قالانىڭ ورتالىعىنداعى امبەباپ ساۋدا بازارى ماڭىنان كۇنى بويى قاڭعىپ ءجۇرگەن ەكى-ءۇش جاس شاماسىنداعى ساميرا ەسىمدى ءبۇلدىرشىندى بازار كۇزەتشىلەرى بايقاپ قالىپ, پوليتسيا قىزمەتكەرلەرىن شاقىرتقان. اتا-اناسىنىڭ قاراۋىنسىز قالعان ءبۇلدىرشىن قىزدىڭ مىنانداي كۇننىڭ سۋىعىندا دەنساۋلىعىنا قاۋىپ-قاتەر كەلگەن جوق پا دەگەن كۇدىكپەن ءتارتىپ ساقشىلارى ءوز كەزەگىندە بالالار اۋرۋحاناسىنا جەتكىزگەن. سول كۇنى كەشكىسىن جەرگىلىكتى تەلەارنادان قىزدىڭ سۋرەتىن كورسەتىپ, اتا-اناسىنا ىزدەۋ سالىندى.
قايعىلى وقيعا قازاننىڭ 13-ىنەن 14-ىنە قاراعان ءتۇنى ورىن العان. ارىستان وتباسىندا جانجال شىعارىپ, كەلىنشەگىنە باسقا ءبىر ايەلگە ۇيلەنگىسى كەلەتىنىن ايتادى. ۇرىس-كەرىس كەزىندە ول كەلىنشەگىن قىلعىندىرىپ ءولتىرىپ, ءمايىتىن تەلەديداردىڭ قورابىنا سالىپ, ءۇيىنىڭ اۋلاسىنا كومگەن. ال قىزىن 15 قازان كۇنى ورالداعى بازارعا تاستاپ, ءوزى اقساي قالاسىنا تارتىپ وتىرعان.
جەرگىلىكتى بۇقارالىق اقپارات قۇرالدارىندا سۋرەتى جاريالانعان ءسابيدى تانىعان زەلەنىي اۋىلىنداعى كورشىلەرى جەرگىلىكتى پوليتسيامەن حابارلاسىپ, قىزدىڭ اتا-اناسىنىڭ تەلەفون نومىرلەرى انىقتالادى. الايدا, اكەسى ارىستانعا حابارلاسقاندا, ول ءوزىنىڭ ماسكەۋ قالاسىندا جۇرگەنىن, تاياۋدا ورالعا كەلەتىنىن ايتىپ جالتارعان. ال 30 قازان كۇنى قىزىن كورۋگە كەلگەن ساتىندە ول قازىرگى ۋاقىتتا كەلىنشەگىمەن بىرگە تۇرمايتىندىعىن جانە كەلىنشەگىنىڭ بالانى قاساقانا تاستاپ, الماتى قالاسىنداعى ءوز اناسىنا كەتىپ قالۋى مۇمكىن دەگەن جالعان اقپارات بەرەدى. بىراق, جاۋاپ الۋ كەزىندە كەيبىر سۇراقتارعا ءمۇدىرىپ, كۇدىك تۋدىرادى. ءناتيجەسىندە, پوليتسيا قىزمەتكەرلەرى قايعىلى وقيعانىڭ بەتىن اشىپ, قىلمىسكەر كىناسىن مويىندايدى.
وبلىستىق ءىىد كريمينالدىق پوليتسيا قىزمەتكەرلەرى تاعى ءبىر ادام ءولتىرۋ وقيعاسىن اشكەرەلەدى. بيىلعى 28 قازاندا اتىراۋ وبلىسىنىڭ يندەر اۋدانىنىڭ تۇرعىنى 1968 جىلى تۋعان ابيدا ەسىمدى ساۋداگەر كەلىنشەك ورال قالاسىنا كەلىپ, «ميرلان» بازارىندا وندىرىستىك جانە ازىق-ت ۇلىك تاۋارلارىنا كوتەرمە ساۋدا جاساعان. كەيىن ج.دوسمۇحامەدوۆ كوشەسىندە ورنالاسقان قويماعا بارعاندا قاراقشىلاردىڭ قولىنان قازا بولعان.
وبلىستا جىل باسىنان بەرى 9 ايەل ءولتىرۋ وقيعاسى تىركەلسە, سونىڭ بەسەۋى وتباسىنداعى جانجالدىڭ سالدارىنان ورىن العان.
فاتيحوللا ماشتاقوۆ, پوليتسيا پولكوۆنيگى.
باتىس قازاقستان وبلىسى.