مۇنايلى وڭىردە بىلتىر بالا تۋ كورسەتكىشى 2016 جىلمەن سالىستىرعاندا 12,5 پايىزعا تومەندەدى. 16 556 ايەل قالىپتى بوسانسا, 923-ءى مەرزىمىنەن بۇرىن جەڭىلدەندى. مەديتسينالىق مەكەمەلەردىڭ قاجەتتى جابدىقتارمەن قامتاماسىز ەتىلۋى جىل ساناپ جاقسارىپ كەلەدى. الايدا كادر تاپشىلىعى ماسەلەسى ءالى بار. قازىردىڭ وزىندە اتىراۋ وبلىسىندا 89 دارىگەر جەتىسپەيدى.
وبلىستىق دەنساۋلىق ساقتاۋ باسقارماسىنىڭ باسشىسى مانشۇك ايمۇرزيەۆا 2017 جىلى اكۋشەرلىك قىزمەتتە 66 داعدارىستى جاعدايات بولعانىن ايتتى. وكىنىشتىسى, جاسوسپىرىمدەر اراسىنداعى جۇكتىلىك قالىپتى جاعدايعا اينالىپ كەلەدى. بىلتىر مەكتەپ جاسىنداعى 164 قىز بالا جۇكتى رەتىندە ەسەپكە تۇرىپ, 91-ءى ومىرگە ءسابي اكەلگەن. 15-ءى تۇسىك جاساتىپتى. كوڭىلگە كولەڭكە تۇسىرەر وسى جايتقا الاڭداعان پارلامەنت ءماجىلىسىنىڭ دەپۋتاتى بەيبىت مامراەۆ ەلباسىنىڭ «رۋحاني جاڭعىرۋ» باعدارلاماسىنىڭ وسى پروبلەمانىڭ الدىن الۋعا دا قاتىسى بار. وتان وتباسىنان باستالادى. ءار وتباسىندا ۇلتتىق قۇندىلىقتارىمىز سالتانات قۇرسا, سالت-داستۇرىمىزدەن اۋىتقىماساق, قىزدارىمىز مۇنداي كەلەڭسىزدىكتەرگە تاپ بولماس ەدى, دەدى. جاسوسپىرىمدەردىڭ تىم ەرتە جۇكتى بولۋ دەرەكتەرىنىڭ, اسىرەسە, اۋىلداردا بەلەڭ الىپ وتىرعانى تاربيە ماسەلەسىنە ءالى دە جەتە ءمان بەرۋ قاجەتتىگىن كورسەتەدى.
سوڭعى جىلدارى اتىراۋ وبلىسىندا انا ءولىمى ارتىپ وتىر. وتكەن جىلدىڭ وزىندە ەكى انا ءولىمى تىركەلدى. وبلىستىق دەنساۋلىق ساقتاۋ باسقارماسىنىڭ باسشىسى بۇل قايعىلى جايتتارعا بالا كوتەرەتىن جاستاعى ايەلدەرمەن جۇمىستىڭ جەتكىلىكسىزدىگى, ءتۇرلى اۋرۋلاردىڭ ۋاقىتىندا انىقتالماۋى, جۇكتىلىكتىڭ جوسپارلانباۋى سەبەپ بولعانىن جاسىرمادى. ەمدەۋ شارالارى مەن كونسيليۋمداردىڭ ۋاقتىلى ۇيىمداستىرىلماۋى, دياگنوستيكا حاتتاماسىنىڭ ساقتالماۋى دا وكىنىشتى جاعدايلارعا اكەپ سوققان.
بالا ءولىمى كورسەتكىشى ازايدى دەگەنمەن, بىلتىر ءبىر جاسقا دەيىنگى 109 ءسابيدىڭ ومىردەن ءوتۋى بۇل باعىتتاعى جۇمىستاردى ءالى دە جەتىلدىرە ءتۇسۋدى تالاپ ەتەدى. شەتىنەگەن شارانالاردىڭ 56 پايىزىنا پەريناتالدىق كەزەڭدەگى سەبەپتەر اسەر ەتسە, ءتۋابىتتى اۋرۋعا شالدىققاندار مەن ينفەكتسيالىق اۋرۋ سالدارىنان كوز جۇمعاندار دا بار. بىلتىر وبلىستا 17 بالا داۋن سيندرومىمەن ومىرگە كەلدى, ءتورت سابيدەن حروموسومالىق پاتولوگيا انىقتالعان. ماسەلەنىڭ بارىنە دارىگەرلەردى كىنالى دەپ قاراۋعا دا بولمايدى. دەنساۋلىقتارىنا ءمان بەرمەيتىن, ۋاقىتىندا تەكسەرۋلەردەن وتپەيتىن جۇكتى ايەلدەر قاتارى ازايماي وتىر. ءدىني سەنىمدەرىنە بايلانىستى مەديتسينالىق تەكسەرۋدەن وتۋدەن باس تارتاتىن ايەلدەردىڭ دە بارى بەلگىلى. جاڭا تۋعان سابيلەرگە ەكپە سالۋعا قارسى اتا-انالاردىڭ سانى وتكەن جىلى 16 پايىزعا ارتقان.
جاستار مەن جاسوسپىرىمدەردىڭ رەپرودۋكتيۆتىك, جىنىستىق, پسيحيكالىق دەنساۋلىقتارىنا ءمان بەرەتىن الەۋمەتتىك-مەديتسينالىق قىزمەتتەر دە جەتكىلىكسىز.
ايماقتاعى دەنساۋلىق ساقتاۋ سالاسىندا بىرقاتار ىلكىمدى ىستەردىڭ جاسالىپ جاتقانىن جوققا شىعارۋعا بولمايدى. مىسالى, وبلىستىق بالالار اۋرۋحاناسىندا اشىلعان كاتامنەستيكالىق كابينەتتە بىلتىر 597 بالا ەم العان. بۇل ءوز كەزەگىندە شالا تۋعان نارەستەلەر اراسىنداعى ءولىمنىڭ ازايۋىنا وڭ ىقپال ەتىپ وتىر. 220 مەديتسينا قىزمەتكەرى بىلىكتىلىگىن ارتتىردى. دەنساۋلىق ساقتاۋ مەكەمەلەرى زامانعا ساي قۇرال-جابدىقتارمەن قامتىلىپ كەلەدى.
باقىتگۇل باباش,
«ەگەمەن قازاقستان»
اتىراۋ