رەسەي قازاعى ارمان داۋلەتياروۆقا «ارمان» دەگەن ەسىم تەككە قويىلماعان. اۋزىن اشسا اق جۇرەگى كورىنەتىن قانداسىمىزدىڭ دۇيسەنبى كۇنى الماتىدا «ماسكەۋلىك شىڭعىسحاننىڭ تاريحى» اتتى اۆتورلىق كىتابىنىڭ تۇساۋى كەسىلدى. ارماننىڭ ارماندار تۋرالى جانە وعان قالاي جەتۋدىڭ جولدارى تۋرالى كىتابى بىردەن قازاقستاندىق باق وكىلدەرىنىڭ نازارىن اۋدارىپ وتىر.
بۇل كىتاپ ماسكەۋدەگى شوۋ-بيزنەستى باعىندىرعىسى كەلگەن قاراپايىم قازاق جىگىتىنىڭ تاريحى مەن رەسەي شوۋ-بيزنەسىنىڭ بۇرالاڭ جولدارى جايلى باياندايدى. قازىر ارمان داۋلەتياروۆ مۋز-تۆ تەلەارناسىنىڭ مۋزىكالىق ديرەكتورى, رەسەي جانە قازاقستان مادەني-ىسكەرلىك ىنتىماقتاستىعى حالىقارالىق ورتالىعىنىڭ پرەزيدەنتى. وتكەن جىلى ول قازاقستان رەسپۋبليكاسى پرەزيدەنتىنىڭ جارلىعىمەن «قۇرمەت» وردەنىمەن ماراپاتتالعانىن ەسكە سالا كەتۋگە بولادى. ال جوعارىداعى كىتاپ رەسەيدەگى تانىمال پروديۋسەردىڭ تىرناقالدى تۋىندىسى.
– بۇل تۋىندى مەنىڭ دوستارىم مەن جانىما جاقىن جاندارعا ارناعان سىيلىعىم. مەن ونى جازۋعا ۇزاق ازىرلەندىم, مىنە, ارمانىم ورىندالدى. سىزدەر كىتاپتان مۇرات ناسىروۆ پەن باعلان سادۋاقاسوۆ سىندى تانىمال جانداردىڭ ونەر جولىنداعى قيىندىقتارى جانە ولاردىڭ جەكە تۇلعا رەتىندە قالىپتاسۋ تاريحىن بىلە الاسىزدار. بۇل انشىلەردىڭ دە ارامىزدان كەتكەنىنە بەس جىلدىڭ ءجۇزى بولىپتى. ولار مەنىڭ ەڭ جاقىن دوستارىم بولاتىن. ءبىز ماسكەۋگە بىرگە اتتاندىق, شوۋ-بيزنەس باسپالداعىنا بىرگە قادام باسقان ەدىك, – دەيدى ارمان.
رەسەيدەگى «است» سياقتى بەدەلدى باسپاحانامەن بىرلەسە وتىرىپ شىققان كىتاپ جەڭىل وقىلادى, شىنايى وقيعالارىمەن قۇندى. كىتاپتا پروديۋسەرلەر مەن ارتىستەر اراسىنداعى كۇردەلى قارىم-قاتىناس, ماحاببات, وتباسى, دوستىق پەن ومىردەگى وزگە دە قۇندىلىقتار جاقسى اشىپ كورسەتىلگەن.
اۆتور ءوزىنىڭ جەكە ومىرىنە قاتىستى جايتتەردى مىسالعا الا وتىرىپ, ادام تابىس پەن ماحابباتقا جەتۋ ءۇشىن جان-دۇنيەسىنىڭ نازىكتىگىن جوعالتىپ الماۋ قاجەتتىگىن ايتادى. ادامي قاسيەتتەر كىسىنىڭ كاسىبىنە دە ۇلتىنا دا باعىنبايدى, دەيدى ول. شوۋ-بيزنەس جولىنداعى جىگىت ءسويتىپ تۇڭعىش رەت ءوز تاريحى ارقىلى ادام ءوزىن ءوزى قالاي تاربيەلەۋگە بولاتىندىعى جايلى سىر شەرتەدى. كىتاپ پروديۋسەرلىك قىزمەتتىڭ قىر-سىرىن مەڭگەرگىسى كەلەتىندەر ءۇشىن عانا ەمەس, ومىردە باقىت پەن تابىسقا جەتۋدىڭ قۇپياسىن بىلگىسى كەلەتىندەر ءۇشىن دە قۇندى.
سونىمەن رەسەيلىك قانداسىمىزدىڭ جۋرناليستەرمەن ەمەن-جارقىن جاعدايدا وتكەن كىتاپ تۇساۋكەسەرى تاماشا سۇحبات الاڭىنا اينالدى. ءباسپاسوز ءماسليحاتىنا ءانشى-سازگەر باتىرحان شۇكەنوۆ, بەلگىلى مۋزىكانت, پروديۋسەر بايعالي سەركەباەۆ قاتىسىپ, كىتاپتا كەلتىرىلگەن قىزىقتى دا تاعىلىمدى وقيعالار جايلى ءوز اۋىزدارىمەن بايانداپ, جۋرناليستەردىڭ ساۋالدارىنا جاۋاپ بەردى.
ايناش ەسالي.
الماتى.