جاڭاوزەندە جاڭا وندىرىستىك بازا ىسكە قوسىلدى

جالپى اۋماعى 9 گەكتار جەردى الىپ جاتقان بازادا مۇناي ونەركاسىبى قۇرال­دارىن جانە تەحنولوگيالىق كوممۋنيكاتسيالاردى جوندەۋ باسقارماسىنىڭ 300-دەن اسا قىزمەتكەرى جۇمىس ىستەيدى. سون­داي-اق اتالعان باسقارمانىڭ 5 تسەح, 2 ۋچاسكەسى وسى نىسانعا ورنالاسۋدا. مامان­داردىڭ ايتۋىنشا, مۇنداي ءىرى نىسان تمد ەلدەرىندەگى مۇناي-گاز سەكتورىندا العاش رەت سالىنىپ وتىر.

– ەلباسى ن.ءا.نازارباەۆتىڭ كۇنى كەشە جاريالاعان جولداۋىنداعى 10 با­سىم­­دىقتىڭ نەگىزگىسى دە وندىرىستىك سالا­نى جاڭعىرتۋ باعىتىندا بولدى. وت­كەن جىل قورىتىندىسى بويىنشا, ونەركاسىپ ءوندىرىسىنىڭ ناقتى كولەم يندەكسى 110,3%-دى قۇرادى. ال «وزەنمۇنايگاز» اكتسيو­نەرلىك قوعامى 5013,1 مىڭ توننا شيكى مۇناي, قالا كاسىپورىندارى ارقى­لى 281,7 ملن تەكشە مەتر تابيعي گاز ءوندىردى. «وزەنمۇنايگاز» اكتسيونەرلىك قوعا­مى بۇگىندە 9000-داي مۇنايشىنى جۇمىس­پەن قامتىپ, قالانىڭ الەۋمەتتىك-ەكونو­مي­كالىق دامۋىنا وزىندىك ۇلەس قوسىپ وتىر, – دەدى ماڭعىستاۋ وبلىسىنىڭ اكىمى ە.توع­جانوۆ نىساننىڭ اشىلۋ سالتاناتىندا.

وتكەن جىلى «وزەنمۇنايگاز» اك­تسيو­نەرلىك قوعامىنىڭ مۇناي ءوندىرۋ كور­سەتكىشى 5 ملن 480 مىڭ توننانى قۇرادى. كومپانيامەن وعان قاتىستى مەكەمەلەر 20 307 ادامدى جۇمىسپەن قامتىپ وتىر.

قازىرگى تاڭدا جاڭاوزەن قالاسىنداعى ەڭ وزەكتى ماسەلەلەردىڭ ءبىرى – اپاتتى جانە توزىعى جەتكەن ۇيلەر.

– ارنايى كوميسسيانىڭ شەشىمىمەن اپاتتى دەپ تانىلعان ۇيلەردىڭ تۇرعىن­دارىنا پاتەر بەرىپ, اپاتتى ۇيلەردى بۇزۋ جۇمىستارىن جۇرگىزۋ باعىتىندا بىرنەشە شارا قولعا الىندى. وتكەن جىلى بۇل ماقساتتا 431,9 ملن تەڭگەگە 56 پاتەر ساتىپ الىندى جانە № 59 ءۇيدىڭ تۇرعىندارىنا پاتەر كىلتتەرى تابىستالىپ, ءتيىستى قۇجاتتار راسىمدەلۋدە. اپاتتى جاعدايداعى №43 ءۇيدىڭ تۇرعىندارىن تولىقتاي پاتەرمەن قامتاماسىز ەتۋ ءۇشىن قوسىمشا 14 پاتەر ساتىپ الۋ قاجەت. بۇل 284 ملن تەڭگە ءبولۋدى قاجەت ەتەدى. سونداي-اق توزىعى جەتكەن 59 تۇرعىن ءۇيدىڭ كونسترۋكتسيالارىن بەكىتىپ, قاۋىپتى ۋچاسكەلەرىن قالپىنا كەلتىرۋ شارالارىن بيۋدجەت قارجىسىنسىز, وزگە مەكەمەلەردىڭ كۇشىمەن شەشۋ جولدارى دا قاراستىرىلۋدا, – دەيدى جاڭاوزەن قالاسىنىڭ اكىمى ادىلبەك داۋىلباەۆ.

