋدە. جۋىردا مايقايىڭدا «نۇربوبەك» بالاباقشاسى اشىلدى. ونىڭ قۇرىلىسىن مەردىگەر «ب-ادك» سەرىكتەستىگى جۇرگىزدى.
بالاباقشا مەڭگەرۋشىسى روزا عالىمجانوۆانىڭ ايتۋىنشا, اتا-انالاردىڭ دەنى «مايقايىڭ التىن» اق كەن بايىتۋ كومبيناتىندا, باسقا دا كەنىشتەردە ەڭبەك ەتەدى. سوندىقتان كەنشىلەر وتباسى ەرەكشە قۋانىشتى. ەندى 110 بالا جاس ەرەكشەلىكتەرىنە قاراي 6 توپقا ءبولىنىپ تاربيەلەنەدى. ميلانا, ارسەني, ياروسلاۆ سياقتى بالالار دا قازاق تىلىندەگى توپتارعا كەلىپتى. بۇلدىرشىندەر اراسىندا گۇلزار مۋحامماد, يۋسۋف حاسان ۇلى دەگەن تەگى پاكىستاندىق بالا دا بار. گۇلزاردىڭ اكەسى رازا حاساننىڭ ماماندىعى دارىگەر-حيرۋرگ, پاكىستاندا تۇرادى. ال اناسى ەلميرا راحمەتقىزى كەرەگەتاس كەنىشىندە قىزمەت ەتەدى. اناسى مەن اكەسى قاراعاندىدا تانىسىپ, وتباسىن قۇرعان ەكەن. بالاباقشاعا ازەربايجان بالاسى مانسۇر دا كەلىپتى.
مۇندا وقۋ جانە تاربيە جۇمىستارى مەملەكەتتىك تىلدە جۇرگىزىلەدى. اعىلشىن ءتىلى بويىنشا گۇلميرا قاماش, ورىس تىلىنەن ايدانا سەزقىزى ساباق بەرەدى. بالاباقشاداعى 24 پەداگوگتىڭ ىشىندە 15 ارناۋلى ورتا, 8 جوعارى ءبىلىمدى پەداگوگ بار. جالپى, قىزمەتكەرلەر سانى – 51. ونىڭ 43-ءى مايقايىڭ كەنتىنىڭ جۇمىسپەن قامتۋ ورتالىعىنان جىبەرىلگەن. بالالارعا بارلىق جاعداي جاسالعان. بەيىمدەۋ, دەنساۋلىقتارىن تۇزەتۋ, دامىتۋ, لوگوپەد, ۇيىرمە, پسيحولوگ كابينەتتەرى بار. الداعى ۋاقىتتا شاحمات, قولونەر, بي, سۋرەت ۇيىرمەلەرىن اشۋ جوسپارلانۋدا.
نەگىزگى باعىتىمىز – بالانىڭ جەكە تۇلعا رەتىندە دامۋىنا ءتيىمدى جاعداي تۋعىزۋ. وقۋ-تاربيە ۇدەرىسىندە اقپاراتتىق تەحنولوگيانى (كومپيۋتەرلىك, مۋلتيمەديالىق قۇرال) پايدالانامىز. اقپاراتتىق تەحنولوگيانىڭ ماقساتى تاربيەلەنۋشىلەردىڭ زەيىنىن, ءبىلىم-بىلىك داعدىلارىن قالىپتاستىرۋ, اقىل-ويىن دامىتۋعا كومەكتەسۋ, – دەيدى روزا داۋلەتقىزى.
بالاباقشاعا وبلىس اكىمى بولات باقاۋوۆتىڭ اتىنان مۋزىكالىق كەشەن سىيعا بەرىلىپتى. كىشكەنتاي كاۋسار باۋىربەكقىزى اتالعان قۇرىلعىمەن ءان ورىنداپ بەردى.
جالپى, كەنشىلەر كەنتىندە 245 بالا باراتىن 3 بالاباقشا جۇمىس ىستەيدى. بالالار ونەر مەكتەبىندە 177 وقۋشى ءبىلىم السا, «جاسىباي» بالالار سپورت مەكتەبىنىڭ فيليالىندا 11 جاتتىقتىرۋشى 312 بالانى سپورتقا باۋلۋدا. كەنتتە «كەنشى» مادەني-ساۋىقتىرۋ ورتالىعى بار. بيىل «ديپلوممەن – اۋىلعا!» باعدارلاماسىمەن كەلگەن جاس ماماندارمەن مەكتەپتەر دە تولىعىپ وتىر.
فاريدا بىقاي,
«ەگەمەن قازاقستان»
پاۆلودار وبلىسى,
مايقايىڭ كەنتى
سۋرەتتى تۇسىرگەن اسەل الىمقىزى