مەملەكەت باسشىسى رۋحاني جاڭعىرۋ ءىسىن جان-جاقتى پايىمداپ بەرگەن ەرەكشە ەڭبەگىندە وڭىرلەردە «تۋعان جەر» باعدارلاماسىن قولعا الۋ قاجەتتىگىن ۇسىندى. ونىڭ قاتىپ قالعان قاعيداسى بولماسا كەرەك.
سوندىقتان دا وعان ءار ءوڭىر وزىندىك ءبىر سونى قوزقاراس تۇرعىسىنان كەلە بىلسە, مۇنىڭ ءوزى اتالمىش باعدارلامانى مازمۇن جاعىنان دا, ءتۇر جاعىنان دا بايىتا تۇسەتىنىنە كۇمان كەلتىرۋگە بولمايدى. وسى ورايدا اقتوبە وبلىسىندا قولعا الىنعان «تۇلەك kz» جوباسى «تۋعان جەر» باعدارلاماسىن تۇرلەندىرە تۇسۋگە سەپتىگىن تيگىزە الاتىن ايرىقشا جوبا دەۋگە تولىق نەگىز بار. ونىڭ باس- تى ماقساتى ءبىرىنشى كەزەكتە وبلىس مەكتەپتەرىن بىتىرگەن تۇلەكتەردىڭ ۇشقان ۇياسى مەن تۋعان جەرىنە دەگەن پەرزەنتتىك سۇيىسپەنشىلىگى مەن ماحابباتىن تەرەڭدەتۋ بولىپ وتىر. اتالمىش جوبا وڭىردەگى ءبىلىم شاڭىراقتارىندا تۇلەكتەر تۋرالى جان-جاقتى مالىمەتتەر مەن دەرەكتەر جازىلعان سايتتار جاساقتاۋدان باستاۋ الدى. ءبىر جاقسىسى, قازاقتىڭ تالانتتى كومپوزيتورى اسەت بەيسەۋوۆتىڭ ءانىنىڭ ماتىنىندە ايتىلعانداي, ءبىر اۋىلدان تۇلەپ ۇشقان جاستاردىڭ قامشى سالدىراتىن تۇرلەرى كورىنبەيدى. ولار تۋعان جەر مەن تۋعان توپىراق الدىنداعى پارىز مەن قارىز ۇعىمدارىن و باستان-اق كوكەيلەرىنە زەردەلەي بىلگەنىن نەگە ايتپاسقا. سونىڭ ارقاسى شىعار, ءوڭىر تۇلەكتەرى بىلتىر تۋعان جەرىنىڭ ودان ءارى تۇلەۋى ءۇشىن جالپى سوماسى 1 ميلليارد 600 ميلليون تەڭگە كولەمىندە كومەك كورسەتىپتى. ولار مۇنى تۋعان جەر الدىنداعى پارىزدارىنىڭ ءبىر وتەۋى دەپ ەسەپتەيدى. «تۇلەك kz» جوباسىنىڭ باسى-قاسىندا جۇرگەندەر بيىل تۇلەكتەرمەن اراداعى بايلانىستار مەن قارىم-قاتىناستاردى ودان ءارى تەرەڭدەتە ءتۇسۋدى ۇيعارىپ وتىر.
تەمىر قۇسايىن, «ەگەمەن قازاقستان»
اقتوبە