جۇمىسسىزدىق پەن اۋىزسۋ ماسەلەلەرى دە جاڭاوزەن قالاسىنداعى باستى ماسەلە­لەردىڭ ءبىرى. قالا بويىنشا 1088 ادام جۇمىسسىزدىق ەسەبىندە تىركەۋدە تۇر. قالا جانە وعان ىرگەلەس اۋىلداردا تىركەۋدە جوق جۇمىسسىز جۇرگەن تۇرعىنداردىڭ, وتباسى جاعدايى تومەن وتباسىلاردىڭ ناقتى سانىن انىقتاۋ ماقساتىندا قالا اكىمدىگىندە جۇمىسشى توبى قۇرىلىپ, ۇيلەردى ارالاۋ جۇمىستارىن باستاعان.

اۋىزسۋدىڭ تاپشىلىعى قالادا, اسىرە­سە جاز مەزگىلىندە بايقالادى. جاڭا­وزەن قالاسىنا تاۋلىگىنە «قازترانسويل» اق-تان 20 مىڭ تەكشە مەتر, تۇيەسۋ, ساۋىسقان كەن ورىندارىنان 7,5 مىڭ تەكشە مەتر, بارلىعى 27,5 مىڭ تەكشە مەتر سۋ بەرىلەدى, ەدىل سۋى قالالىق سۋ تازارتۋ عيماراتىن­دا تازار­تىلادى. جاڭاوزەن قالاسىنداعى تاۋ­لى­گىنە 30 مىڭ تەكشە مەتر سۋ تازارتاتىن جاڭا نىساننىڭ قۇرىلىسى وسى جىلى اياقتالماق.

جەرگىلىكتى اكىمدىك قالادا اۋىزسۋ ماسەلەسىن شەشۋدىڭ جازعى مەزگىلدەر­دە «قازترانسويل» اق-پەن بەرىلەتىن ەدىل سۋىنىڭ كولەمىن تاۋلىگىنە 5 تەكشە مەتر­گە, ياعني 20 مىڭ تەكشە مەتردەن 25 مىڭ تەكشە مەترگە دەيىن كوبەيتۋ جانە «وزەنمۇنايگاز» اق-تىڭ «كەندىرلى» اۋما­عىنداعى تەڭىز سۋىن تۇششىتۋ زاۋىتى قۇ­رى­لىسىنىڭ جوباسىن ىسكە اسىرۋ سەكىلدى ەكى جولمەن شەشۋگە بولاتىندىعىن ايتادى.

جاڭاوزەندىك تۇرعىندار جەكە كاسىبىن باستاۋعا ىنتالى, اسىرەسە جەرگىلىكتى قول­داۋعا يە «وڭىرلىك «نۇر كاپيتال» باع­دار­لاماسى بويىنشا كاسىپكەرلىگىن ىسكە اسىرۋعا باستاماسى 1 ملرد تەڭگەنىڭ ۇستىن­دە نەسيەنى قامتيتىن 26 كاسىپكەر نيەت بىلدىرگەن. بۇل كاسىپكەرلەر 500 جاڭا جۇمىس ورنىن قۇراتىن بولادى. سونداي-اق قالا­نىڭ يندۋستريالىق ايماعىندا ءوندىرىس ورىن­دارىن قۇرۋعا نيەتتى 36 كاسىپكەر شامامەن 250 جاڭا جۇمىس ورنىن اشپاق.

جاڭاوزەندەگى جاسالىپ جاتقان جۇمىس­تارمەن بىرگە, جاسالۋى ءتيىس جۇمىس­تار دا بار. بوستاندىق پەن راحات شاعىن اۋدان­دارىندا درەناجدىق جۇيە سالۋ, اۋىل ءىشى­نىڭ اۆتوكولىك جولدارى ماسەلەسى, ەلدى مەكەندەرگە تروتۋارلار سالۋ, كوممۋنال­دىق مەكە­مەلەردىڭ قارجى-ەكونوميكالىق جاعدايى سەكىلدى ماسەلەلەر ءوز شەشىمىن كۇتۋدە.

گۇلايىم شىنتەمىرقىزى, «ەگەمەن قازاقستان»

ماڭعىستاۋ وبلىسى